Ikiganiro Bwana Jean Paul Rugero (alias Romeo) yagiranye na Radio Ijwi Rya Rubanda ku birebana urugendo yagiriye muri RD Congo.

Urugendo rwa Romeo muri DRC.

Mbanje gushimira Bwana Simeon na Radio Ijwi rya rubanda,

Ndashimira n’abumva kino kiganiro kuri uyu munsi, bashoboraga kuba bibereye ahandi, cyangwa biyumvira ibindi biganiro bishimishije.

Mbere ya byose reka manze mbwire ababyeyi bacu aho bari hose, "Happy Mother’s Day" . Ejo hashize nabonye message ivuye muri Congo Imbwira ko Umwe Mu basirikari wampaye akazu ke n’uburiri bwe narayemo iminsi itatu, akemera kurara hanze, Yitabye imana mu mirwano yarimo arwana ku mpunzi. Uwo musore yari afite nyina wamubyaye, ubuzima bwe bwose yabumaze arwana ku miryango y’ inzirakarengane, imana imuhe iruhuko ridashira. Uyu munsi rero abumva iki kiganiro mwibuke ababibarutse, mwibuke Ababyeyi bafite abana mu muriro wo muri Congo.

Ikinzanye kuri uyu munsi rero, nagiraga nsangire namwe ubumenyi ndetse n’ubuhamya nakuye mu rugendo nagiriye muri Afrika (DRC, TZ). Cyane cyane ariko ndibanda kurwo muri Congo kubera ko ariyo yari intego yanjye. Abenshi muri mwe rero baribaza bati ibyo wabikoreye iki, wabitekerejo ute, kandi wabigezeho ute?
Njye maze imyaka hafi 13 hano muri Leta Zunze Ubumwe za Amerika. Navuga ko natangiye gutegura urugendo rwanjye guhera icyo gihe cyose. Kuva nahunga mfite imyaka cumi n’irindwi, sinigeze numva ukuntu abantu bafite abaturage, amafaranga, ingabo z’igihugu ndetse n’impuguke zize ku isi yose bakurwa mu byabo, igihugu ababanjirije baharaniye, kikabanyura mu mitwe y’intoki.
Tugeze hanze y’igihugu sinatinze kubona impamvu. Umwiryane, ubugambanyi n’amacakubiri yaranze abagombaga kutuyobora, byatumye nibaza koko niba hari abagitekereza kuri bene wacu twasize muri Congo. Niba koko bajya bibuka ko twese tutashoboye kuguruka ngo tuze inaha mu mafoteyi n’amabyeri. Maze kuvugana na bamwe muri bo, nabonye ko gutabara impunzi zacu muri Congo bitari muri gahunda yabo ya mbere. Ahubwo ko bamwe biteguye kuzitangaho ibitambo ariko bakagera ku butegetsi vuba na vuba. Ibyo byose byanteye umujinya, bimpa n’imbaraga zo kujya gusura abacu bahejwe mu rubuga rw’isi tubamo. Aho nanyuze, uko nagezeyo ibyo bibara uwariraye, umunsi nugera muzabisoma mu gitabo.
Urugendo rwanjye rwamaze iminsi 30. Nageze mu turere tunyuranye turimo insisiro z’impunzi mu mashyamba y’inzitane, ibigo n’ibirindiro bya gisirikari bya FDLR ndetse n’ibya APCLS. Inkambi z’impunzi z’abanyekongo bahunze ibitero bya M23 n’indi mitwe y’abatutsi yababanjirije, ndetse nabonanye n’abasirikari ba FARDC hamwe na hamwe nagiye nyura.
Nkinjira muri Congo mu ijoro ryo kuwa 02/12/2012 nakiriwe n’ingabo za FDLR zigizwe cyane cyane n‘abasore b’abakongomani. Banyakiriye neza, bampa ifunguro n’aho kurara, umutekano ari wose. Muri icyo gitondo nafashe urugendo nerekeza ku bindi birindiro hagati muri Pariki ya Virunga. Nyuma y’amasaha ane mu isovu n’umukenke twageze ku birindiro bya mbere nakirwa n’umuliyetona n’ingabo ze bashinzwe ako karere. Aho niho hambere nahuriye n’ingabo z’ukuri za FDLR. Abanyarwanda bize ESM na ESO bavugana buri munsi n'icyo bita “Haut commandement”. Uwo munsi nabonye ibintu bibiri bitantangaje ariko na none byatumye mbubaha cyane:

