Jenoside

Icyemezo cy’Urukiko mu Bwongereza na Interview ya Dr Vincent Brown alias Bajinya

December 31, 2015 By Simeon Leave a Comment

Urukiko rwo mu Bwongereza rwafashe icyemezo: Bajinya na bagenzi be ntibazoherezwa mu Rwanda:
Kuwa kabiri tariki ya 22/12/2015 nibwo umujuji Emma Arbuthnot wo mu rukiko rwa Westminster Magistrates' Court yatangaje icyemezo yafashe mu rubanza Leta y'Inkotanyi iregamo abanyarwanda batanu isaba ko bakwoherezwa mu Rwanda guciribwa imanza zirebana n'ibyaha by'ihonyabwoko ngo bashinjwa.
Abo bagabo ni Dr Vincent Brown wahoze yitwa Vincent Bajinya, Charles Munyaneza, Emmanuel Nteziryayo, Celestin Mutabaruka na Celestin Ugirashebuja. Bose ni abo mu bwoko bw'abahutu.
Urukiko rwemeje ko abo bagabo batakoherezwa mu Rwanda kubera ko rufite ibimenyetso bigaragaza ko nta butabera buhwitse bashobora kubonayo.
Kubera ko dosiye y'abo bagabo ari nini cyane, Juji Arbuthnot ntiyayisomye icarubanza ryose. Yasobanuye mu magambo make icyemezo yafashe cy'uko abaregwa batsinze, maze aha ababuranyi bose dosiye ikubiyemo uko urubanza rwaburanwe n'ibyo yashingiyeho yemeza ko nta butabera babona baramutse bohererejwe Leta y'Inkotanyi.
Juji akimara gutangaza icyo cyemezo, abanyarwanda n'inshuti zabo bari baje ari benshi kwumva isomwa ry'urubanza biruhukije, bahita bakoma amashyi y'urufaya, berekana ko bishimiye cyane uwo mwanzuro w'urukiko.
Uhagarariye Ministere Public muri urwo rubanza yahise avuga ko Leta y'Inkotanyi iteganya kujurira. Agomba kuba yajuriye mu gihe cy'ibyumweru bibiri.

Twibutse ko no mu mwaka w'2009, urukiko rwo mu Bwongereza rwari rwaciye urubanza rwemeza ko Leta y'Inkotanyi itsinzwe, ko bane muri bo baregwaga icyo gihe batakwoherezwa mu Rwanda kubera imikorere idahwitse y'ubucamanza n'ubuRtegetsi bw'itoteza n'igitugu birangwa mu Rwanda.

Twibutse kandi ko kugeza ubu nta mututsi n'umwe rukumbi urigera ukurikiranwa ku byaha by'ihonyabwoko byakorewe haba mu Rwanda, haba mu Burundi ndetse no muri Kongo.

Muri iyi video, Dr Vincent Brown alias Vincent Bajinya aradutangariza uko we na bagenzi be bakiriye icyemezo cy'umucamanza cyo kutaboherereza Leta y'Inkotanyi.

Uko iburanishwa ry’Inkotanyi Karenzi Karake ryagenze kuri 25/06/2015

June 26, 2015 By Simeon Leave a Comment

Mu rukiko, Karenzi Karake yari yambaye umwenda w'abanyururu nk'uyu

Mu rukiko, Inkotanyi Karenzi Karake yari yambaye umwenda w'abanyururu nk'uyu.

Leta y'u Rwanda yatanze akayabo ka miliyoni imwe y'amapawundi - ni ukuvuga amanyarwanda arenga miliyari - kugira ngo Inkotanyi Karenzi Karake ifungirwe kijyambere mu nzu ikodeshwa na Ambasade y'u Rwanda i London.

Kuri uyu wa kane tariki ya 25/06/2015, umucamanza Quentin Purdy yatangije urubanza rwa General Karenzi Karake mu rukiko Westminster Magistrates Court.
Icyumba kiburanirwamo cyari cyuzuye abanyamakuru n'abandi bantu bari babukereye baje kureba uko urubanza rugenda.
Hari n'abategetsi bakuru ba Leta y'Inkotanyi y'u Rwanda, barimo Ambasaderi w'u Rwanda mu Bwongereza Williams Nkurunziza ndetse na Ministri w'Ubutabera Johnston Busingye.

