Kuri iki cyumweru nkuko bisanzwe guhera i saa moya kw'isaha y'i londre, tuzabagezaho ikiganiro cy'urubyiruko, ni ikiganiro nkuko mumaze kubimenyera gikorwa n'urubyiruko, aho ruganira ku ngingo zitandukanye zireba urubyiruko nyarwanda by'umwihariko n'afrika yose muri rusange. ni ikiganiro muba murarikiwe mwese gutangamo ibitekerezo bitavuze ko cyitabirwa n'urubyiruko gusa, ahubwo buriwese wumva afite icyo ashaka kurusangiza arisanga, akaba ariyo mpamvu tudahwema kubararikira mwese kwitabira iki kiganiro bityo turusheho kubaka societe y'ahazaza heza hubakiye k'umuco n'ubwubahane nkuko twabihoranye. muri iki kiganiro tuganira byinshi ni muri urwo rwego kuri iki cyumweru tuzaganira k'umuco wo gusoma no kwandika m'urubyiruko rw'ikigihe.

Iyo witegereje imibereho y'abanyarwanda ndetse n'abanyafrika benshi muri rusange ni abantu bakunda kurangwa no kudasoma cyane, byumvikane iyo tuvuze gusoma ntituba dushaka kuvuga kumenya gukurikiranya ibihekane, inyuguti neza nkuko wabyigishijwe na mwarimu cg ngo bibe gusoma amasomo uba wahawe n'abarimu; ahubwo icyo dushaka kuvuga aha ni ugusoma ibitabo bisanzwe haba ibyandika ku mateka, ubuzima, ubumenyi bwisi, inkuru, byenda gusetsa, uturingushyo, inyandiko z'urukundo bakunze kwita za roman, inyandiko zikubiyemo ibitekerezo byagiye byandikwa n'abantu babahanga, ubuhamya ku mibereho y'abantu hirya no hino kwisi,...
biratangaje kubona umuntu warangije kaminuza umubaza niba hari igitabo yaba yarasomye akaguhakanira, wamubaza impamvu aka kubwira ko atabona impamvu yabyo ngo kuko ibyo aba yarasomye yiga biba bihagije. mu kiganiro cyacu rero turaza kwibaza ibi bikurikira:
1.(a)Ese ko kuba umuntu yasoma ibitabo bitajyanye n'ibyo yiga nta nyungu zaba zirimo?
(b)urubyiruko rw'ikigihe rwaba rutozwa rute umuco wo gusoma?
(c)uruhare rw'ababyeyi, leta ni uruhe mu gutoza abana gukunda gusoma?
2.ntitwavuga gusoma ngo twibagirwe kwandika, ese koko twaba dufite abanditsi? abifitemo impano zo kwadika inyandiko zabo zijyahe?
3.(a) ikibazo cy'ururimi, iki nacyo ni imwe mu mpamvu usanga zibangamira uyumuco wo gusoma aho usanga abanditsi bacu bandika mu ndimi z'amahanga bityo abataragize amahirwe yo kuzimenya bakabura ayo mahirwe yo gusoma.
(b)amasomero adahagije n'ahari nayo ugasanga atagira ibikenewe.
(c)ese birakwiye ko hakomezwa kwandikwa mu ndimi z'amahanga?
4.hari abacibwa intege no kwandika kuberako ntanyungu babonamo, nyamara iyo urebye mu bindi bihugu uyu ni umwuga ukiza benshi, ese kwandika byakorwa gute ngo bivemo inyungu kandi bigirire n'akamaro societe muri rusange?

birumvikana ko hari byinshi nawe waba wibaza kuri iyi ngingo, ni mu kiganiro maze ugahamagara kw'ijwi rya rubanda ukoresheje uburyo butandukanye nk'ibisanzwe tukaguha ijambo.
ushobora kuba uri umwanditsi ukaba ubura uko wageza kubanyarwanda inyandikozawe, wifitemo impano ukaba warabuze ukowayigaragaza,ukunda gusoma ariko ukaba utabona inyandiko mu kinyarwanda,... hamagara mu kiganiro tuguhe ijambo maze abanyarwanda aho bari hose bagufashe cg umenyekanishe impano yawe.

abazungu bo baciye umugani ngo ushaka guhisha umunyafrika arandika, ese koko tubireke bibe impamo !!

