Ijwi Rya Rubanda

Urubuga rw'Abaharanira Demokarasi mu Rwanda


Jya ku URUBUGA RWA TWESE
Nyabuneka, Ijwi Rya Rubanda ntiyemera abiyoberanya cyangwa batanga informations zitarizo kuri uru rubuga.

Ikiganiro-mpaka cyahuje amashyaka ku birebana na gahunda yo “guhuza amashyaka ya opozisiyo” – kuri 22/02/2014

By Leave a Comment

Tega amatwi:

Kuwa gatandatu tariki ya 22/02/2014, mu Urubuga Rwa Twese rwo kuri Radio Ijwi Rya Rubanda, habaye ikiganiro-mpaka cyahuzaga amashyaka n'abandi babyifuza.

Icyo kiganiro-mpaka cyari kigenewe gufasha abanyarwanda gusesengura amakuru y'ingenzi yakunze kuvugwaho muri Mutarama na Gashyantare, cyane cyane ajyana na gahunda zakozwe zo guhuza amashyaka, uko izo gahunda zateguwe n'uko zakiriwe.

Twaboneyeho umwanya wo kurebera hamwe uko tubona ubu igihagararo n'ibikorwa by'amashyaka ari muri opozisiyo no gutekereza ku masomo twakura mu byabaye muri ayo mezi 2 ya mbere y'umwaka wa 2014.

Radio Ijwi Rya Rubanda yari yatumiye muri icyo kiganiro-mpaka twari twagitumiyemo amashyaka yose ifitiye emails, iyibutsa ko kwitabira bene ibi ibiganiro biyongerera uburyo bwo kwungurana ibitekerezo n'abandi banyamashyaka ndetse no gutega amatwi iby'abandi banyarwanda bakeneye kumenya ku migambi n'imikorere yayo.

Ikiganiro cyabaye kirekire, ku buryo hano twahisemo kukibagezaho tugiciyemo ibice 8.

Impaka – Urubuga Rwa Twese kuri 05/10/2013 – Abayobozi dushaka bagomba kuba bameze bate?

By Leave a Comment

Urubuga Rwa Twese, Ijambo ni iryanyu

Abayobozi dushaka bagomba kuba bameze bate?

Nitutagena twe ubwacu ibya ngombwa umuntu agomba kuba yujuje kugira ngo tumwemerere kujya mu nzego z'ubutegetsi, tuzakomeza tuyoborwe n'abagome, abicanyi, ibisahiranda cyangwa ibihubutsi. Nta mpamvu yo gukomeza gutaka ngo abatuyobora batumereye nabi cyangwa ngo batugejeje aharindimuka kandi ari twe mu gutangira tuba twemeye kujya inyuma y'abantu tuzi ko bafite ubusembwa budakwiranye no kuyobora.

Urwishigishiye ararusoma. Uzajya inyuma y'inkoramaraso se, hanyuma utangazwe n'uko amennye amaraso kandi wari usanzwe ubizi? Niba dukurikira abatari inyangamugayo, ni uko natwe ubwacu ubwo bunyangamugayo tuba tutabufite. Iyo bitinze, ubuyobozi bubi aba ari ishusho ry'ububi bw'abayoborwa.

Dore ibitekerezo byatanzwe mu Urubuga Rwa Twese rwo kuwa gatandatu tariki ya 05/10/2013, aho abarwitabiriye baganiriye ku byo twe abanyarwanda dushaka bigomba kuranga koko abaharanira imirimo y'ubuyobozi mu Rwanda.

Ibyemezo bya Kongere ya 1 y’Ishyaka Ishema ry’u Rwanda

By 1 Comment

IMYANZURO YA KONGERE YA MBERE Y'ISHYAKA ISHEMA RY'U RWANDA.

Dushingiye ku ngingo ya 52, iya 53 n'iya 54 z'Itegeko-shingiro ryo ku wa 28/4/2013 zigena ububasha n'inshingano za Kongere y'Ishyaka Ishema ry'u Rwanda,

Abataripfana Ishema - Kongere Paris 07-09/02/2014

Bamwe mu Bataripfana biyemeje kujyana n'Umukandida wabo gukorera politiki mu Rwanda.