Abakozi ba Ambasade nabo bari bahuruye bagaragiwe n'abanyarwanda b'intore za Leta y'Inkotanyi, bari bazinduwe no kwamagana ifatwa n'iburanisha ry'inkotanyi Karenzi Karake. Uretse abo, hari n'abanyarwanda b'impunzi baharanira ko ubutabera bwagera kuri bose, bakaba bagaragazaga ko bishimiye ko noneho n'inkotanyi zitangiye gukurikiranwa ku byaha zakoze harimo ibya jenoside n'ibihonyora inyokomuntu.

Urubanza rwari ruteganijwe gutangira saa 14h isaha y'i London, ariko rwatangiye rukereweho hafi igice cy'isaha.

Muri ekipe y'abavoka baburaniraga inkotanyi Karenzi Karake, harimo Cherie Blair, umugore wa Tony Blair wabaye Ministri w'Intebe w'Ubwongereza igihe kirekire, akaba n'umwe mu bajyanama bakuru b'umukuru wa Leta y'inkotanyi Paul Kagame.

Inkotanyi Karenzi Karake yicajwe mu kumba bashyiramo abashinjwa ibyaha. Yicaye akikijwe n'abacunga-mbohe babili, naho uwa gatatu akaba yari yicaye areba mu cyerekezo cy'abo bagenzi be babiri bakikije uregwa. Inkotanyi Karenzi Karake yazanywe mu rukiko yambaye igisalupeti cy'amabara abonerana y'icyatsi n'umuhondo cyanditsweho mu bitugu amagambo HM PRISON, bita hano mu Bwongereza "escape suits", bakunze kwambika ba ruharwa bakekwaho ko bashobora gutoroka.
Agitunguka muri ako kumba bicazamo abashinjwa, yambaye icyo gisalubeti, mu banyarwanda bari aho mu cyumba cy'indorerezi hari abatangaye, barimyoza, barahuuma, bigaragaza ko batunguwe no kumubona muri iyo myenda y'imbohe. Hari n'abagore bapfunetse bararira ku buryo bugaragara.
Mbere yo kwicara aho bamweretse yazamuye akaboko areba mu cyerekezo cy'ahicarwa n'indorerezi, bamwe mu ntore za Leta y'Inkotanyi zari zirimo bakoma amashyi.

Mu gutangiza urubanza, umucamanza Quentin Purdy yasabye inkotanyi Karenzi Karake guhaguruka akavuga amazina ye n'igihe yavukiye. Karake amaze kubivuga, yabajijwe niba yemera kwoherezwa mu gihugu cya Espagne kuburanirishwayo ibyo abaespanyole bamushinja, cyangwa niba atabyemera. Yashubije ko atemera kwoherezwa muri Espagne.

Mbere yo gusuzuma niba Karake ashobora kuburana ibyo bya extradition ari mu munyururu cyangwa ari hanze, umucamanza Purdy hamwe na ba avoka bombi, uhagarariye Ubushinjacyaha n'uhagarariye Karake bagiye muby'amatariki kugira ngo bemeze igihe amadosiye n'ibimenyetso bizaba byarangije kwegeranywa n'igihe urubanza rushobora kuzatangira kuburanishwa nyabyo. Bumvikanye ko rwazaburanishwa mu mpera z'ukwezi kwa 10, ku tariki ya 29.

Ku birebana no kuba yahabwa uburenganzira bwo kuba ari hanze ya gereza kugeza igihe umwanzuro urebana na extradition uzafatwa n'urukiko, uhagarariye ubushinjacyaha yasobanuye impamvu abona ko bitaba byiza ko inkotanyi Karenzi Karake yaba ari hanze by'agateganyo. Yavuze ko afite impungenge zikomeye ko Karenzi Karake yakoresha amayeri yose agatoroka akava mu Bwongereza, cyane cyane ko nta muryango cyangwa imitungo afite mu Bwongereza kandi Leta y'inkotanyi ikaba yashobora no kumufasha gutoroka, cyane cyane ko byagaragaye ko iyo Leta na Ambasade yayo mu Bwongereza barwanya bikomeye iby'ifatwa n'iburanishwa ry'inkotanyi Karenzi Karake.