Dukomeze tubifurize kugubwa neza nshuti bakunzi b'ikiganiro cy'urubyiruko, nkuko mwabikurikiye mu cyumweru gishize twabibukije ko kuri ikicyumweru tuzagaruka ku ngingo twasubitse mu byumweru bibiri bishize, aho twaganiraga ku ngingo y'ababana bahuje ibitsina (abatinganyi).
mu kiganiro cyacu habaye impaka ndende ahanini ku kibazo cy'uko ababantu baba ariko bavuka. bamwe bavugaga ko atariko biri ndetse bakifashisha na science, abandi nabo bakomeje gushimangira ko atari bo babyigira ko ahubwo bivukanwa.
ni muri urwo rwego rero tuzabigarukaho turebera hamwe ese koko aba bantu barabivukana ? cg koko nibo babyikira kubera impamvu zitandukanye(societe, ubuzima, kwigana,...) .

Mu kiganiro kandi tuzagerageza kwibaza no kungurana ibitekerezo ku bibazo bikurikira:
(1).abantu benshi bashigikiye ibi bintu bifashisha amategeko agenga uburenganzira bwa muntu, aho bavugako umuntu afite uburenganzira bwo guhitamo no gukora icyo ashaka mugihe kitabangamiye abandi, ese aba bantu hari icyo babangamira? kuburyo byaba impamvu yo kubamagana .

(2).nubwo hari abagiye bavugako ko bibiliya atari itegeko nshinga rigenga isi ariko ntawakwirengagiza uruhare rwayo mu mibereho ya kimuntu kuri iyisi, dore ko nabashigikiye ubutinganyi usanga bashingira kucyo amategeko (constitution) z'ibindi bihugu ziteganya kandi akaba atari zo zikwiye kugenga isi (ibihugu) byose, niyo mpamvu tuzakomeza kwifashisha icyo bibiliya ivuga.

(3).waba wemera ko kubaho k'ubutinganyi mu Rwanda ari ukwangiza umuco ? gutora amategeko abirwanya ubibona ute ?

(4).dusoza ikiganiro tuzibaza icyerekezo(vision) cy'igihugu cy'abatinganyi, aha tuzagerageza kubihuza n'imibereho ya burimusi y'abanyagihugu mu nzego zitandukanye, uburezi, ubukungu,....

nkuko bisanzwe ikiganiro ni icyanyu bityo mukaba muhamagariwe ku kigiramo uruhare mutanga ibitekerezo byanyu nk'uko bisanzwe mukoresha uburyo bwo guhamagara muri studio kuri numero zacu arizo: +13303034200 USA, +442081334417 UK ndetse na skype ijwiryarubanda .

Mbanze mbifurize umusi mwiza w'abakundana (saint valentin) kuri mwese abakunda n'abakundwa.
kuri uyu wa gatanu le 14/02/2014 ni umusi ngaruka mwaka, aho abantu hafi yabose kwisi bizihiza umusi w'abakundana , kuri uyumusi inkumi, abasore, abagabo n'abagore bibuka ibijyanye n'urukundo ari nabwo bahana impano zitandukanye mu rwego rwo kwishimira uwo musi. kuri uyumusi kandi bamwe mubaba batari bameranye neza m'urukundo rwabo baboneraho kongera kwiyunga bityo bagakomeza urukundo rwabo, mu bihugu bitandukanye uyumusi wizihizwa k'uburyo butandukanye, by'umwihariko mu bihugu byacu (u Rwanda n'Uburundi) muri iyimyaka nk'icumi ishize nibwo usanga abantu baragiye babyitabira cyane kuruta mu myaka ya kera. ubu usanga urubyiruko ruba rwa byitabiriye cyane, ndetse ugasanga bifata n'abandi bo muyindi myaka (abasheshe akanguhe).

