Ibyo Tuzaganiraho:

1. Gukomeza kuganira k'ubusumbane hagati y'abagabo n'abagore na cyane cyane:
a. Uruhare abagore bagomba/bakwiye kugira mu mitungo/imari y'ingo zabo
b.Uruhare rw'abagore mu guharanira uburenganzira bwabo

2. Umusi mpuza mahanga w'Abari n'abategarugori i.e. italiki 8 Werurwe 2014

a. Usobanura iki kuri twebwe societies z'abarundi n'abanyarwanda?

Ese koko ABATEGARUGORI bari bakwiye uburenganzira n’Ubwisanzure nk’ubwo abagabo?
Uburinganire hagati y’Abagore n’Abagabo…ni ukuvuga iki?
Ni uruhe ruhare rw’Amateka n’Imico nyarwanda mu BUSUMBANE bw’ibitsina byombi?
Ni izihe nyungu, cyangwa ingaruka MBI z’Uburinganire bw’abagore n’Abagabo?
Ni izihe nzitizi zituma Ubwo buringanire butagerwaho?
Kuki abagabo bahita bagira ubwoba, bagahinda Umushitsi iyo bumvise ijambo “UBURINGANIRE”?

Ncuti zacu, na cyane cyane ncuti z’Ikiganiiro cy’Urubyiruko…Ibyo ni bimwe mu bibazo tuzibandaho mu kiganiiro cyacu cyo kuri iki Cyumweru, taliki ya 22 Gashyantare 2014.

Articles ya 1 n’iya 2 mu Gitabo cy’amasezerano mpuza mahanga ku burenganzira bwa kiremwa muntu, yasinywe mu mwaka 1948 i Paris (http://www.un.org/en/documents/udhr/), ziratomora neza ko abantu twese i.e. Abagore n’Abagabo tuvukana ubwisanzure ndetse n’uburenganzira bwose bungana. Ariko mu by’ukuri, birababaje cyane kubona ko atariko ibintu bimeze!

Kuri benshi mu banyarwanda n’abarundi, iyo umuhungu avutse abonwa nk’uko avukanye “Permis” ntakomwa izamwemerera gutegeka no kugaanza igitsina gore icyo ari cyo cyose, aho ari ho hose ubuzima bwiwe bwoose. Mugihe benshi aho kuvugiriza impundu umwana w’umukobwa, bamubona nk’uwuvukanye umwaku n’umuvumo wo kuzamara ubuzima bwiwe bwose munsi y’ibirenge n’amategeko by’igitsina gabo! Kubera iki? Kubera iki rwose?

Ubwo rwose, ntiharagera aho abagabo dukwiye kubahirwa ubumuntu, ubutwari n’ibikorwa byacu aho kubahirwa ubwaanwa n’igitsina cyacu, maze abagabo b’imburamumaro nabo bakarutishwa abagore b’imboneza?

Bamwe bazagerageza gukoreshya Amateka n’Imico nyarwanda, abandi za Bibiliya, za Korowani n’ibindi bitabo mu gusobanura ibidashobora kusobanurwa: Ubutware, Ubukuru n’Ubutegetsi umuhungu avukana!

Dore rero, ncuti…ni kuri iki cyumweru, saa 19h00′ z’i Londres cyangwa saa 21h00′ z’i Kigali/Buja!

Kaze rwose tuganire kuri iki kibazo cy’Ubusumbane kimaze imyaka ibihumbi n’ibihumbi gikandamiza ba Nyogokuru, ba Mama, bashiki bacu, abagore n’abakobwa bacu!::))

NB: Iki kiganiro (…cy’ubusumbane/Uburinganire) cyari cyahitishijwe mu kiganiro cy’Urubyiruko cyo kuwa 26 Mutarama 2014! Inyuma yacyo, habaye benshi basabye ko cyasubirwamwo, dore ko ngo cyabayemwo byinshi batemeranya nabyo. Twemeye rero kugisubiramo, kaze rwose…urubuga ni urwanyu maze ibitekerezo byanyu bishyirwe k’umugaragaro, no k’umunzane wa rubanda!

Nyagasani akomeze kubana natwe twese,

Ndiprime
Ikiganiro cy’Urubyiruko
Radiyo Ijwi rya Rubanda

Birababaje ko inyandiko igoreka amateka wanditse wayise: "ABANYARWANDA BIRINDE ABABAYOBYA BANDIKA CYANGWA BIGISHA AMATEKA BAYAGORETSE KUBERA I NYUNGU ZABO BWITE KUKO ARIBYO BYAKOMEJE KOREKA U RWANDA"
(http://www.inyenyerinews.org/human-rights/abanyarwanda-birinde-ababayobya-bandika-cyangwa-bigisha-amateka-bayagoretse-kubera-i-nyungu-zabo-bwite-kuko-aribyo-byakomeje-koreka-u-rwanda/)

Ubusanzwe sinajyaga mpa agaciro cyane ijambo ryitwa GUKORA BUFUKU risigaye rikunda gukoreshwa cyane muri iyi minsi, aho baba bashaka kuvuga ku muntu ugenda agakinga urugi mu nzu iwe akihisha inyuma ya mudasobwa agatangira kwiyandikira ibyo abonye, ibyo yarose, nibyo yifuza, hamwe nibyo yibeshya byose byose bivanze. Ikizakubwira abo bantu akenshi ni uko mu nyandiko zabo utazasanga ahantu na hamwe kuri iyo nkuru ahanditse izina ry’uwanditse iyo nkuru, aho abarizwa, uko wamubona, address ye wamusubirizaho cyangwa wamubarizaho ikibazo. Uzasanga kenshi yanditse ibintu ngo mwirinde uwanditse iyi nkuru cyangwa ikinyamakuru iki niki cyangwa se n’umunyamakuru runaka, ariko ntahaguruke ngo ajye imbere avuge ibyo anenga muri izo nyandiko cyangwa se mu byo umuntu uyu nuyu yavuze ngo anatinyuke ajye imbere babijyeho impaka maze asobanure neza ibyo bitekerezo bye n'ukuri kwabyo. Abo koko nta rindi zina ribakwiye usibye INKORABUFUKU, ariko byapfa byakira bajye bareba ahandi batimbiriza bataje kubeshya rubanda.
Nigeze ndeba agafirime mu Rwanda bita agasobanuye (abakiri bato barahita bumva ibyo mvuze, ni udufirime tuba dusobanuwe mu Kinyarwanda) noneho uwasobanuraga abonye abahungu babiri bari batwaye indege bambuye abo barwanaga bakayitwara ikagenda ishaka kugwa no kugonga ibiti kandi ni nako byaje kugenda, gusa abari muri iyo ndege umwe yabazaga mugenzi we ati niko sha wigiye gutwara indege hehe ni mu Bugande cyangwa? Aha rero niho nakuye kwibaza nti aho aba bagenzi bacu bigiye indege muri Uganda ntibagiye kumera nk'aba bigiye amateka y’u Rwanda mu Bugande?
Iyo ugiye ukurikirana neza aba bantu mu ma disikuru yabo uhita rwose wumva ko amateka bayivugira ukwabo, kandi koko ntibitangaje kuko abayabigishije babaga bagamije kubahemberamo umujinya w’injyanamuntu bari kuzakenera gukoresha mu mirwano bari bari kwitegura gutangiza mu mwaka w’1990. Aha rero njye ndatekereza ko haba hari zimwe mu mpamvu z'uko bagiye bigishwa amateka atandukanye n'ayo abandi bari mu Rwanda bize, kuko akenshi njya numva cyane cyane n’abatutsi bari mu Rwanda mbere ya 1994 hari aho bagenda bavuga kumwe n'abo bagenzi bacu bari barahungiye i Bugande.