Bwana Mark Summers waburaniraga inkotanyi Karenzi Karake we yasobanuriye umucamanza impamvu uwo aburanira yakurwa mu munyururu akaburana ibya extradition ari hanze.

Mu mpamvu z'ingenzi yatanze harimo:
- Kuba bazerekana bihagije ko impapuro za Espagne zo kumuta muri yombi bagendeyeho zidakwiye guhabwa agaciro
- Kuba Karenzi Karake agendera kuri pasiporo diplomatique akaba yagombaga ubudahangarwa; aha, avoka wa Karenzi Karake yahaye umucamanza pasiporo itukura y'abadiplomates Karenzi Karake yagendeyeho ndetse ikaba yari irimo na viza yatewemo na Ambasade y'Abongereza. Umucamanza yabajije impamvu bavuga ko Karenzi Karake yari mu misiyo y'igihugu kandi viza iteye muri iyo pasiporo ikaba yerekanye ku yari agiye muri Visit na Business. Uwunganira Karenzi Karake yavuze ko ariko Abongereza bakunze kubigenza.
- Kuba bizagaragazwa ko gusaba ko Karenzi Karake ajya imbere y'ubucamanza bwa Espagne ari igikorwa cya politiki atari ukubera gushishikazwa koko n'ubutabera kandi hakaba hari ibimenyetso ko imiryango yo muri Espagne ikomeza gusaba iburanishwa ry'abategetsi b'u Rwanda ifite ubufatanye n'abagize uruhare muri jenoside, harimo na FDLR;
- Kuba Karenzi Karake atari umuntu wo muri rubanda rusanzwe, ahubwo akaba ari umuntu ukomeye cyane kandi wubashwe mu Rwanda no mu mahanga. Aha umwunganizi wa Karenzi Karake yasobanuye ko urebye imirimo Karenzi Karake ashinzwe mu Rwanda, kumufunga ari kimwe no gufunga Diregiteri wa CIA. Yibukije kandi ko Karenzi Karake yabaye umwe mu bayobozi bubashwe kandi bashoboye bategetse Misiyo ngaruramahoro y'ingabo za LONI i Darfur muri Sudan.
Yakomeje avuga ko u Rwanda ari igihugu cyizewe kandi kinafashwa n'Ubwongereza ndetse ko no mu madosiye arebana n'iyicwa ry'abasipanyole, u Rwanda rwakoze ibishoboka byose mu gukora anketi, gucira imanza abo anketi zagaragaje no kwerekana ubushake mu gufatanya na Espagne kurangiza icyo kibazo.
Ku birebana rero no kuba Karenzi Karake yavanwa mu gihome by'agateganyo, umwunganiye yavuze ko Leta y'u Rwanda yamwishingira rwose kandi ikizeza umucamanza ko Karenzi Karake atazatoroka u Bwongereza.
Ku birebana n'aho yaba mu gihe Karenzi Karake ategereje iburanishwa ry'urubanza n'umwanzuro warwo, umwunganira yahaye umucamanza adresi z'amazu abiri akodeshwa na ambasade y'u Rwanda i London ariko akaba adatuwemo ubu , anagerekaho ko umucamanza aramutse atizeye iby'ayo mazu, ashobora kwemerera akazaba kuri adresi y'inzu ituwemo na Ambasaderi ubwe. Umucamanza abajije ibyerekeranye n'ubudahangarwa bw'inzu nk'iyo ya Ambasaderi, umwunganizi yavuze ko Ambasaderi w'u Rwanda yiteguye gusinya impapuro zivana ubudahangarwa ku nzu bazacumbikiramo inkotanyi Karenzi Karake muri icyo gihe cyose.

