Gahunda

Urubuga Rwa Twese rwo ku tariki ya 1/7: Ukwezi kwa Nyakanga kutwibutsa iki?

July 1, 2015 By Simeon Leave a Comment

Gahunda yo kuri uyu mugoroba
Ukwezi kwa Nyakanga kutwibutsa iki?

Kuri uyu mugoroba wo ku tariki ya 1/7, guhera saa 18h isaha y'i London, hano kuri Radio IRR turagira Urubuga Rwa Twese, aho ababishaka bose bungurana ibitekerezo ku birebana n'Isabukuru yo kwizihiza Ubwigenge bw'igihugu cyacu bwabaye ku tariki ya 1/7/1962 ndetse no ku gaciro Abanyarwanda baha ukwezi kwa Nyakanga muri rusange bahereye ku mateka yabo.

Ni kuri uyu mugoroba rero, guhera saa 18h isaha y'i London, ni ukuvuga saa 19h isaha y'i Kigali n'i Bujumbura.

Urubuga Rwa Twese 21/03/2015: Ibibazo by’Abari n’Abategarugori – icumbura..

March 21, 2015 By Simeon Leave a Comment

Mu minsi ishize twatangiye ibiganiro ku banyarwandakazi tuza no gukurikira abari mu mashyamba ya Congo bahawe ijambo na Radio Ijwi Rya Rubanda, basenyewe n'abashaka kubatsembatsemba.

Uyu munsi kuwa gatandatu tariki ya 21/03/2015, mu Urubuga Rwa Twese rutangira saa 18h z'i London nk'uko bisanzwe, Radio Ijwi Rya Rubanda iraha abanyarwanda babyifuza umwanya wo kugaruka kuri izo ngingo no kuzuza ibyo biganiro.

Ababyifuza rero bose barabona umwanya wo kubiganiraho na Madamu Claire Mukamugema.

Nyuma yo kuvuga kuri ibyo by'abari n'abategarugori n'agahangayiko k'abanyarwanda muri rusange, nituba tugifite igihe gihagije turaha umwanya Bwana Valensi Maniragena atubwire ku byo yakuye mu gitabo cyanditswe na Musenyeri Kizito Bahujimihigo cyitwa: "Mutara III Rudahigwa, Uwatuye u Rwanda Kristu Umwami".

Ni kuri uyu mugoroba rero mu Urubuga Rwa Twese rutangira saa 18h isaha y'i London, ni ukuvuga saa 20h isaha yo mu Rwanda.

Urubuga Rwa Twese rwo kuzirikana ku Umunsi w’Abari n’Abategarugori

March 6, 2015 By Simeon Leave a Comment

Muribuka ko tariki ya 8 Werurwe ari umunsi ngarukamwaka bazirikanaho by'umwihariko ku isi hose abari n'abategarugori.

Mu rwego rero rwo kwifuriza abari n'abategarugori bacu umunsi mwiza, Radio Ijwi Rya Rubanda iteganya guha urubuga ababyifuza bose kuri uyu wa gatandatu tariki ya 7/3/2015, cyane cyane abari n'abategarugori, kugira ngo baganire ku bibazo by'umwihariko abanyarwandakazi bahura nabyo mu guharanira kwubaka u Rwanda rw'amahoro, ubumwe, ubutabera n'amajyambere asaranganijwe.

Abazitabira urwo rubuga - barimo ba madamu Virginia Nakure na Claire Mukamugema, bazadufasha gusobanukirwa ku ngorane abari n'abategarugori bahura nazo mu gihugu kirangwamo iterabwoba, ubwicanyi, akarengane n'irondakoko, ndetse batuganirize ku Uruhare abari n'abategarugori bagize cyangwa bashobora kugira mu guharanira impinduka mu Rwanda mu mahoro.

Bari n'abategarugori rero, ijambo ni iryanyu. Ni kuri uyu wa gatandatu tariki ya 7/3/2015 guhera saa 18h isaha y'i London, ni ukuvuga guhera saa 20h isaha yo mu Rwanda.

Gahunda Urubuga Rwa Twese kuri 24/01/2015-saa 18h y’i London

January 24, 2015 By Simeon Leave a Comment

Kuri uyu wa gatandatu tariki ya 24/01/2015 duteganya Urubuga Rwa Twese rutangira saa 18h isaha y'i London nk'uko bisanzwe.
Muri urwo rubuga rwa twese turibanda n'ubundi ku kibazo cy'impunzi z'Abanyarwanda ziri muri Congo zacitse ku cumu rya Leta y'Inkotanyi, zikaba zarashoboye kurokoka zibifashijwemo n'umuryango FDLR w'abiyemeje kuzirinda no kuzirwanaho.
Turaganira ku buryo abanyarwanda hirya no hino bariho bategura ibikorwa byo kujya mu myigaragambyo aho bari hose kugira ngo bakomeze batabarize impunzi ziri muri Congo kandi bashimangire ko umuti w'ibibazo abanyarwanda bafite uzaboneka byanze bikunze ari uko Leta y'Inkotanyi ivuye ku izima hakaba ibiganiro bisesuye hamwe n'abatavuga rumwe nayo bose.
Ufite icyo ashaka kugeza ku bandi banyarwanda wese afite uburenganzira bwo kuza mu Urubuga Rwa Twese akahatangira ibitekerezo bye mu bwisanzure.
Ni mu Urubuga Rwa Twese rero rwo kuri uyu wa gatandatu tariki ya 24/01/2015 rutangira saa 18h isaha y'i London.