Reka rero nsubize uyu mugabo niba ari n’umugabo cyangwa se umubyeyi?

Aha ndibuvuge ku bintu bibiri gusa muri byinshi wavuze njye ntemera, ubwo abakuru kuri njye bandusha byinshi nabo bazagusubiza ku bisigaye.

1. Ngo Abanyarwanda bari bibaniye neza abazungu bataraza!
Sinemeranya nawe aho wanditse ugira uti:
"Muri make mbere y’umwaduko w’abazungu, abanyarwanda bari babanye neza, bafite umuco n’amateka bibaranga, bafashanya kandi bakundana nk’abavandimwe. Aho abazungu baziye mu gikorwa cy’ubukoloni nk’uko babigenje hirya no hino muri Africa, bageze no mu Rwanda. Icyo gihe u Rwanda rwayoborwaga n’ubwami bwahozeho kuva kera mbere y’uko ubwami bw’ababiligi bubaho. Abadage nibo bageze mu Rwanda mbere mu mwaka 1914[1], maze basimburwa n’ababiligi bahageze muri 1919[2]. Birumvikana iyo umuntu aje mu gihugu cyawe agambiriye kugutegeka ibyo yishakiye hari ibyo mwumvikanaho ubona ko bifite akamaro n’ibindi mutumvikanaho. Umwami Musinga wariho icyo gihe niko byamugendekeye, yagerageje kwereka abazungu ko batagomba guhindura ibintu byose uko babyumva maze bimuviramo kwirukanwa mu gihugu cye kuri 14/11/1931, icirwa ishyanga, arinaho yaje kugwa muri Congo."

Ntibitangaje kuba wavuga aya magambo gusa uyumva wese yahita yumva uwo uri we kuko iyi mvugo niyo na n'ubu igikoreshwa n’umwidishyi mukuru, aho adahwema kuvuga ko abanyarwanda bibaniye neza nta kibazo ko ikibazo ari abazungu noneho ubu hiyongereyeho n’abatavuga rumwe na Leta ye.
Niko se nyabusa, wavuga ute ko abanyarwanda bari babanye neza mu gihe bamwe bari batunzwe no guhingirwa no guhekwa n'abandi, kuko gusa badahuje ubwoko, gusa ibi sindi bubisobanureho byinshi kuko n'umwana uvuka ubu azi amarira,agahinda imvune, ikiboko, ubuhake, impfu n'ibindi byinshi byari byiganje muri ubwo butegetsi bwa bene wanyu uri guhatira abantu bose gushimagiza.
Ikibazo nticyari abazungu. Va ku giti dore umuntu. Ikibazo ni uko hari abantu bamwe na nubu bakibeshya ko hari abavukiye gutegeka abandi cyangwa ngo ko bamwe bazi ubwenge n’uburyarya kurusha abandi.

2. Ngo intambara n’ubwicanyi biratangira kuva 1959 kugeza 1994!
Dore uko wowe nyirukwiyandikira ubyivugira:
"Ibyakurikiyeho nyuma n’uko abanyarwanda bakomeje kumarana, intambara n’ubwicanyi birakomeza kuva 1959-1973-1994, bitewe n’umurage mubi Ababiligi bari bamaze gushyira mu gihugu cyacu wo gushyamiranya amoko ya Bahutu na Batutsi kandi mu by’ukuri mbere barabanaga neza nk’abavandimwe."
Aha rero niho wakomeje kwigaragaza uwo uri we.
Niko se wowe urumva ubwicanyi bubabaje bukwiye kwandikwa no kubabaza abantu ari ubwo guhera muri 1959 kugeza muri 1994 gusa? Birumvikana ko nta bwicanyi buba bwiza ariko se muvandi, urumva abantu bakindaguwe n’abo bami ushimagiza. warangiza ngo bashakiraga rubanda amahoro, yahe yo kajya ahubwo ko amahanga yari amaze kubona nayo ko akarengane kagirirwa rubanda rugufi yari yiganjemo abahutu kamaze kurenga kwihanganirwa, maze ugatangira gucurikanga amagambo ngo y’ubwami bugendera ku itegeko nshinga? Aha ho sinzi n’impamvu wiriwe wivuna wandika ibi ubundi se simbona aribwo bwagarutse ra ubundi ubu bitandukaniye he?
Ngaho shimagiza wivuye inyuma kuko ibyo wababajwe n'uko ba sogokuruza bawe batagezeho ndabona so we yarabashije kubigeraho. Naho ibyo kwishongora ngo ubwicanyi burakomeza kuva 1959-1973 kugeza mu w’1994, nari kukwita umugabo iyo uvuga n'ubwa mbere ya 1959, kuva 1990 - kuva 1994 kugeza n'uyu munsi... njye singiye kurondora amazina kuko uwavuga uko inzuki zihova ubuki ntiyazongera kubunywa. Mvuze ubwicanyi bwakomereje aho wagarukirije byazagutera isoni kongera kwandika aya matakaragasi yawe ngo ni amakuru uhaye abantu. Ariko mujye muceceka munige no kugira isoni. Kuki mushimishwa no kwihesha icyubahiro mu byagombye kubatera isoni? Nimuce bugufi muganire n’abandi, amakosa yabayeho tuyemere nta kwihagararaho, maze turebe ko twakwiyubakira igihugu.