Umucamanza yabajije abunganira inkotanyi Karenzi Karake kumubwira umubare w'amafaranga y'ingwate baba biteguye gutanga kugira ngo rwose bigaragare ko uwo Karenzi Karake azakurikiza amabwiriza azahabwa yose kugira ngo ategererereze hanze iburanishwa n'umwanzuro by'uru rubanza. Abunganira Karenzi Karake bahise bongorerana hagati yabo, banavugana na Ministri w'Ubutabera w'u Rwanda hamwe na Ambasaderi w'u Rwanda bari babicaye inyuma, maze babwira umucamanza ko biteguye gutanga ibihumbi 200 by'amapawundi. Umucamanza yabyumvishije ariko ababwira ko umuntu wo mu rwego nka ruriya, uregwa ibyaha biremereye nk'ibyo ashinjwa, atagwatirirwa munsi ya miliyoni y'amapawundi. Umwunganizi wa Karenzi Karake yavuze ko iramutse ariyo yemejwe n'umucamanza nayo bayitanga.

Umucamanza yanabajije niba, aramutse yemeye kumurekura by'agateganyo, bashobora gutanga numero ya telefone igendanwa inkotanyi Karenzi Karake yahora afite aho ari hose kugira ngo igihe abapolisi bamushakiye bamubone. Umwunganizi yemeye ko iyo numero ya telefone bayitanga rwose.

Umucamanza yababwiye ko aramutse yemeye ko Karenzi Karake yarekurwa by'agateganyo yategekwa kujya yitaba kuri stasiyo ya polisi ya hafi y'aho yacumbikirwa. Umucamanza yabahaye urupapuro ruriho urutonde rwa za sitasiyo za polisi i London, abasaba guhitamo stasiyo ya polisi imwe iri hafi y'imwe muri ya mazu abiri akodeshwa na ambasade ariko adatuwemo ubu. Ambasaderi yahamagaye Bwana James Uwizeye, umwe mu bakozi ba Ambasade wari wicaye mu cyumba cy'indorerezi, maze abafasha guhitamo sitasiyo babwira umucamanza.

Ibyo byose birangiye, umucamanza yahise abwira uregwa n'abari aho bose ibyo ategetse.
Yemeye kurekura inkotanyi Karenzi Karake by'agateganyo kugeza igihe umwanzuro w'urubanza rwo kumwohereza muri Espagne uzafatirwa.
Umucamanza akimara gutangaza icyo cyemezo, Cherie Blair yahindukiye areba Ambasaderi na Ministri w'Ubutabera ba Leta y'Inkotanyi bari bicaye inyuma ye, maze yerekeza igikumwe cye hejuru, nko kwerekana ati 'turagitsinze'!

Conditions zijyana n'iyo 'bail' umucamanza yatanze ni:
Karenzi Karake:
1) ategetswe gutanga ingwate ya miliyoni imwe y'amapawundi (£1,000,000) kugira ngo ave mu munyururu aburane urubanza rwa extradition ari hanze;
2) agomba gucumbikirwa gusa mu nzu umucamanza yahisemo muri za zindi ebyiri zidatuwe Ambasade ikodesha;
3) agomba buri joro kuba ari kuri iyo adresi kuva saa 20h nimugoroba kugeza saa 08h mu gitondo;
4) agomba kwambikwa ku kaguru akuma ka 'electronic tag' adashobora kwiyambura kagenewe kwereka abapolisi buri gihe aho aherereye kugira ngo bazajye bahita bamenya igihe yaba ageze aho atemerewe kujya.
5) agomba kujya kwiyerekana buri munsi mbere ya saa sita kuri sitasiyo ya polisi y'i Barnet;
6) agomba, aho ari hose, kuba afite telefone igendanwa kandi iyo telefone ntizigere ibura umuriro na rimwe; numero y'iyo telefoni izaba iri ku rupapuro umucamanza azasinya ngo Karenzi Karake arekurwe by'agateganyo;
7) ntashobora gusubizwa pasiporo yagenderagaho;
8) abujijwe kuba yashaka indi pasiporo cyangwa izindi mpapuro z'inzira zatuma ashobora kujya hanze y'u Bwongereza, haba ku mazina ye bwite cyangwa ku matirano;
9) abujijwe kuba yakwegera hafi y'aho abajya mu mahanga bashobora kunyura, nko ku bibuga by'indege;
10) abujijwe kurenga imbibi z'umuhanda M25 ukikije umujyi wa London;
11) azahita afatwa asubizwe mu munyururu naramuka arenze kuri imwe muri izo conditions z'ubugwate kandi icyo gihe ntazasubizwa iyo ngwate ya £1,000,000.
12) azasubizwa iyo ngwate yose uko yakabaye gusa nyuma y'uko urubanza rwo kumwohereza cg kutamwohereza muri Espagne rurangiye atarigeze arenga kuri condition n'imwe y'ubugwate bwe.

