Umugore wa Kabuga Felisiyani, Madamu Mukazitoni Kabuga Yozefina, yandikiye Perezida wa Leta y'Inkotanyi Kagame Paul amutakambira kandi amwibutsa ati: "ntabwo mwari mukwiye kwirengagiza ko umutungo w’umulyango utavogerwa".
Dore ibaruwa yamwandikiye ku tariki ya 10/12/2013.

Buruseli, ku ya 10 Ukuboza 2013

Nyakubahwa Paul KAGAME
Perezida wa Repubulika y’Urwanda
Urugwiro Village
B.P. 15 Kigali – Rwanda

Impamvu : Gusaba gusubirana uburenganzira ku mitungo y’umulyango

Nyakubahwa Perezida wa Repubulika,

Nashakanye n’umugabo wanjye Félicien Kabuga mu w’1959, dusezerana ifatanya mitungo. Ibyo twagezeho, twabibonye bitugoye, abanyarwanda benshi barabizi twakoraga mu mucyo.

Mu w’1994, intambara yarabaye, umulyango wacu urahunga, imitungo yacu isigara mu gihugu. Nta munyarwanda utazi icyayi twali dutunze cyagemurwaga mu mahanga.

Amakonti yacu yose, imigabane mu ma sosiyete atandukanye, amazu n’ibindi. Ibyo byose byigaruriye na Leta kumwe n’abayitwikiriye. Ariko, ntabwo banyuzwe, baza no kurega umugabo wanjye ubujura kandi ibyo yashatse byose bitunzwe n’abatarabiruhiye.

Njye, mbona ko n’ibyo aregwa biterwa no kugira ngo bakomeze batunge imitungo ye nta nkomyi. Ibaruwa nandikiye Ministri w’Ubutegetsi bw’igihugu tariki 28/09/2004 irasobanura neza ukuntu abategetsi banyuranye batwizezaga ko icyemezo cyo kuyidusubiza cyafashwe.

Nyakubahwa Perezida wa Repubulika, mu minsi ishize, hasohowe itangazo rivuga ko imitungo yacu yose, yeguliwe Leta. Aliko, nkabamenyesha ko kuva mu w’1994 kugeza ubu, ali Leta yali iyifite yose.

Niba hari icyo murega umugabo wanjye, usibye ko nzi yuko arengana kandi akaba ari inyangamugayo, ntabwo mwari mukwiye kwirengagiza ko umutungo w’umulyango utavogerwa, kuko njye n’abana bacu tugomba kubaho, kandi amategeko aduha uburenganzira busesuye ku mitungo y’umulyango.

Mu wi 2003, abana bacu baje m’Urwanda kureba imitungo yabo. Nkuko mwari mwabibijeje igihe muhurira i Zurich mu Busuwisi, muri kumwe na Minisitiri Donald Kaberuka, Dr Emmanuel Ndahiro hamwe na Minisitiri Christophe Bazivamo, ko muzabasubiza imitungo y’umulyango wabo wa Kabuga. Nyamara ntabwo ari ko byagenze bagarutse amara masa.

Nagiraga ngo mbamenyeshe ko mwahungabanije uburenganzira bw’abana kimwe n’ubw’abategarugori kandi muvuga ko mwabateje imbere. Ese twe twabarirwa he ?

Nyakubahwa Perezida wa Repubulika, ndabasaba gusuzumana ubwitonzi n’ubushishozi iyi baruwa kugira ngo jyewe n’abana bacu turenganurwe.

Joséphine MUKAZITONI KABUGA
Avenue d’Iéna, 13
1410 Waterloo - Belgique

Ishimutwa ry'abagabo n'abasore muri Rubavu (Intara y'Iburengerazuba) rirakomeza.
Dore ibarwa Mme Mukamurema Emerita wo mu mudugudu wa Ndobogo, Akagari ka Gisa, Umurenge wa Rugerero, Akarere ka Rubavu, Intara y'Iburengerazuba, yandikiye abategetsi ku tariki ya 31/10/2013, nyuma y'aho umugabo we aburiye irengero.

Mukarurema Emerita
Intara y'Iburengerazuba
Akarere ka Rubavu
Umurenge wa Rugerero
Akagari ka Gisa
Umudugudu wa Ndobogo
Tel. 0782098235

Ndobogo kuwa 31/10/2013

Impamvu: Kumenyesha

Bwana Muyobozi w'Akarere ka Rubavu,

Nejejwe no kubandikira iyi baruwa ngira ngo mbamenyeshe ko kwitu itariki ya 25/10/2013 umugabo wanjye witwa KAYIHURA MUSSA CHRISOLOGUE yabuze ahamagajwe na Numero ya Telefoni atazi. Ariko tariki ya 23/10/2013. Umuyobozi w'umudugudu wa NDOBOGO yampaye inomero ya Telefoni itagira izina ngo nyihe umugabo wanjye ayihamagare ngo uwo muntu ari kumushaka ngo amuhe akazi.
Ikibabaje nuko nagiye k'Umuyobozi w'Umudugudu ngiye kumusaba iyo nimero, ambwira ko ntayo afite. Mubajije uwayimuhaye ambwira ko ari uwitwa MAGARA utuye mu GISA; mbajije MAGARA nawe ambwira ko yayihawe n'umuntu atazi , bakomeza kunjijisha batyo.
Akaba aliyo mpamvu mbibamenyesheje kugira ngo mumfashe kubikorera iperereza kuko kugeza ubu ataraboneka.

Murakoze.