Nibyo koko, abanyarwanda bakwiye kwirinda abantu nkawe BABAYOBYA BANDIKA CYANGWA BIGISHA AMATEKA BAYAGORETSE KUBERA INYUNGU ZABO BWITE KUKO ARIBYO BYAKOMEJE KOREKA U RWANDA.

Ndangije ngutumira kuri Radiyo Ijwi rya Rubanda mu kiganiro cy’urubyiruko maze uzaze udusobanurire ayo mateka natwe tukwibarize ibibazo. Aho ntiwasanga twese tuhungukiye ko burya kuganira ntawabigaya atarabona ikibivuyemo? Ariko nzanakugaya nukomeza kwibera mu mwobo gusa utaza ngo userukire ibitekerezo byawe. Nuhitamo guceceka kandi uzaceceke iteka.

Aderesi yanjye ni iyi:
Ernest Nsenga (bimemarc@yahoo.com)
Urubyiruko ku Ijwi Rya Rubanda

Mukomere. rubyiruko n'abandi bose bakunda gukurikirana ikiganiro cyacu,
Dukomeje gushima byimazeyo urubyiruko n'abantu bakuru bakomeje kuduha ibitekerezo n'inama zubaka., ni muri urwo rwego twabamenyeshako ku cyumweru le06/07/2013 mu kiganiro cyacu tuzahana ibitekerezo ku byavuzwe mu kiganiro cyahise ku cyumweru gishize, cyari gifite umutwe uvuga ngo IHAME RY'UBUREZI MU RWANDA RYIFASHE RITE MURI IBI BIHE, muri icyo kiganiro cy'ubushize twari dufite abatumirwa bavuye mu Rwanda b'urubyiruko, icyo kiganiro kizongera kunyura kuri Radiyo ijwi rya rubanda ku cyumweru guhera saa yine isaha y'i London na cyangwa saa tanu I Paris no mu Rwanda mbere y'amasaha abiri ngo ikiganiro cy'urubyiruko endirect/alive ngo gitangire. Turaritse abafite inama n'ibitekerezo ngo muzabe muri hafi.
Ernest Senga and Tuyishime J. Nepo.

Ernest Senga
Bruce 2617
Australian Capital Territory
Australia.
Mob +61469356764
bimemarc@yahoo.com

RE: Ibarwa y’Impuruza.

Kuri ba Nyakubahwa Bayobozi b’amashyaka ya Opposition,
ari akorera mu Rwanda ndetse no hanze y’u Rwanda.

Ba Nyakubahwa Bayobozi,

Hashize igihe kitari gito u Rwanda n’abanyarwanda byugarijwe n’ibibazo by’ingutu umuntu atavugira hano uyu mwanya ngo bibe byarangirira muri iyi nyandiko. Gusa icyo nzi namwe muzi, ni uko bibabaje ndetse birenze no kubabara.

Bayobozi b’abamashyaka nshuti zanjye,
Sinabura kubanza kubashimira igitekerezo kiza cy’ubutwari mwagize cyo kwanga guheranwa n’ubwoba mukiyemeza guhaguruka mukanga ikibi mukanacyamagana ku mugaragaro. Ibyo ni ubutwari mukwiye gushimirwa by'umwihariko nanjye ubandikiye ndabibashimiye byimazeyo.
Sinabura no kuvuga ko bamwe ubutwari bafite ubu, basa n’ababuvukanye, ibyo bigaragarira mu bikorwa byinshi, bamwe muri mwe, ndetse n’ibitekerezo n’imigambi mwagiriraga igihugu cyanyu kuva mukiri bato.

Bayobozi b’amashyaka, Bavandimwe,
Ibihe biri gushira vuba kandi byihuta cyane, kandi uko bihita niko imiyoborere y’igihugu cyacu irushaho kugenda iba mibi no kurusha uko byahoze. Gusa ikibabaje muri ibyo byose, ni uko ari mwe maso ya rubanda abo nakwita imbonerakure, kuko mubona hakiri kare ishyano ryenda kugwira rubanda.

Bayobozi b’amashyaka, Bavandimwe,
Njye hamwe n’abandi benshi nkanjye dukomeje kubabazwa no kubona mudaha agaciro ibanga ryo GUHUZA IMBARAGA. Ni koko mu by’ukuri biragoye kubera ibikomere n’agahinda ndetse no kwitana bamwana byagiye birangwa n’impande ebyiri z’amoko y’abanyarwanda. Aha ndavuga abahutu n’abatutsi kuko ari twe mu byukuri dufitanye amakimbirane ari kugira ingaruka mbi kuri rubanda tubereye amaso.

Banyamashyaka, Bavandimwe
Ndabinginga cyane kandi mbakunze ngo buri shyaka ku ruhande rwaryo ryihangane ritekereze ku kintu kitwa KUBABARIRANA. Ni ikintu kigoye ariko gishoboka. Ndavuga imbabazi zimwe zituma umuntu yimuka mu bikorwa no mu mitekerereze akava kuri etaje ya mbere agahagarara byibuze nko ku ya gatandatu... Mbega ukuntu ibyo byonyine bishobotse hari byinshi byahinduka mu gihe gito we. Njye ubwanjye ubabwira ibi mbifitiye ubuhamya ku mibereho yanjye iyo umuntu amaze kubabarira ibikorwa byose akora bigenda nk’umwambi w’umuriro nta wubasha kubihagarika.
Reka mbasabe turekere aho iterana ry’amagambo no kwitana bamwana ndetse na ba nyirabayazana. That’s enough.
Ndabinginze ngo muze dufatanye dutere intambwe nshya maze murebe ko rubanda nayo itatugirira ikizere kandi nabo bakaruhuka.
Nimureke ibintu byo guhigana ubutwari, bamwe bashaka kwiyereka rubanda ko aribo b'igitangaza bazi kuvuga bazi gukora, ariko mu byukuri nta mugabo umwe. Kandi ngo uguhiga ubutwari muratabarana.