Umucamanza yabajije inkotanyi Karenzi Karake niba yumvise neza izo conditions kandi niba azemeye, amusubiza ko azumva neza kandi azemeye.

Umucamanza yategetse ko iburanishwa ry'urubanza nyirizina rizaba ku tariki ya 29/10/2015.

Umucamanza akimara kugenda, abapolisi bahise basohokana inkotanyi Karenzi Karake. Icyo gihe zimwe mu ntore za Leta y'Inkotanyi zasohokaga mu cyumba cy'indorerezi zatangiye kuririmba ngo 'Tuzarurwanirira', mu gihe abandi bavugaga ngo 'shiiiiii" babibutsa ko ari ngombwa kutifata nk'ababuraburere cyangwa abasazi mu rukiko.

Simeon.
Ijwi Rya Rubanda.

PS. Mu byavuzwe n'uwaburaniraga inkotanyi Karenzi Karake ariko ntasobanukiweho neza impamvu byazamuwe, ni ibyerekerana ngo na 'Mongolian case' yaba yarateye ibibazo bikomeye hano mu Bwongereza. Aho ntibaba barakoraga reference ku bibazo byavutse mu rubanza rwa maneko mukuru wa Mongolia, nawe wafashwe n'abongereza, imanza zikavurungutana, bikarangira yoherejwe mu Budage bwari bwatanze impapuro zo kumuta muri yombi? Uwaba yari mu rukiko akaba yarumvise neza iby'iyo case bakozeho reference yazadufasha gusobanukirwa.

Ifatwa n’ifungwa ry’umwicanyi kabuhariwe Jenerali Karenzi Karake: Ikimenyetso cya nyuma cy’Ukurunduka kw’ingoma y’Agatsiko ?

June 23, 2015 By Simeon Leave a Comment

Kuri uyu wa gatandatu taliki ya 20/6/2015 Liyetona Jenerali Karenzi Karake, Maneko mukuru wa Kagame(NISS) yafatiwe ku kibuga cy’indege cya Hithrow kiri hafi y’umujyi wa Londres, mu gihugu cy’Ubwongereza . Ubu Karenzi Karake yamaze kugezwa muri Gereza ya BELMARSH (High Security Prison)aho ahafungirwa abicanyi kabombo, akaba ariho ategerereje koherezwa mu gihugu cya Espagne ngo kimuburanishe.

Twibutse ko mu mwaka w’2008, Umucamanza w’Umusipanyoro witwa Fernando Andreu Merelles yasohoye Manda mpuzamahanga 40 zo gufata abayobozi bakuru b’igisilikari cy’Inkontanyi abashinja jenoside n’ibyaha by’intambara bijyanye ahanini no kurimbura abantu benshi mu Rwanda no muri Kongo.

Ifatwa rya Karenzi Karake risobanura iki !

Si ubwa mbere Karenzi Karake yari agiye kwidegembya mu Bwongereza nyamara ntiyari yarigeze afatwa , manda yo kumufata yahoraga yirengangizwa!

Iri fatwa rero rifite igisobanuro cyane cyane ko rije risoza uruhererekana rw’ibindi bikorwa n’ibimenyetso bidasanzwe. Reka twiyibutse iby’ingenzi muri byo :

(1) Kagame yatangiye gutsindwa ruhenu mu mwaka w’2013 ubwo umutwe w’abicanyi yiremeye witwa M23 wakoranirwaga n’amahanga bakawushwanyagurisha umuriro nk’abatwika ibihunda byumye! Terminator wawuyoboraga yarafashwe ajyanwa I La Haye, ubu ategereje kuburanishwa vuba aha . Kagame ntiyahakuye isomo ngo yikengere.