Mukarurema Emerita

Bimenyeshejwe:
- Ukuliye Ingabo mu Karere ka Rubavu
- Ukuliye Police mu Karere ka Rubavu
- Station Police Gisenyi
- Ibiro bishinzwe Iperereza mu karere ka Rubavu
- Umunyamabanga Nshingwabikorwa w'Umurenge wa Rugerero
- Umunyamabanga Nshingwabikorwa w'Akagari ka Gisa

Mu Karere ka Rubavu, abaturage barashimutwa, ababo ntibabwirwe iyo barengeye

Kigali 21/11/2013 - Hagiye gushira igihe kigera hafi ku mezi abiri mu bice bitandukanye by’igihugu bavugwa igikorwa kigayitse cyo gushimuta abaturage cyane cyane abasore, ntibabwirwe icyo bafatiwe, bagafatwa n’abantu bigararagara ko ari abashizwe umutekano kubera ko bamwe muri bo baba bambaye imyenda ya gisivile ariko bakaba bitwaje imbunda ari nazo bakangisha abo bafata iyo batangiye kubaza bati « turazira iki ?». Hari n’aho iri shimutwa rikorwa n’abashinzwe umutekano bambaye imyenda y’akazi ariko bose nta numwe ubasha gusobanurira abafatwa icyo bazira. Aba baturage iyo bamaze gufatwa bashyirwa mu mamodoka bagatwarwa ahantu hataramenyekena ku buryo n’imiryango yabo idafite aho yabariza abayo.
Muri ino minsi aho icyo kibazo gikomeye cyane ni mu Ntara y’Iburengerazuba cyane cyane mu Karere ka Rubavu aho ubu abaturage bakutse umutima kubera ko ibyo bikorwa byo kubashimuta bikaze cyane ku buryo bari kwitabaza kwifungirana mu mazu yabo ! Iki kibazo abaturage bakimenyesheje inzego z’ubuyobozi ariko nta numwe uri kubasha kubarengera ; bose bararuca bakarumira cyangwa bakabeshya ko ngo abari gufatwa ari inzererezi!
Nonese ko leta y’u Rwanda itigeze itangaza ko hariho gahunda y’ibihe bidasanzwe kuki abaturage bayo bahutazwa bene aka kageni ubuyobozi bukabona ko nta kibazo kandi Itegeko-nshinga u Rwanda rugenderaho mu ngingo yaryo ya 10 risobanura ukuntu umuntu ari umunyagitinyiro kandi ko leta n’inzego zose z’ubutegetsi zigomba kumwubaha no kumurengera? Kuki leta yakumva ko ntacyo bitwaye gufata abantu ugapakira amamodoka ntubamenyeshe icyo ubafatiye ndetse n’imiryango yabo ntigire uburenganzira bwo kumenya aho abayo baherereye ndetse n’icyo bazira?
Hari ikindi kibazo nacyo kiri kuvugwa hirya no hino cy’abantu bari guhamagara abandi n’amatelefone ngo nibabitabe hanyuma bagenda abo bantu ntibongere kugararagara bakazimira,imiryango yabo ikaba iri gusiragira yarabuze gitabara ngo abayo bongere baboneke !
Ishyaka FDU-Inkingi rihangayikishijwe bikomeye n’ibi bikorwa bigayitse kandi bihangayikishije rubanda. Turasaba inzego zose zirebwa n’iby’umutekano w’abaturarwanda gusobanura no gukemura izi ngorane abaturage bafite kandi niba hari gahunda yo kubahiriza ibihe bidasanzwe abaturage bagomba kubimenyeshwa bityo bagahama mu ngo zabo cyangwa bakubahiriza amabwiriza baba bahawe, uyarenzeho agahanwa, ariko ntibahutazwe nta nkomyi nk’aho nta tegeko rihari ribarengera.

FDU-Inkingi
Twagirimana Boniface
Umuyobozi wungirije w’agateganyo

«Ndabasaba ko mwakora ibishoboka mugatabariza abantu bari gufatwa ku ngufu n'igipolisi cy'u Rwanda bakabajyana kuri station barangiza bakabohereza i Mudende aho kugeza ubu abantu bageze mu magana.
Kubera iki gikorwa kibi cya Leta ya Kigali, ubu abaturage bose bahahamutse ku buryo nta wugipfa kuva mu rugo iwe kubera gutinya kujyanwa mu gisirikare ku ngufu.
Ikindi ni uko amakuru arimo kutugeraho ari kuvugako hari n'abari koherezwa i Bugande.
Ndasaba buri wese ko yakwamaganira iki gikorwa cy'ubugome aho ari hose.»

Paulin Murayi via facebook.

Umukwabo wo gufata abantu bakajyanwa ahantu na n'ubu hataramenyekana biteye inkeke uwariwe wese.

Ubu turabasaba inkunga y'amasengesho kuko turahashirira.

Donatien Mukeshimana via facebook - 20/11/2013.

Inkuru tugezwaho na Bwana Twagirimana Boniface:
Amakuru aturuka mu karere ka Rubavu aratumenyesha ko nyuma yaho abaturage baho barembejwe n'abari kubashimuta kandi inzego z'ubuyobozi zirebera ubu abagore baho n'inkumi batangiye gahunda yokugerageza guhangana n'abari kubashimutira abagabo n'abana aho ngo bari kubabona bakabavugiriza induru bigatuma izo nkozi z'ibibi zitinya kubajyana kubera gutinya induru y'abo babyeyi n'inkumi!
Bitangiye no guhwihwiswa ko abari gutwarwa bashobora kuba bari kwerekezwa mu gihugu cy'ubugande gusa icyo bajyanwa gukorayo cyo ngo ntikiramenyekana.

Twagirimana Boniface via Facebook - 20/11/2013.