ni muri urwo rwego rero natwe nk'urubyiruko twifuje kuzaganira kuri uyumusi mu kiganiro cyacu, cyanyu cy'urubyiruko kw'ijwi rya rubanda. tuzarebera hamwe amavu n'amavuko y'uyumusi, uko watangiwe kwizihizwa n'impamvu wizihizwa kuri uyumusi ndetse n'igituma bawita saint valentin.

tuzafatanya kandi kureba icyo uyumusi waba usiga m'ubuzima bwa buri muntu, birumvikana ko buriwese afite ubuhamya cg se igitekerezo ya bitangaho ukaba rero urarikiwe kwitabira ikiganiro nawe ugafatanya n'urundi rubyiruko ndetse n'abakurikira radiyo ijwi rya rubanda ibyiza by'uyumusi.

ntituzareba gusa uko abantu baba bahana indabo cg izindi mpano zitandukanye gusa, ahubwo tuzanareba uko abakundana barushaho gushimangira urukundo rwabo kuri uyumusi w'abakundana bityo ntibibe iby'uyumusi gusa ahubwo bibe ibyiteka ryose dore ko ariko urukundo nyakuri rwagakwiye kumera.

muri ikikiganiro cyacu tuzareba ibintu bimwe nabimwe by'ingenzi abakundaba baba bakwiye kwitondera mugihe bari m'urukundo, kuko usanga akenshi abantu babyirengagiza , bakagendera kuri ya mvugo ngo urukundo ni impumyi cg ngo urukundo ntirugira condition bityo ugasanga ntibagejeje ku ndunduro urukundo rwabo, ndetse bamwe bikabaviramo kubabara bitaretse kuzinukwa icyitwa urukundo.

ushobora kuba ufite uwo ukunda, cg se uwo wigeze gukunda ukaba ushaka kugira icyo umubwira, k'umutura akaririmbo se cg no kumusuhuza, umwanya ni uwawe kuri iki cyumweru nkuko bisanzwe mu kiganiro cy'urubyiruko guhera i saa moya (19h00)GMT, 20H00 PARIS,BRUSSEL..., 21H00 RWANDA,23H00 MOSCOW.

rubyiruko, bakunzi bakundwa uyu ni umwanya wanyu kuri radiyo ijwi rya rubanda ... abazi imitoma nababwira iki.

Ni kuri iki cyumweru intwari yaharaniye ukwishira ukizana kw'abirabura bo muri afrika yepfo bari barakandamijwe n'ingomba ya bagashaka buhake(apartheid) yashinguwe kw'ivuko i kuno. Nerson Mandela watabarutse le 5/12/2013 ku myaka 90 isi yose izahora imwibukira kuri byinshi, ibyingenzi ni: Ubumwe n'ubwiyunge, Amahoro, kwicisha bugufi, kudacika intege, gukunda igihugu, kugira ishyaka,... Mandela wabaye uwambere mu kuyobora afrika yepfo y'ubwisanzure akaba ari nawe mwirabura wambere wari uyo boye icyo gihugu cyaranzwe n'ivangura rikomeye ryibasiraga abirabura yageze kuri byinshi, gusa ngo ntabyera ngo dee !! Nerson Mandela bivugwa ko yaba atarabashije kuzamura imibereho y'abirabura kugeza ubu usanga aribo bakiri inyuma cyane m'ubukungu ugereranyije n'abazungu. Bivurwa kandi ko amasezerano Mandela yaba yaragiranye n'abazungu mw'irekurwa rye yaba yaremereraga abirabura ubuyobozi ariko ubukungu bukiharirwa n'abazungu,Mandela kandi ngo yaba atarahaye agaciro ikibazo cy'icyorezo cya sida ubu gikomeje kumara abantu muri kiriya gihugu. ibi hakaba hari aba bibona nk'inenge. ANC yo mugihe cya bagashaka buhake n'iyubu byaba bitandukaniye he? ese yaba yaratezutse ku ntego yatangiranye? umurage wa Mandela kuri afrika ni uwuhe ? ese amagambo, ibikorwa asize kw'isi urubyiruko rw'ubu rwaba rwiteguye rute kubikurikiza. ni mu kiganiro cy'urubyiruko cy'uyu musi kw'ijwi rya rubanda.