Bayobozi b’amashaka, Bavandimwe,
Ndabizeza ko mu mwaka umwe gusa mwemeye gufatanya nta buryarya, ndabizeza ko twaba duteye intambwe igaragarira buri wese kandi njye nanabaha n’igihe urugamba rwo kwibohoza rwaba rurangiriye ariko abantu bemeye guhuza umutima no gufatira hamwe iki kivi ndabarahiye igihe cyaba gito. Nibitaba uko ndabibijeje njye nzabimanikirwe.

Bayobozi bavandimwe dusangiye inshingano,
Nababwira byinshi ariko nzi neza ko benshi ibyo mvuga babyumva kandi ariko banabibona ahubwo ikibazo kikaba ninde uzabitangira, uwo niwe dutegereje kandi azaba yandikishije amateka atazibagirana mu bihe bizaza.
Muyobozi w’ishyaka…… aho ntiyaba ari wowe wabishobora?
Aho si wowe musaza usheshe akanguhe, w'inararibonye, wahuza aba bantu?
Aho simwe rubyiruko mwem ushaka kwiyubakira ejo hazaza?
Mbese ntiyaba wowe nararibonye ufite byinshi uzi byafasha muri icyo gikorwa?
Nk'uko umutima ufite inyota wakirana utegereje amazi yo kunywa niko natwe tubategereje kandi twiringiye ko mutazadutenguha.

Amahoro y’Imana abane nabifuriza abanyarwanda ibyiza hamwe nabashaka amahoro nyakuri bose.

Uwanyu Ernest Senga.

Iyi barwa-mpuruza yohererejwe:
Bwana muyobozi w’ishyaka RDI Rwanda rwiza na komite ye.
Bwana muyobozi w’ishyaka PS Imberakuri na Komite ye.
Bwana muyobozi w’ihuriro RNC na komite ye.
Bwana muyobozi w’ishyaka Partenariat Intwari na komite ye.
Bwana muyobozi w’ishyaka Ishema ry’u Rwanda na komite ye.
Bwana muyobozi w’ishyaka PNRP Abasangizi
Bwana muyobozi w’ishyaka PDP Imanzi na komite ye.
Bwana muyobozi wa FDRL na ko mite ye.
Bwana muyobozi w’ishyaka ISANGANO ARRDC Abenegihugu
hamwe n’ayandi ntarondoye.

NB: Sinarangiza iyi barwa yanjye ntibutse gushimira abanyamakuru batugezaho amakuru kandi bakagerageza guhuza ibitekerezo by’abanyarwanda, uruhare rwanyu ni ntagereranywa mu gufasha abanyarwanda, aha ndavuga Radio ITAHUKA na Radio IJWI RYA RUBANDA.
Gusa ukomye urusyo akome n’ingasire. Aba bavandimwe bacu tumaze igihe kinini tugaya tunenga ibitaragenze neza n’abatarabyitwayemo neza. Namwe reka mbisabire mwimukire namwe ku rundi rwego rwo GUHUZA imbaraga z’aya mashyaka. Reka mujye mutumira buri gihe aba bayobozi, atari ukubanenga gusa, ahubwo mubabaza aho bageze muri iki gikorwa. Uzaba ari undi muganda ntagereranywa uzaba wiyongereye ku usanzwe.
Ernest Senga.

Uyu mugani wa Ndabaga aba kera bajyaga bawuca iyo babonaga ibintu byageze kure aho bitabaza umuntu utari ubikwiye, dufate nk’urugero nko kuba umuntu yajya nk’Ikigali atarasanzwe ahamenyereye noneho agashaka uwo ayoboza inzira akamubura noneho akaza kubona nk’impumyi yicaye ahantu agatangira kuba yayiyoboza, icyo gihe abantu bashoboraga kuvuga ngo: ibintu byageze iwa Ndabaga aho umuntu ubona ayoboza impumyi.

Ese kagame ni umufirozofe cyangwa ni umurwayi?
Muri ibi byombi byanze bikunze harimo kimwe; kuko njye mu bisanzwe nzi ko abadepite ari intumwa za rubanda, niba ari intumwa za rubanda FPR Kagame nta buryo yagenda igafata umuntu nka Bamporiki E. rubanda yose imaze iminsi yamagana kubera kurengera igifu cye yitwaje gupfukamisha abana b’abahutu bose uko bakabaye, noneho ngo abe ariwe bimikisha amamesa ngo abe ariwe ujya guhagararira rubanda. Ibi kuri nkatwe urubyiruko ni igitutsi, ni ugusuzuguza urubyiruko rw’u Rwanda rukiyubaha rukirangwa n’ubumuntu ubereka ko hataguma abazima haguma abazi gucinya inkoro cyane, abazi mbese gupfukama amavi akamera nk’inkokora z’ihene. Birababaje kandi nta gushidikanya guhakwa byaragarutse.
Ariko nanone nanjye ntagiye gukabya, iyaba umuntu yashoboraga kwihakirwa ku giti ke ariko utitwaje rubanda. Bimaze kugaragara ko Kagame yashatse kwitwara nk’abafirozofe ariko icyo ntabura kuvuga cyo nuko niba ari nabyo yiganye ntibyamuhiriye kuko nta firozofiya yo gukoresha umuntu nka Bamporiki ngo arahagararira rubanda arimo kuyitegeka kugendesha amavi imbere y’abidishyi kuko byibuze filozofe yo ku mwisho hari ubwo itanga ibisubizo bizima, ariko ibya Bamporiki byo ahaaa ntacyo mvuze mwese ntituri kumwe reka turebe!

Ese buriya nka Bamporiki wahawe uriya mwanya kubera amafuti amazemo iminsi yamarira iki abanyarwanda? Buriya murabona aho Depute nka Tuyishime avuye hamwe n’abandi kubera kutihanganira guceceka akarengane kavuza ubuhuha murabona Bamporiki yatinyuka kuhavugira iki? Ubundi umuntu yabanje kugutamika biragoye kumunenga kereka wabanje gucira ibyo watamitswe, ikibazo ni uko bajya no kubimenya ibyo bamaze kwangiza ari byo byinshi.