Twebwe Abarwanashyaka 32 bitabiriye Kongere ya mbere y'Ishyaka Ishema yateraniye mu mujyi wa Paris guhera taliki ya 7 kugeza ku ya 9 Gashyantare 2014,

1. Tumaze kuganira bihagije ku bibazo bikomeye bibangamiye abanyarwanda bishingiye ahanini ku butegetsi bw'igitugu bwubakiye ku kinyoma n'iterabwoba;

2. Tumaze kubona ko Ishyaka rukumbi FPR-Inkotanyi ryikubiye ryonyine ubutegetsi, ibyiza byose by'igihugu ndetse rikagerekaho no kwigabiza imitungo bwite y'abaturage;

3. Tumaze kwiyibutsa uko Perezida Paul Kagame yakoresheje inzego z'umutekano n'iz'ubutegetsi bw'igihugu mu gutoresha rubanda ku gahato no mu kwiba amajwi mu matora y'umukuru w'igihugu yabaye mu myaka ya 2003 na 2010;

4. Twongeye kuzirikana uko Abanyapolitiki batavuga rumwe n'ubutegetsi bw'igitugu bwa FPR-Inkotanyi bamburwa uburenganzira bwabo, bagashyirwaho iterabwoba rihoraho, bagafungirwa ubusa, bakicwa baciwe amajosi cyangwa banigishijwe ibiziriko;

5. Nyuma yo gusuzuma ibimenyetso bihagije bigaragaza ko Perezida Paul Kagame afite umugambi mubisha wo gufunga burundu urubuga rwa politiki kugira ngo abe umukuru w'igihugu ubuziraherezo, aha bikaba bigaragararira buri wese ko Paul Kagame yitiranya Repubulika n'Ingoma ya cyami;

6. Tumaze kwitegereza AKARENGANE gakabije gakomeje kugirirwa rubanda rugufi rwongeye guhindurwa inkomamashyi n'indorerezi mu gihugu cyarwo;

TWIYEMEJE IBI BIKURIKIRA :

1. Kudaheranwa n'ubwoba ngo tuzibukire urubuga rwa politiki kuko ari rwo rwonyine rwafasha gukemura ikibazo cy'ubutegetsi bubi buriho mu Rwanda;

2. Ishyaka Ishema ry'u Rwanda rizitabira amatora y'umukuru w'Igihugu azaba mu mwaka w'2017, rifatanye n'abanyarwanda bose kunoza no gushyira mu ngiro umushinga mushya wo gushyiraho ubuyobozi bushingiye ku mahame ya demokarasi isesuye kandi abanyarwanda bose bibonamo;

3. Dutoye kandi tweretse rubanda Umukandida uzahagararira Ishyaka Ishema muri ayo matora y'Umukuru w'igihugu, ari we Padiri Thomas Nahimana;

4. Dushyigikiye icyifuzo cy'itsinda ry'Abataripfana biyemeje kuzajyana na we mu gihugu muri gahunda yo kwegera no gufatanya n'abarwanashyaka bacu bakorera imbere mu gihugu;

5. Twemeje ko itariki ntarengwa yo kuba basesekaye mu Rwanda ari iya 28 Mutarama 2016.

KUBERA IYO MPAMVU :

I.TURASABA ABANYARWANDA IBI BIKURIKIRA :

1. Kumva neza ko ingoyi y'ubutegetsi bw'igitugu ibarembeje nta wundi uzayibakiza, keretse bo ubwabo bemeye guhaguruka , bakisuganya, bakagira uruhare rugaragara mu kuyisezerera;

2. Kwemera badashidikanya ko Inzira y'Amatora yo mu 2017 ari akadirishya Imana ibakinguriye kugira ngo bihutire kukanyuramo bityo barengere bidasubirwaho uburenganzira bwabo bumaze igihe buhonyorwa;

3. Kwanga guheranwa n'ubwoba baterwa n'Agatsiko ahubwo bakiyemeza gukurikiranira hafi no kwitabira gahunda nziza Ishyaka Ishema rizabagezaho muri aya mezi ari imbere .