Isi yose by'umwihariko abanyafrika ubu bari mugahinda gakomeye nyuma yo gutakaza intwari ntagereranywa yarwanyije ubutegetsi bwa ba mpatsibihugu ndetse akanaharanira ukwishira ukizana kw'abanyafrika, abirabura by'umwihariko.
Intwari ntagereranwa Nelson Mandela utabarutse ku myaka 95, niwe wabaye perezida wambere w'umwirabura w'afrika yepfo, nyuma y'inzira ndende, iruhije ntiyigeze yiganda ngo atererane abanyagihugu n'abirabura bose muri rusange. mu kiganiro cyacu rero natwe nk'urubyiruko twifuje kuganira kuri uyu mukambwe w'aranze amateka y'afrika. ntidushidikanya ko hari byinshi twamwigiraho, ni muri urwo rwego mu kiganiro cyacu tuzaba twibaza tuti ese :
1.Umukambwe Madiba nkatwe urubyiruko rw'abanyarwanda n'abarundi tumuziho iki ? adusigiye iki ?

2.Ubutwari bwa muranze kuva mu myaka ye y'ubusore arwanya ivangura moko ryari riri mu gihugu cye byatwigisha iki muri ikigihe usanga ibihugu byacu nabyo bitorohewe n'shyamirana rishingiye k'uko umuntu aba yaravutse.

3.Ese koko ibyo Madiba yaharaniye kugera aho ashirwa m'umunyururu urubyiruko twaba tubyibonamo?

4.Isi, afrika, Urwanda n' uburundi by'umwihariko byaba bifite abantu bazatugeza kubyiza nkibyo uyu musaza watuvuyemo yakoze?.

birumvikana haribyinshi buriwese yavuga akurikije uko yaba azi Mandela ndetse nuko yumva umurage asigiye isi waranga abanyafrika.
dutegereje ibitekerezo byanyu rero mu kiganiro cyacu kandi cyanyu.

Nkuko mu maze kubimenyera buri cyumweru guhera i saa saba isaha yo mu bwongereza, 15h00 isaha zo mu Rwanda no m'Uburundi mukurikina ikiganiro cy'urubyiruko.
kuri iki cyumweru tukaba tuzakomeza ikiganiro cyacu twatangiye mu byumweru bibiri bishyize aho twagiye tugaruka cyane k'urukundo m'urubyiruko rw'ikigihe. twagiye turebera hamwe ibibazo bisigaye bikunda kubangamira abakundana, tureba uruhare rw'ababyeyi, tureba uruhare rw'umuco,ubukungu,....
byumwihariko rero kuri iki cyumweru tuzagerageza kurangiza ingingo eshatu twacumbitse bitewe nuko hagiye hagaragara ko abantu bari bafite byinshi byo kuvuga ku ngingo zimwe nazimwe bityo umwanya ukatubana muto. izo ngingo tuzaganiraho rero ni:
1.Ese mugihe byaba bigaragaye ko umuntu atahiriwe n'urukundo yabigenza ate ? dore ko byagaragaye ko abantu babibona k'uburyo butandukanye, hari abahitamo kubivamo(urukundo), hari abakomeza kugerageza bakaba bashakira ahandi kabone naho byaba inshuro nyinshi,hari abazinukwa burundu ijambo urukundo, yewe ngo hari nabiyahura,... ushobora kuba nawe ufite uko ubibona .

2.Impano zitangwa m'urukundo zaba ari ngombwa? nonese hari icyozongerera abakundana?
aha hari benshi bibaza impamvu ubundi usanga umuhungu ariwe ugomba kugaragaza uruhare runini cyane muri ibi bintu (gutanga impano) mu mvugo yubu ngo ni uguhinga, nyamara aba bantu baba bitegura kuzaba umuryango umwe, aha rero bamwe babibonamo impamvu yuko usanga umugore rimwe narimwe abuzwa ijambo m'urugo kuko aba ameze nk'ikigurwa ( yaraguzwe).