Banya-Kigali murabe maso muragenda mushishoza mu mihanda, impumyi murazigwije hato batazabamara mugira ngo barareba. Bwana Depute Bamporiki urubyiruko tukwakirije induru.
Urapfe neza urwo wipfira utitwaje abana n’urubyiruko rw’u Rwanda.
Urahahe neza uronke ngaho garama mu mizinga y’imodoka nakubwira iki, ariko ntiwibagirwe ko watamiye irobo numira rikagera mu mihogo nyakubahwa agakurura nanjye nzakubwira ijambo rya nyuma.
Kora nakubwira iki ariko ujye wibuka no guta akajisho kuri iyo rwa gakoco ikugenda iruhande.
Niba kandi udasobanukiwe ibyo mvuze reka nkubere imfura nkurangire uwo uzajya kubaza, kandi kuko njye nkurusha ubunyangamugayo ndanakurangira uwa hafi yawe wakwishyikiraho ukamubaza irikuvuna umutima.
Uzanyaruke usure Bisengimana Elise azakubwira iryakuvura umutima uzasanga atari wowe mfura mu bacinyi b’inkoro. Icyakora ushobora kuba mu banyuma ariko nturi mu b'imbere.
Sinjye wahera, ubwira uwumva ntavunika, niba wumva wumvise.
Dore lisiti y'abagiye gukomeza guhuhura rubanda bakomereza aho bene wabo bari bagejeje, Honorable Depute Bamporiki Honorable ku nomero ya 21:

FPR Inkotanyi n’indi mitwe byifatanyije (PDC, PPC, PDI na PSR)

1. UWACU Julienne
2. MUTIMURA Zeno
3. MUKANDUTIYE Spéciose
4. SEMASAKA Gabriel
5. KANKERA Marie Josée
6. KAYIRANGA Alfred
7. KAYITESI Libérata
8. MUKAMA Abbas
9. KAYITARE Innocent
10. MURUMUNAWABO Cécile
11. MUSABYIMANA Samuel
12. MUKARUGEMA Alphonsine
13. KABONEKA Francis
14. MUKAZIBERA Agnès
15. RWIGAMBA Fidel
16. MUKAYUHI RWAKA Constance
17. MUKAYISENGA Françoise
18. BARIKANA Eugene
19. RUCIBIGANGO Jean Baptiste
20. MUREKATETE Marie Thérèse
21. BAMPORIKI Edouard
22. KANTENGWA Juliana
23. NYANDWI Désiré
24. BWIZA Connie
25. GATABAZI Jean Marie Vianney
26. MUKABAGWIZA Edda
27. RUKU RWABYOMA John
28. MURESHYANKWANO Marie Rose
29. MUDIDI Emmanuel
30. NYIRASAFARI Esperance
31. KAREMERA Thierry
32. MPORANYI Théobald
33. MWIZA Esperance
34. KARENZI Théoneste
35. TENGERA TWIKIRIZE Francesca
36. NYIRABEGA Euthalie
37. SEMAHUNDO NGABO Amiel
38. NYIRABAGENZI Agnes
39. MUKAKARANGWA Clotilde
40. HABIMANA Saleh
41. BEGUMISA Théoneste SAFARI

PSD

1. NKUSI Juvenal
2. MUKAKANYAMUGENGE Jacqueline
3. MUKANDASIRA Caritas
4. BAZATOHA Shyaka Adolphe
5. NIYONSENGA Theodomir
6. NYIRAHIRWA Veneranda
7. RUTAYISIRE Georgette

PL

1. MUKABALISA Donatille
2. BYABARUMWANZI Francois
3. KALISA Evariste
4. MUKAMURANGWA SEBERA Henriette
5. MUNYANGEYO Theogene

Abadepite bahagarariye abagore

Umujyi wa Kigali
1. MUKANTABANA Rose
2. UWAYISENGA Yvonne

Intara y’Iburasirazuba
1. MUJAWAMARIYA Berthe
2. NYIRAGWANEZA Athanasie
3. MUTESI Anitha
4. UWIMANIMPAYE Jeanne d’Arc
5. MUKANDERA Iphigénie
6. MUKARUGWIZA Annonciathe

Intara y’Iburengerazuba
1. NIKUZE Nura
2. MANIRORA Annoncée
3. MUKANDEKEZI Petronille
4. NYINAWASE Jeanne d’Arc
5. UWAMAMA Marie Claire
6. MUKABIKINO Jeanne Henriette

Intara y’Amajyaruguru
1. NYIRAMADIRIDA Fortunee
2. UWAMARIYA Devota
3. MUKAYIJORE Suzanne
4. KABASINGA Chantal

Intara y’Amajyepfo
1. MUHONGAYIRE Christine
2. MUKANYABYENDA Emmanuelie
3. IZABIRIZA Marie Mediatrice
4. GAHONDOGO Athanasie
5. NYIRARUKUNDO Ignacienne
6. UWANYIRIGIRA Gloriose

Abadepite bahagarariye urubyiruko

1. UWIRINGIYIMANA Philbert
2. MUKOBWA Justine

Umudepite uhagarariye abafite ubumuga

1. RUSIHA Gaston

Ernest Senga
Urubyiruko ku Ijwi Rya Rubanda.

AMASHYAKA YA OPOZISIYO AKORERA HANZE Y’URWANDA ABAYE URW’AMENYO

Ngaho Abaseka nimuseke;
Abishimira ibyago by’abandi nabo nababwira iki?
Abazi gukina mu bikomeye namwe umwanya n’uwanyu;
Abishongozi n'abazi kuvuga imvugo nyandangazi namwe simbabujije nimukomeze mwinezeze;
Abateretse imivinyu na za divayi ku meza ku migabane y’Iburayi na za Amerika muryoherwe;
Abatuye muri Australia ku ifaranga rya Centrelink nababwira iki ntimugacikwe;
Abagenza amamodoka ahenze muryoherwe niraha n’iminyenga
Namwe abirongoreye abagore b’ibizubazuba nababwira iki nimuberwe;
Ababyaye abana beza b’ibitangaza, Rurema nasingizwe we wabagabiye;
Abiga amashuri nimukomereze aho.

Namwe bari mu Rwanda banyarwanda rubanda rugufi nimwihanganire uwo mushike;
Abirirwa birukankana na police na rukodifensi n’agataro k’uduconcho nimwihangane ntimucike intege;
Kwiheba nirwo rupfu, banyeshuri bakatiwe buruse mwe!
Erega nta joro ridacya!
Bashoferi b’umwuga wo gutwara abagenzi: nta mvura idahita;
Namwe mwese abifashe ku itama mureba aho uyu mukino wa FPR werekeza nimukure urushyi ku munwa n’akaboko ku itama;
NTAGANDA BERNARD komera komera byikubye inshuro nyinshi NTWARI YANZE GUTINYA AHO ABANDI BAGABO NKAWE BATINYA KUGEZA; VICTOIRE INGABIRE HUMURA MAMA NYIRABABYEYI mudahemuka wowe wanze guhemuka kuko uzi neza ububabare bw’ikiremwamuntu kuko uri umubyeyi;
DEO MUSHAYIDI ni WOWE MFURA ABANDI BAZAKWIGIREHO KUKO WANZE KURYAMIRA UKURI UHITAMO KURYAMIRA UBUGI BW’INKOTA.

