Ijwi Rya Rubanda

Urubuga rw'Abaharanira Demokarasi mu Rwanda


Jya ku URUBUGA RWA TWESE
Nyabuneka, Ijwi Rya Rubanda ntiyemera abiyoberanya cyangwa batanga informations zitarizo kuri uru rubuga.

Iterwa rya Nyamwasa: Amakinamico y’Inkotanyi muri Afurika y’Epfo ni ayo kurangaza, gushitura, cyangwa?

By 1 Comment

Kuva kuwa kabiri tariki ya 4/3/2014, ibikuba byaracitse ngo inkotanyi nkoramaraso Kayumba Nyamwasa yari igiye kwicwa Imana ikinga akaboko.
Ese ni byo, cyangwa ni iyindi kinamico y'Inkotanyi?
Tumaze kubimenyera, twese turabizi: ingengabitekerezo n'imikorere y'inkotanyi ziri mu Rwanda ni imwe neza neza n'ingengabitekerezo n'imikorere y'inkotanyi ziri hanze, zaba izahatumwe na FPR-Inkotanyi, zaba izivuga ko zirwanya Paul Kagame.
Ninde uyobewe se ko muri kamere yazo, Inkotanyi zazobereye mu gutekinika, zigahimba ibyo zishaka, zigakina ikinamico zigira ngo zigere ku cyo zifuza?
Muribuka ukuntu Inkotanyi ziyobowe n'uwo Afande Kayumba Nyamwasa zakoraga ikinamico ngo abacengezi bateye, hanyuma zikajagajaga amakomine ziri muri operation yo gutsemba ikinyeganyega cyose? Nawe akajya ku maradio n'amateleviziyo yigamba ko yategetse inkotanyi ze kurasa zigusha, ngo iyo yihagurukiye aba yazanywe no kwica umwanzi, ngo ntaba yazanywe no gukora akazi ka gipolisi.
Abacuraga ibisobanuro byatangwaga igihe cy'ayo makinamico y'inkoramaraso Kagame na Nyamwasa, na n'ubu ubwonko bwabo ntibwarekeye aho.

Kimwe mu byanteye kwibaza nkimara gusoma inkuru ko ngo Inkotanyi Kayumba Nyamwasa yongeye kurusimbuka, ni ukuntu bagitangaza iyo nkuru bavuze ngo abashinzwe umutekano muri Afurika y'Epfo bamenye ko hari abantu bari butere kwa Kayumba Nyamwasa, baramuburira bamusaba kugira aho ajya, ku buryo ngo abo bicanyi bageze iwe bagasanga adahari, akaba arusimbutse atyo.
Nahise nibaza ukuntu, niba inzego z'umutekano zari zamenye mbere y'igihe ko iyo nkotanyi iri buze guterwa, zitakoze uko zishoboye kwose ngo zigenzurire hafi abo bicanyi maze zibafate batarava aho bari bapanze gutera.
Abo muri RNC muri Afurika y'Epfo bakwirakwije iyo nkuru bashobora kudufasha gusobanukirwa?
Ariko ye! Inkotanyi (ari iza Kagame cyangwa iza Nyamwasa) zagize Afurika y'Epfo agatobero rwose! Abategetsi b'aho zamaze kubikenekera.

Ndagira ngo mbasabe mwese Banyarwandakazi, Banyarwanda, mumfashe gusuzuma neza no gusesengura ibyo abavandimwe bo muri RNC bavuga kuri iyo nkuru. Ntibarabura kuvuga ko Kagame yari yongeye kwivugana Nyamwasa. Ngo Kagame! Kagame! Kagame! Nimugira aho mwumva abo bavandimwe bavuga ko FPR-Inkotanyi cyangwa Leta ya FPR-Inkotanyi yari ishatse kumwica, muraba mugitsinze.
Kuri bo, Inkotanyi ntizikora amahano. Oya! Akorwa na Kagame!
Umunsi muzumva Inkotanyi ziyobora RNC zeruye zigashyira mu majwi ubwicanyi bwa FPR-Inkotanyi (twese tuzi ko aribwo butugejeje aha), uwo munsi muzambwire nanjye nywandike mu mateka ya opozisiyo nyarwanda.