3.Niryari hakwiye kuba imibonano mpuza bitsina hagati y'abakundana?
iyi ngingo ikomeje gukurura ibibazo byinshi hagati y'abakundana n'umuryango nyarwanda muri rusange, aho usanga bamwe barabishakiye n'inyito ngo ni ugutanga avance, aha bikaba bishobora gukurura ibibazo byinshi hagati y'aba bantu bombi k'uwayitanze mugihe umwe asanze wenda bitameze uko abishaka, ari kuwayatse cg uwayihawe(avance), ashobora kubona ko uwo mu kunzi we uko amuhaye azabigirira n'abandi, ... nawe ufite uko ubyumva.

Umwanya n'udukundira kandi tuzafata n'ingingo ya kane, akaba ari ingingo ijyanye n'ikinyabupfura, usanga mur ikigihe rwose abana babyiruka iki kintu kitakiri mubyo bagomba gutozwa. aha tukazibaza tuti:
(a).urahare rw'ababyeyi ni uruhe
(b)uruhare rw'abarezi (amashuri)
(c)uruhare rw'umuco

Tukazafatanyiriza hamwe gufata umwanzuro tureba icyakorwa ngo umuryango nyarwanda urushyeho kurangwa n'ikinyabupfura dore ko aricyo cyarangaga abatubyaye bityo tukazakiraga natwe abazadukomokaho.
Uruhare rwawe nk'urubyiruko muri iki kiganiro ni ingirakamaro, hamagara utange ibitekerezo byawe ... nawe mubyeyi wikwicecekera ngo wumve ko wenda uzigisha abawe muri kumwe gusa burya kuva na kera umubyeyi yarebereraga igihugu cyose bityo ibitekerezo byawe nawe turabikeneye.

Amwe mu magambo asigaye akoreshwa n'urubyiruko rw'u Rwanda muri ikigihe .. cyane cyane ururi imbere mu gihugu nkuko byavuzwe mu kiganiro cy'urubyiruko kw'ijwi rya rubanda kuwa 13/10/2013 .

1.musaza= iri ni jambo ubusanzwe rizwi ko risobanura umuntu mukuru mu myaka, ariko ubu risigaye rikoreshwa cyane cyane n'abasore aho baba bashaka kumvikanisha ko uwo bita iryo zina bamwubashye, ari umuntu w'umugabo mu bikorwa no mu myumvire
2.kuyoka= iri ni ijambo ritazwi na benshi cyane cyane kubatari imbere mu gihugu ndetse abari mu gihugu nabo sibose kuko rikunze gukoreshwa na babandi bitwa abanyamugi, bakaba barikoresha iyo bashaka nko gusobanura kumenya, (kumva ubusobanuro bw'ikintu)
3.giti= iri naryo ni ijambo rije vuba .. rishatse kuvuga ruswa
Ex. iyo bavuze ngo umuntu arya giti baba bashatse kuvuga ko afata ruswa .
4.kurira igiti= kunywa umuti= kunywa urumogi
5.amaniga= aba type= abasore ariko bamwe nyine biyumvamo amaraso ashyusye, bambara neza (bakeye)
6.guhomaho=gutera swata
7.gukubitwa (cg ngo nakubiswe)= kubona ikirenze icyo wateganyaga ariko m'uburyo buri negatif
8.agatigito=umuruho
9.umwana uhiye= irijambo rikunze gukoreshwa ahanini iyo bashaka kuvuga umukobwa mwiza, uteye ubwuzu, ubusambo
10.gukura ibyinyo= bikoreshwa cyane kubagabo iyo abakobwa babariye amafranga bababeshya utukundo ntibarubahe
ushobora kuba nawe hari andi magambo waba uzi tutanditse, wayatugezaho.

J. Nepo.