Dore aho ruzingiye rero:

Nkimara gusoma no kubona ifoto yerekana uko Bernard Ntaganda bamugize, yanteye kwibaza byinshi bitari nka bya bindi bya wa mugabo. Ntekereza ko hari ibyo tutitaho kuko tutaba twabimenye, ibyo dukinamo kuko tutabizi, cyangwa ibyo tutemera kuko tutaba twabibonye, ariko noneho iyi foto iragaragaza kandi irasobanura byinshi abanyarwanda batagakwiye gukomeza gukinamo no kwirengagiza.
Ibi biteye isoni n’ikimwaro ku muntu wese w’umunyarwanda wiyumvamo ko asangiye ubwo bunyarwanda na Bernard Ntaganda na Deo Mushayidi na Ingabire Victoire.
Niko ye, muratekereza se ko ruriya rugamba bahagurukiye bari bari kururwanira abana babo na ba se na ba nyina cyangwa ni urukundo bakundaga twese abenegihugu nkabo kugira ngo barebe ko twava kuri iyi nkenya y’ingoyi ya FPR?
Reka mbabwire.
Umuntu wese ushyira mu gaciro uyu waba umunsi we wa nyuma wo GUHERANWA N’UBWOBA ukaba n'uwa nyuma wo GUKOMEZA GUTERA INTAMBWE ARIKO ZITAVA AHO ZIHAGAZE.

Reka turebe uko byagenda.

Ndacyakomeza kwikoma amashyaka ya opozisiyo cyane cyane akorera hanze y’Urwanda kuko nkuko tubizi niyo afite inshingano zo kwigisha no kwereka abanyagihugu uko bakwiye kwibohora ingoma mpotozi nkiyi ya FPR.
Sinje kubagaya ko batazi kuvuga. Oya ye, kuvuga byo barabizi wabarega ikindi.
Ikibazo nyamukuru ni uko bavugira aho bicaye ariko batanyeganyega ngo bave aho bari nta rugero rwiza bereka abanyarwanda kugira ngo bose babe bahaguruka ngo bayayoboke nabo bashyireho umusanzu wabo.
Tubyumvikane neza ko ntagaya ibyo dukora kuko nanjye naba nisenye, ahubwo ndagira nti ibi dukora twagakwiye kubikora ariko na byabindi ntitubireke kuko niho imbaraga nyakuri zizaturuka kandi mu by'ukuri azaba ari igitego kitishyurwa gitsinzwe ku munota wa 89 hasigaye umunota umwe gusa ngo umukino urangire.

Aya mashyaka nakunze kuyanenga kunanirwa gufatanya kandi sinjye njyenyine ubibona gutyo.
Uburyo yatangiye yasaga n’igisubizo rubanda igiye guheraho yibohoza ariko ubu mu by'ukuri amashyaka niyo kibazo nyamukuru aho kugirango abe ariyo aba igisubizo.
Mu kuyumvikanisha neza uko ari reka mbahe urugero rw'uko nyagereranya:
Amashyaka ya opozisiyo zo hanze nyagereranya nk’amabuye bashyize hagati mu mazi mu mugezi muto wambukwamo n'abantu benshi ariko udafite iteme (ikiraro/bridge/pont). Kenshi ayo mabuye ngereranya n'aya mashyaka bayashyiramo kugira ngo abantu bajye bayisunga bambuke amazi batarinze kujoma no kuvanamo inkweto no kwirinda kwiyanduza. Ariko ibibazo bijya bibaho ko ayo mabuye iyo atinzemo azana urubobi (ibintu bisa n’ibara ry’icyatsi kibisi binyerera cyane) noneho iyo umuntu ayatarukiyeho akayisunga nk'uko byari bisanzwe ahubwo niyo amugushamo kurusha kuyakandagiramo kuko noneho agwamo wese iyo anyereye kuri ya mabuye.
Ninako bimeze muri aya mashyaka rero y’ubu.
Aho kugira ngo yigishe abanyarwanda kwiyunga ahubwo araducamo ibice ugasanga ishyaka rigiye rishingiye ku bantu bagiye bifitiye gusa ibyo bahuriyeho.
Nta kuntu amashyaka yabasha kwigisha rubanda UBWIYUNGE NAYO UBWAYO YARABINANIWE kwiyunga.
Ntibakwigisha guhuza imbaraga nabyo ubwabo byarabananiye.
Ntibakwigisha rubanda Ubworoherane nayo ubwayo butayarangwamo.
None se hanyuma y’ibyo ikindi bakwigisha abanyarwanda n’iki usibye kubeshya?
Urugero baha abanyarwanda ni uruhe uretse kwihagararaho mu mafuti?
Ngo kwigisha rubanda akarengane bagirirwa? Ese mutekereza ko murusha abanyarwanda kumenya ko barengana? Ibyo sibyo bakeneye kumva kuko hafi ya byose barabizi n'ubyirengagiza aba abibona.
Uruhondogo ruri hanze aha ngo radiyo izumvikanira mu Rwanda! Ariko ye cyakora muzi gusetsa gusa!
Simbigaya si nabibi iyo biza kuba nkuko byatangiye.
Icyo nzi ni uko hari ishyaka rimwe ryatangiye icyo gitekerezo kandi cyari cyiza kuko iyo radio yari gukoreshwa na opozisiyo zose. Ariko wagira ngo hari abashinzwe gutegurira abandi imishinga... mu gitondo numvise amashyaka hafi ya yose atagituma rubanda isinzira ngo inkunga ya radio... Ayiga we ibyo byo ndabisetse.
ESE ABATURAGE BURI WESE AZAJYA YIGISHA MUZABAGABANA GUTE RA? Harahagazwe, ngo kubagezaho amakuru? mukuyehe se ko aribo bayafite bo bari mu Rwanda! Ni ukubasaba amakuru mukongera mukayabasubiza? Ayigawe! Cyakora mugani wa wa mugabo WASETSA MASHYAKA YA OPOZISIYO!!!