(2) Bwarakeye abicanyi be bafata gahunda yo kwambuka imipaka bajya gutsinda impunzi mu buhungiro, muri zo Koloneli Patrick Karegeye yicwa mu ijoro rishyira italiki ya 1 Mutarama 2014, anigishijwe ikiziriko muri Hotel y’i Johanesburg! Kagame watunzwe agatoki n’Urukiko rwa Afurika y’Epfo ntiyatinye kubyigamba ku mugaragaro, agira ngo bizarangirira aho, Abiru be si ukumuha amashyi bava hasi ! Ntibakamenye….

(3) Hakurikiyeho kwaduka mu banyarwanda banyuranye barafungwa karahava , abadashoboye gutorongera baricwa . Nta wakwirengagiza uko barenganyije umwana Kizito Mihigo wabaririmbye, akabahimbira ibisigo n’ibisingizo…bakamwitura kumuvuna ibyubi! Ntawakwirirwa arondora amazina y’abasilikari bakuru batawe mu kagozi ku maherere. Ntawaceceka urupfu rwa Assinapol Rwigara…n’imirambo yagaragaye ireremba mu Kiyaga cya Rweru ! Ibyo byose Kagame yakomeje kwibwira ko bitazagira ingaruka!

(4) Taliki ya 1/10/2014 (Umunsi ngaruka mwaka w’itangazwa rya Mapping Report) Abongereza baratunguranye basohora Cinema ikarishye yitwa Rwanda’s untold story yashinjaga Paul Kagame n’abagererwa be kugira uruhare RUFATIKA muri jenoside yarimbuye Abatutsi no mu bwicanyi ndengakamere bwarimbuye Abanyarwanda n’Abanyekongo basaga miliyoni eshanu.

(5) Leta ya Kagame yakiriye nabi isohoka ry’iyo sinema, yiciraguraho karahava maze igiye kwihenura ikuraho agahu: nibwo ifunze burundu umurongo wa Radio BBC-Gahuzamiryango ngo ntizongere kuvugira mu Rwanda ukundi ! Kagame yakomeje gusuzugura icyifuzo cy’Ubwongereza cyo kongera gufungura iyo Radiyo n’uyu munsi Abongereza n’Abanyamerika bari bakimusaba kuyifungura ! Koko ye ngo “utazi ikimuhatse areba…..”! Iyuzurize nawe singiye kuba umushiziwisoni .

(6) Mu minsi ishize Kagame n’Abiru be badukanye gahunda idasanzwe yo kubeshya amahanga no gusuzugura Abanyarwanda mu kubasinyisha ku ngufu za ‘petitions” ngo zisaba ko Ingingo y’101 y’Itegekonshinga ryo mu 2003 yahindurwa kugira ngo Kagame agirwe umwami w’u Rwanda ubuziraherezo ! Ngo kuko ariwe wenyine “Gitangaza” gishoboye kuyobora u Rwanda bambe !

(7) Leta y’Amerika imaze kumenya neza ko iryo hindurwa ry’ingingo y’101 riri gutegurwa mu buriganya bukabije(dol) n’iterabwoba (contrainte) rirenze ukwemera yihutiye gutangaza ko yiteguye gukorana n’umuperezida mushya w’u Rwanda kuko basanga Kagame acyuye igihe , amategeko yishyiriyeho akaba atamwemerera kongera kwiyamamaza bwa gatatu! Kagame yabiyemeyeho ku mugaragaro avuga ko iyo yumvise hari abantu biha kumubuza kugundira butegetsi, ngo yumva yabikorera icyo ! Muri make yibwiye ko abakubye na zero ! Igikenya nticyumva ihoni koko !

(8) Muri iyi minsi ikibazo cy’Uburundi gihangayikishije benshi , amahanga yarangije kubona neza ko Paul Kagame afite uruhare rukomeye mu kaduruvayo kari guhitana inzirakarengane mu gihugu cy’Uburundi. Ndetse byarangije gusakara hose ko abicanyi ba Kagame barimo gutoreza ku butaka bw’u Rwanda umutwe w’insoresore ziteguye kugaba igitero ku Burundi hagamijwe kurimbura umubare munini w’abarundi, gukuraho ubutegetsi buriho no kwimika abasogosi Kagame yishakiye . Iyi ntambara yegereje hagati y’u Rwanda n’Uburundi ikaba kandi ibonwa n’abashishoza nk’ishobora kwatsa umuriro mu Karere kose k’Ibiyaga Bigari. Aho Kagame we nayiteza azayihonoka ?