Ndagira kandi ngo mumfashe, Banyarwanda, Banyarwandakazi, mumbwire amagambo Inkotanyi Kayumba Nyamwasa yavuze umunsi barasa Bwana Seth Sendashonga bakamuhusha. Icyo gihe, Kagame we yaravuze ati ubusanzwe twe Inkotanyi ntiduhusha. Kayumba Nyamwasa ko yari amuri iruhande yavuze iki? Yatabarije Sendashonga n'abandi Inkotanyi zijya kwicira hanze? Rudasingwa icyo gihe we yavuze iki ko yari agaragiye Kagame? Yatabarije abo Inkotanyi zijya kwicira hanze? Hanyuma se ku ncuro ya 2 inkotanyi noneho zishoboye kwivugana Sendashonga, abo baterampuhwe Nyamwasa na Rudasingwa batugaragariza amatangazo batanze bamagana ubwo bwicanyi bitirira Kagame? Abo bashiturabyohe bombi nibatwibutse umutima bari bafite igihe imashini ya FPR-Inkotanyi bari bacunze yasyaga abandi bavandimwe. Harya ngo kamere y'icyo gihe yaba yariyuburuye?

Aho imitwe iri muri aya makinamico y'inkotanyi ntiyaba ari iyo kwongera gushuka ibyohe ngo bihitemo izo bitomera inyuma byibwira ko noneho byabonye abazabirinda itotezwa n'iyicwabumonyo? Ibyohe nimutumuke, simbabujije.
Musanzwe mubizi ariko. Inkotanyi aho iri hose ntitana no gutekinika. Inkotanyi y'interampuhwe ya none ni inkotanyi y'inyagafuni y'ejo.
Reka tubitege amaso. Amaherezo tuzaba tumenya iyo ibi biganisha.

Visi-Perezida Bakunzibake Alexis wa PS Imberakuri yabonetse

By 1 Comment

Nzeri 07, 2012 - Bwana Bakunzibake Alexis, Visi-Prezida wa mbere w'Ishyaka PS Imberakuri, wari warashimutswe kuwa gatatu ku manywa y'ihangu, ubu yabonetse. Radiyo Ijwi Rya Rubanda yashoboye kuganira nawe: ni muzima, uretse ko ngo afite ibisebe ku maboko no ku maguru, akaba yaravunaguritse ingingo zose.

Yatubwiye ko abamufashe bamukuye hafi y'iwe kuri Onatracom mu masaa sita, agundagurana nabo bamuvana muri taxi bashaka kumushyira mu modoka yabo. Abari aho bose bararebereye, ntacyo bakoze kuko babonaga afatwa n'abategetsi. Bamaze kumugeza mu modoka bamupfutse mu maso, bamujyana ahantu atazi aho ariho. Bamushyize mu kumba keza, bamushyiramo amapingu ku maboko no ku maguru. Nyuma baje kumuhata ibibazo ku birebana n'ishyaka ayobora, aho bakura amafaranga, impamvu batajya gufatanya na ba Madamu Mukabunane uyobora ishami rya PS Imberakuri ryashyizweho na FPR Inkotanyi n'ibindi.
Muri iri joro ryo kuwa kane rishyira kuri uyu wa gatanu, mu ma saa yine, ngo bamushyize mu modoka, bagenda igihe kirekire ku mihanda mibi, hanyuma mu masaa munane bamuta ahantu mu gishanga. Nyuma ya saa munane y'ijoro nibwo yashoboye kugera ku ngo z'abaturage b'aho, avuganye nabo asanga ari mu Bugande hafi y'i Kabare.
Igihe yari mu maboko yabo bamwambuye ibintu byose yari afite harimo n'inkweto hamwe na za telefoni yari afite. Nyamara ngo kubw'Imana hari Sim card batashoboye kubona, ku buryo yatiye telefoni umuturage mu bamwakiriye, ashyiramo iyo Sim card, maze ashobora guterefona bagenzi be ababwira aho ari n'uko amerewe.
Ahasigaye ni ukumenya niba asubira mu Rwanda cyangwa niba aba yigumiye mu Buganda. Ariko mu butumwa yaduhaye ngo tugeze ku barwanashyaka ba PS Imberakuri no ku bandi banyarwanda, ni uko batagomba gucika intege, ko bagomba kwibuka ko ibintu nk'ibi biri mu byo bagomba kwakira kuri uru rugamba rwo guharanira demokarasi no kuvanaho ingoma y'igitugu. Yanasabye n'abamushimuse gushyira mu gaciro, bakisubiraho bakareka gutoteza, kugirira nabi no gutera ubwoba abanyarwanda baharanira ko igihugu cyayoborwa neza.
Twizere ko abari bashimuse Bwana Bakunzibake batamuhaye kuri twa tuzi mu biryo bamugaburiye igihe yari mu maboko yabo.

s2Member®
Privacy Policy - Terms and Conditions - ALL RIGHTS RESERVED.