REKA NJYE MBEREKE UMWANZI WA OPOZISIYO.
1. Umuntu wese cyangwa umuyobozi w’ishyaka udashishikajwe no gukorana n’ayandi mashyaka.
2. Urya uhora asongereza abandi abibutsa ibyaha bo ubwabo bamwibwiriye bicuza ariko akabihindura intwaro yo kumucecekesha burundu.
3. Wa muntu wumva ko we ari umunyambaraga utagomba no gufasha abanyantege nke ngo nabo bamugirireho ingufu. Ese mugenzi wawe we akomeye kubera wowe hari icyo waba uhombye? Kwikunda weee!
4. Ba bantu bakifuza kugoreka amateka bayerekeza aho bumva ko yabarengera cyangwa akabakura mw’ipfunwe.

Reka ngire icyo mvuga kuri izo ngingo 2 za mbere:
1. Umuyobozi w’ishyaka udashishikajwe no gukorana n'ayandi mashyaka ashatse we yatanga ibitabo. Uwo ntakenewe muri ibi bihe. Ntabwo twirengagije ko hari bamwe bagira misiyo zo gusenya abandi. Nibyo koko twarabibonye na nubu ntawashidikanya ko biriho. Ariko se niba tudashoboye gufatira ibyo bibazo ingamba no kubishakira umuti ibindi byo tuzabikemura gute kabone ko niyo iryo shyaka ryafata ubutegetsi ritazabura abarirwanya? Ubwo byo bazajya babyitwaramo gute?
Nge kubwange numva ko gukorana kw’amashyaka ariko kwatuma n'abo bantu batahurwa vuba. Nuko Kagame atifitiye umubiri ubyibuha naho ubundi rwose kudahuza kwanyu ntibijya bibura no kumwongeraho nk’ibiro 2 byibuze iyo bibaye bike.

2. Aha ndavuga ku bantu birirwa basebanya ku bantu bamwe bafite ibyaha bakoze ariko bakaba bifuza gufatanya n’abandi banyarwanda gushaka umuti w’ibibazo bitwugarije.
Aha hari ikibazo nkunda kwibaza namwe munyumvire. Umuntu araje akoze ibyaha (tuvuge nka biriya by’ubwicanyi mu bahoze muri FPR kuko njya mbona aribyo dukunze kuvugaho) noneho umuntu arakoreshejwe cyangwa se nashake abe yabyikoresheje, noneho ageze aho yumva ko atari mu murongo nyawo, ubwe afashe intambwe yo kubyivugira - ibyo twita kwatura - noneho arangije kubikubwira mu gitondo mutangiye ku mugendana ku munwa niwe uhindutse inkuru ku musozi.
Ese murumva atazanasubira inyuma akibaza impamvu yabivuze? Ese undi we icyaha nk'icyo kiri kurya ku mutima azashobora ate kwatura ibimurimo mu gihe abona ababikoze mbere byarabagejeje habi?
Harya ngo Kagame yemeye kwihana mwamubabarira mugafatanya kubaka igihugu? Wese ntareba uko mugaraguza agati abagerageje kubyatura? Agahitamo gukomerezamo volume yose ngo uwakojejemo ukuboko n'ubundi akurangirizamo!
Aha naho iyaba iyo mpuzamashaka yakabayeho, iki kibazo yakigaho maze abazabirengaho nibo tuzajya dufata nkabafite undi bakorera.
Nimureke abantu babone umwanya bature, bavuge ibibarimo, ibyo bakoze nibyo bakoreshejwe baruhuke imitima. Nimugire umwaka w’imbabazi, muhe abantu uburuhukiro namwe niho Imana izumva ibyo muyisaba.

Reka ngaruke ku nkuru nyirizina.
Niko ye, kera ko najyaga numva, nako da ko njya numva ko ngo kera iyo umugabo yajyaga ku itabaro yarabyaye umuhungu yagendaga afite ikizere ati sinzaherayo aho umwana wanjye azakurira azancungura bikaba ibyiza byo kubyara, ubu twe ibyiza byacu byo kubyara, byo gutunga, byo kwiga ni ibihe?
Ese ye, ubu aba bantu navuze tugitangira baboreye muri za gereza zo mu Rwanda badutekerezaho iki?
Ese mashyaka mwe, ko ntarumva hari n'umwe uboherereza ubutumwa byibuze ababeshye ngo mukomere mutugaye gutinda ntimutugaye guhera...?
Niko mwa mashyaka mwe ubu umugabo yabyaye abana nkamwe ntiyazaborera ku itabaro nk'uko ba Ntaganda, Victoire, Mushayidi... barihezeho?
Rubyiruko mwe, nimuteguka ngo muhagarare bwuma murebe ko hari ibyo mwakiza, nidukomeza kwiringira aba basaza turariraye. Nzaba mbarirwa ejo hazaza hanyu!
Nimucyo twihagurukire. Niba se banze kuturaga u Rwanda rwiza twifuza, natwe twiyicarire nkaho bitatureba?
Iyo so akwanga akuraga urubanza rwamunaniye.

Umwanzuro:
Mu kwanzura iyi nkuru yanjye ndaha buri wese umukoro:

1.Mbese umuntu abataye mu mwobo muri abantu babiri bari basanzwe batabanye neza, noneho akawubatamo ariko yiteguye no kuzaza kubiciramo, byaba ari iby’ubwenge ba bantu babiri bagezemo bagatangira kurwana bapfa ibyo bari basanzwe batumvikanaho mbere bakiri ku musozi w’iwabo? cyangwa bapfa inabi bagiriraniye?
Njye ku bwanjye numva ko babanza bagashyira hamwe bakareba uko bafashanya bakwikiza uwo mwobo noneho bamara kuwuvamo bashaka bakisubirira ku byo bapfaga nta kibazo ariko situation yo kuba mw'uwo mwobo bategereje kwicirwamo yo yakagombye kubaha umwanya wo kubanza guhuza noneho ibindi bikazaza nyuma.
Wowe ubyumva ute?

2. Tubaye turi babiri tugenda tugahura n’intare turi babiri ahantu hatwenyine ariko iyo ntare ikaza ishaka kutwica, ariko dufatanije tukaba twashobora kuyirwanya tukayitsinda, noneho urumva intare itangiriye kuri njye wowe wajyaho ugatangira kwicinya icyara uti sha n'ubundi wajyaga unsambanyiriza umugore banza wumve? Kandi nindangiza ari wowe iri buze gukurikizaho?
Oya. Njye uko mbyumva, n'ubwo dufite ibyo dupfa twabanza tukarwanya ya ntare noneho byarangira twashaka natwe tukaza twafatana ubwacu nta kibazo ariko ikibazo cya ya ntare twakirangije.
Wowe ubyumva ute?