UMWANZURO

Niba ibihugu by’ibihangange byashyize Kagame ku butegetsi bikanakomeza kumufasha no kumukingira ikibaba bimaze kugaragaza ko birambiwe amakosa ye akabije , ndetse akaba amaze guhinduka “ Un allié encombrant “, ararye ari menge , IBIHE BYAHINDUTSE , iminsi ye irabaze.

Ugufatwa kwa Karenzi Karake nicyo kimenyetso cya nyuma cyerekana ko noneho koko ubutegetsi bw’Agatsiko bwinjiye muri “Mteremko sans retour”! Karenzi Karake naramuka yoherejwe imbere y’urukiko, akuburanira muri Espagne, amabanga yose azajya ahagaragara, n’ abafatanyacyaha be bose harimo HE, bazatoragurwa nk’imegeri mu minsi iri imbere aha. N’iyo bahitamo kutongera kwifungiranira mu Rwanda ntibogere gusohoka, nta cyemeza ko batafatirwa no mu Rwanda cyane cyane nibakomeza kwishora mu bikorwa byo guteza akaduruvayo mu Karere k’Ibiyaga bigari. Guterwa mu buryo bwa gisilikari nabyo bizaba bishoboka kuko kurwanya abagizibanabi (terroristes) ari inshingano y’Umuryango mpuzamahanga.

Muri make , igihe cyo gukomeza kwigira ba Nyuramukubitwa kirarangiye, hatangiye igihe cy’Ubutabera na Demokarasi.

Niyo mpamvu twongeye guhamagarira Abanyarwanda kutemera gukomeza kuba INDOREREZI mu gihe igihugu cyabo kiri mu kaga. Amahanga arakora umurimo wayo, ariko ntazadukorera uwacu : KWIBOHOZA iyi ngoma y’igitugu yubakiye ku iterabwoba n’ugusahura ibyiza byose by’igihugu ni inshingano yacu nk’abenegihugu.

Ubu noneho ya Revolisiyo ya rubanda irashoboka uyu munsi,kurusha ejo hashize , kereka nidukomeza kwirangaraho!

Gusa njye ndareba ngasanga Paul Kagame akwiye guhabwa amahirwe ya nyuma yo kugarura ibintu mu nzira nzima…ikibazo ni uko yikundira kumva abamushuka bonyine!

Padiri Thomas Nahimana,

ISHEMA Party

Tel :0033652110445

Email: nahimanathom@gmail.com

Inkotanyi nkoramaraso Karenzi Karake yatawe muri yombi mu Bwongereza

June 23, 2015 By Simeon Leave a Comment

Abanyarwanda twese twishimiye cyane ko Ubwongereza bwataye muri yombi imwe mu nkoramaraso z'amarere zo mu nkotanyi, ariwe Lieutenant-General Emmanuel Karenzi Karake, umukuru w'ikigo NISS gishinzwe ubunetsi mu Rwanda.

Kuri uyu wa mbere tariki ya 22/06/2015, Urukiko rw'i Wenstminster mu mujyi wa London rwemeje ko akomeza gufungwa, akazongera kwitaba urukiko kuwa kane tariki ya 25/06/2015.
Impapuro zita muri yombi Inkotanyi Karenzi Karake zatanzwe n'urukiko rwo mu gihugu cya Espagne rumushinja kuyobora itsemba ry'abaturage mu Rwanda no muri Congo, ndetse no kugira uruhare rukomeye mu iyicwa ry'abaspanyole 3 bakoraga mu muryango Medicos del Mundo hamwe n'umupadiri wo muri Canada witwaga Guy Pinard.

Karenzi Karake ni umwe mu nkotanyi-nkoramaraso 40 ziri ku rutonde rw'abo urukiko rwo muri Espagne rwatangiye mandat d'arret international, na n'ubu zicyidegembya mu Rwanda. N'izo zicyidegembya nazo igihe cyazo cyo gutabwa muri yombi kiri hafi.
Nta shiti, turagenda buhoro buhoro twegera igihe inkotanyi-nkoramaraso zizaryozwa amarorerwa zakoreye abanyarwanda, abanyekongo n'abandi banyamahanga.