II. Mu rwego rwo gufasha abanyarwanda kuva ku ngoyi y'ingoma y'igitugu gikabije, kwirinda kongera kugwa mu makimbirane asesa amaraso no kwishyiriraho ubutegetsi abaturage bibonamo, TURASABA DUKOMEJE LONI N'UMURYANGO MPUZAMAHANGA MURI RUSANGE IBI BIKURIKIRA:

1. Kugena no kohereza Komisiyo izahagararira amatora y'umukuru w'igihugu yo mu 2017

2. Kohereza “Brigade” y'ingabo zizarindira umutekano abakandida batavuga rumwe na FPR-Inkotanyi no kurinda abaturage kugira ngo bashobore gutora mu bwisanzure.

MU GUSOZA:

Turasaba abandi banyapolitiki batavuga rumwe na Leta y'umunyagitugu Paul Kagame ko basuzumana ubushishozi ibi bihe turimo bakemera ko igihe cyo kuzanira Abanyarwanda impinduka nziza ari iki ngiki kandi ko Inzira y'amatora yo mu 2017 idakwiye gusuzugurwa cyangwa gupfushwa ubusa, bityo bagashishikariza abayoboke babo kuyitabira bivuye inyuma.

Harakabaho u Rwanda ruhumeka ituze n'amahoro Harakabaho abategetsi bakunda rubanda kandi bashyizweho na rubanda.

Mu izina ry'abagize Kongere y'Ishyaka Ishema,
Chaste Gahunde, watorewe kuba Umuvugizi wa Kongere.

Ibitekerezo byanyu birakenewe: “Abayobozi dushaka bagomba kuba bujuje ibihe bya ngombwa?”

By 3 Comments

Dushaka kuyoborwa n'abantu bameze bate? Abayobozi dushaka bagomba kuba bujuje ibihe bya ngombwa?

Banyarwandakazi, Banyarwanda,
Dukunze kuvuga ko mu Rwanda dufite ubutegetsi bubi, ko bugomba guhinduka tugashyiraho ubutegetsi bwiza, bubereye abenegihugu.
Uko kwinubira ubutegetsi bubi kurumvikana kandi koko. Abantu baricwa, barakubitwa, baramburwa ibyabo, barahutazwa, bararenganywa buri gihe. Abategetsi benshi ntibitaye ku nyungu z'abenegihugu, usanga bashishikajwe n'inyungu zabo ku giti cyabo, bo n'imiryango yabo.
Hari ikintu nizera ko twese twumvikanaho: Ubutegetsi bubi buterwa n'abategetsi babi.
Mu yandi magambo, dufite ubutegetsi bubi kubera ko dufite abategetsi babi. Cyangwa se mbivuze ukundi, dufite ubutegetsi bubi kubera ko ubwo butegetsi bwashyizwe mu maboko y'abantu babi. Niba dushaka ubutegetsi bwiza, tugomba guha ubutegetsi abantu beza, mu nzego izo arizo zose.

Umuntu ntaba mubi guhera igihe atangiriye gutegeka. Akenshi aba asanzwe ari umuntu mubi, yagera ku butegetsi, akimakaza za ngeso mbi yari asanganywe. Mu gihe rero uhaye ubutegetsi umuntu usanzwe ari mubi, ntiwakwizera ko kuba umutegetsi bizamuhindura umuntu mwiza. Ubutegetsi bukorwa n'umuntu mubi nabwo buba bubi. Umuntu ushyizwe mu myanya y'ubutegetsi azanamo ingeso asanganywe. Umuntu mubi ayobora abandi mu kibi.