Nuko rero nimumenye neza ko uwiteguye kubasya we ari tayari kubikora kandi afite uburyo bwose bushoboka bwo kubigeraho, kandi gutatanya imbaraga kwanyu ni ukumuha urwaho rwo kujya yikoreramo akuramo umwe umwe uko abishaka. Ahasigaye ni ahanjye nawe.

DUSENGE:
Mana yo mw’ijuru umva amarira y’abanyarwanda
Mana yo mw’ijuru umva amarira ya Bernard Ntaganda
Mana yo mw’ijuru umva amarira ya Ingabire Victoire
Mana yo mw’ijuru umva amarira ya Deo Mushayindi
Umva ay’aba banyeshuri n’abashoffeur
Umva ay’abacuruzi buduconsho
Umva amarira y’abasenyewe amazu badafite undi batakira
Mana umva amarira yacu urubyiruko rw’Urwanda rw;ejo hazaza
Mana umva amarira y’abahombejwe imitungo yabo n’uburiganya bwa FPL
Mana umva amarira y’abatindi nyakujya batagira epfo naruguru nkuko nanjye nahoze.
Mana umva amarira y’abanyarwanda bose bari ishyanga
Mana babarira abanyarwanda unabigishe kubabarira abandi
Mana huza amashyaka ya opozisiyo akomere nk’icyuma
Hishurira abanyapolotike n’abanyamakuru ibanga ryo kubabarira kuko ariryo rikubiyemo kubabarirwa
Dufashe kwemera abandi kugirango natwe tube twemewe
Fasha uwibwira ko ahagaze kugirango atirarira maze nawe akagwa.
Tuzajya tugutura ibitambo tukuvugire ibyivugo duhigure imihigo buri gihe uko umwaka utashye niwongera kudusubiza muri gakondo yacu nkuko Mana nabikurahiriye, kandi nzakomeza kurwanira iryo shyaka.
Nsengeye nibi nanditse kugira ngo bizafashe abantu kwemera kugirango wowe ubahindure imitima.
Mw’izina rya Data wa twese
Niry’umwana (roho)
N’umwuka wera( mutagatifu)
Amen.

Ernest Senga
Urubyiruko ku ijwi rya rubanda.

Rubyiruko Bavandimwe namwe bakunzi b'ikiganiro cy'urubyiruko turabasuhuje kandi nkomeje kubashimira uburyo mukomeza guhererekanya amakuru nabagenzi Banyu bo hirya no hino, biragaragara ko Urubyiruko rw'U Rwanda rumaze kumenya noneho ikerekezo cyabo cyejo hazaza, nimukomereze aho rero dukomeze dushyireho akacu mu kwiyubakira urwatubyaye.
Ejo rero ku cyumweru saa saba y'I Londres na saa14:00 y' I Paris tuzaba dufite ikiganiro endirect/alive kizaba giteye amatsiko adasanzwe kuko tuzacubukurira aho twari tugeze ku cyumweru gishize, murabizi ko impaka zabaye nyinshi tugasezerana ko tuzagicumbukura ku cyumweru le01/09/2013.
Tuzaba dufite umushyitsi Padiri Thomas umwe mu banyapolitike baba Jeunnes. Azaba ahri kuganira na mugenzi wacu Musonera nkuko yari yabyifuje. kugirango amusubize ku bibazo yibaza njye ntekereza ko hari nabandi benshi bazaba bagize amahirwe yo gusubirizwamo nabo aho bari batumvishe neza.
Turabararitse rero n'ibitekerezo byubaka n'inamazanyu birakenewe.
Abifuza guhamagara rero muri studio bazakoresha ubu buryo:
Duhamagare kuri:
Tel fixe: +1 330 303 4200 (USA)
Tel fixe: +44 208 133 4417 (UK)
Skype: IjwiRyaRubanda

Twandikire kuri:
Email: ijwiryarubanda@ijwiryarubanda.com
cyangwa: Twandikire
Ernest Senga.

Nimugire amahoro na none Rubyiruko, nshuti bakunzi b'urubyiruko, babyeyi bacu mwatureze kandi na nubu mukiturera.
Mbanje gushimira by'umwihariko abagize uruhare mu kiganiro cy'umunsi wejo ku cyumweru le 25/06/2013 kuri radiyo ijwi rya rubanda, ari abatanze ibitekerezo, ari abagiteze amatwi by'umwihariko na Bwana Simeon Musengamana,
Reka Nshimire by'umwihariko:
Bwana Jean de Dieu M.
Musonera
Jean M
Alex D
Nepo T.J
Emmanuel M.
Aba abagenzi bacu batanze ibitekerezo byiza cyane byubaka mu kiganiro cy'umunsi wejo hashize. Nubwo inzira ikiri ndende ariko byibuze hari ikizere ko mu rubyiruko hari bamwe bakiranganywa umutima wo gukunda urwababyaye Ingobyi yaduhetse twese, reka mbonereho nanone numwanya wo gushima uyu mugenzi wacu Mounana Jean ku muvugo mwiza yasoheye ugaragaza ko hari bamwe mu rubyiruko banze burundu kuzagirwa abacakara mu gihugu cyabo ndetse barahiye kutazashyigikira abayobozi bakoresha irondakoko n'irondakarere mu kugirango bakomeze biryanishirize abaturage maze babone uko babayobora.
Babyeyi turabasaba inkunga, byibuze yo gukangurira abana Banyu kwitabira byibuze iki kiganiro, babaze ibibazo uko babyifuza, mubareke rwose bicarane kuri Radiyo namwe, maze batege amatwi, bumve ibitekerezo by'urubyiruko rw'abanyarwanda ruri hirya no hino kw'isi.
Reka ndangize nunga mu rya mugenzi wanjye ngo Nidukomeza gukina politike y'iryinyo ku rindi mu Rwanda hazuzura ibihanga.
Mugire amahoro nyakuri amwe asesuye azira ubwironde.
Ernest Senga.
Urubyiruko ku Ijwi rya Rubanda.
bimemarc@yahoo.com
FCBK: Urubyiruko Ijwi rya rubanda.