Zimwe mu nzira zo kugira ubutegetsi bwiza rero, ni ukubushyira mu maboko y'abantu beza. Ni ukubushyira mu maboko y'abantu b'inyangamugayo. Ni ukubushyira mu maboko y'abantu badafite ingeso zidakwiranye n'umuntu uyobora abandi.
Dukunze gukina mu bikomeye, tugafunga amaso tukareka abantu tuzi ko ari babi bagashyirwa mu myanya y'ubuyobozi, hanyuma tukazatangara dutaka ngo ubuyobozi ni bubi kandi ari twe twashyigikiye ko bushyirwa mu maboko y'abantu bafite ingeso zidakwiranye n'ubuyobozi.
Niba rero dushaka kwubaka u Rwanda rufite ubutegetsi bwiza, tugomba gufata umwanya wo kujonjora abantu neza buri gihe, tukirinda gushyira imbere mu myanya y'ubuyobozi iyo ariyo yose, abantu tuzi ko bafite ingeso zidakwiranye n'ubuyobozi.

Tugomba mbere y'igihe gufata icyemezo kigira giti: Umuntu ufite ingeso iyi n'iyi, ntakwiye gushyirwa mu mwanya w'ubuyobozi uyu n'uyu.
Ibyo tukabitekerezaho rwose mbere y'igihe, bikaba bisanzwe bizwi, ku buryo umuntu uharanira umwanya runaka w'ubuyobozi nawe ubwe ashobora kureba urwo rutonde rw'ibisabwa ku muyobozi, akavanamo ake karenge atagombye kwanduranya.

Nagiraga rero ngo mbasabe mwese, banyarwandakazi banyarwanda, muze dufatanye gukora urutonde rw'indangagaciro (qualites /valeurs) dushaka kubona mu muntu wese uharanira umwanya w'ubuyobozi, n'urutonde rw'ingeso, ubusembwa, ibyaha cyangwa ibyasha (defauts...) tudashaka kubona mu muntu wese uharanira umwanya w'ubuyobozi.
Nitumara kwumvikana ku rutonde rw'ibyo tugomba kubanza gushaka mu muntu kugira ngo twizere ko ashobora no kuzaba umuyobozi mwiza, tuzaba duteye intambwe ya mbere ikomeye. Bizatuma tudapfa kujya twizera umuntu ubonetse wese ngo tumwemerere gufata imyanya y'ubuyobozi tutabanje kureba niba yujuje koko ibya ngombwa bigomba kuranga umuyobozi mwiza.

Tanga rero uruhare rwawe mu kugena ibigomba kuranga abayobozi bacu.

A. Urutonde rw'indangagaciro dushaka mu bayobozi.
Abategetsi beza, dushaka, bagomba kuba bameze bate? Bagomba kuba bujuje ibihe bya ngombwa? Bagomba kuba barangwa n'izihe ndangagaciro?
(andika nibura ingingo 10 zijyana n'urwo rutonde rwa mbere)
1.
2.
3.
4.
5.
6.
7.
8.
9.
10.

B. Urutonde rw'ingeso tudashaka mu bayobozi.
Ingeso (cyangwa ubusembwa cyangwa icyasha...) tudashaka mu bayobozi no mu baharanira imyanya y'ubuyobozi:
(andika nibura ingingo 10 zijyana n'urwo rutonde rwa mbere)
1.
2.
3.
4.
5.
6.
7.
8.
9.
10.

Mbashishikarije kutugezaho ibitekerezo byanyu kuri email ijwiryarubanda@ijwiryarubanda.com cyangwa kuri website ijwiryarubanda.com. Murarikiwe mwese kugira uruhare rugaragara mu biganiro by'Urubuga Rwa Twese, aho twiyemeje kuzafata umwanya uhagije tukajya impaka ku bitekerezo n'ibyifuzo muzaba mwatanze kuri iyi ngingo irebana n'indangagaciro tugomba gushakisha mu bo twifuza ko bafata imyanya y'ubuyobozi.

Nitwirengagiza kugena hakiri kare ibigomba kuranga abayobozi dushaka, ntituzatungurwe no kubona dushyira mu buyobozi abantu bazadukorera ibya mfura mbi nk'uko bimeze ubu.

s2Member®
Privacy Policy - Terms and Conditions - ALL RIGHTS RESERVED.