• UKWEMERA: Bahise begerana bashimira imana ko nahageze, buri wese nabonye ko yambaye ishapure, cyangwa afite BIBILIYA hafi ye. Kuri uwo mugoroba liyetona n’abandi basirikari bariheje kugira ngo bavuge ishapure. Twasengeraga buri funguro, bavugaga buri kintu cyose bashyiramo ugushaka kw’imana.
• UBUHUGUKE (PROFFESSIONALISM): Nubwo badakize ariko buri musirikari yari yambaye bote, yogoshe, uniforme yuzuye nta bindi binyabasazi byongereweho, ukubahana no gutumanaho ubona mu gisirikari professional gusa. Ibyo byose nta mushahara bizana nabyo.

Aho nahamaze iminsi itatu ntegereje intumwa yari imaze iminsi hafi irindwi kugirango duhure hanyuma ingeze ku buyobozi bwa FDLR. Ku munsi wa 7/12/12 nawe amaze kuruhuka no kugarura ubuyanja we n’ingabo zimurinze, twafashe urugendo twerekeza mu cyerekezo cya MASISI. Twambutse imigezi ku migozi, twaraye mu mpyisi n’imbeba zitwibira uturyo mu ijoro, twanyagiwe hafi ya buri munsi, twambutse imihanda kuri metero mirongo itanu za position y’abasirikari ba Congo, turya ibigori, n’igikoma cy’ibigori.
Aha kabiri nageze ni mu rusisiro rw’impunzi z’abanyarwanda. Hagati mu ishyamba numvaga mu migani gusa. Byadutwaye iminsi itatu y’izuba n’imvura ntigeze mbona mu buzima. Muri urwo rusisiro twahageze tubatunguye mu ijoro ryo ku itariki ya 9/12/2012. Benshi mu bari bahari ni abagore b’abasirikari bari imbere ku itabaro. Muri abo bagore babo 8/10 ni abakongomani kavukire. N'ubwo twahageze mu ijoro barikokoye batubonera ifunguro ryiza n’amazi yo gukaraba, nuko turaruhuka.
Muri icyo gitondo niho nihereye amaso agahinda k’abana b’abahutu bamazemo imyaka hafi cumi n’itanu mu buzima nagereranya n’ubw’inyamaswa. Nta mubyeyi utari umupfakazi, nta mwana utari imfubyi, nta mugabo udafite ibikomere by’amasasu. Baba mu nzu inaha mu mahanga batashyiramo amatungo yabo. Ibyumba bibiri bya metero ebyiri kuri ebyiri n’igice, zose zisakaje kandi zubakishijwe ibyatsi. Nta mwana uzi gusoma no kwandika cyangwa uko ikaye isa. Iyo igicurane kimufashe iminsi ye iba ibaze. Kubw ‘Imana muri ubwo buzima barahinga bakeza. Barashaka bakabyara, baraganira bagaseka nubwo bitabashobokera guhisha agahinda kabahinduye.
Mvuye aho nakomeje urugendo nsura utundi dusisiro muri ayo mashyamba, hose inkuru ari imwe.
Tuvuye muri ako karere, twatangiye imisozi ihanamye. Tuzamuka tumanuka inshuro nagezaho ndambirwa kubara. Aho twanyuze hose twakiriwe neza n’abakongomani baba abasivili, milices, cyangwa FARDC.
Ku itariki ya 13/12/2012 twageze kuri “Quartier General ya Secteur Nord” kuri uwo musozi nakoraga ku bicu. Nahuye n’abasirikari bafite moral n’ ukwemera bidasanzwe. Baradutekeye baraducumbikira iminsi ibiri, ndetse mbona amahirwe yo kubonana na Commander Omega ushinzwe Operations muri Nord. Ikiganiro twagiranye kiranditse, ni kirekire kandi ni injyana, ariko nzagisohora mu minsi iri imbere.
Icyo ntazibagirwa ni uko ari umusirikari w’urwego rwo hejuru. Ndavuga ko yitanze kandi yitangiye abaturage yafatiye indahiro yinjira mu gisikari cya mbere cy’u Rwanda. Ntiyabuze iyo ahungira nk'uko abenshi bakunze kwibwira ko abarwana arababuza amahungiro. Yize muri France, no mu bindi bihugu, yari umupiloti kandi avugana ubuhanga cyane ku buryo atari kubura icyo akora hanze. Ariko yambwiye ati "inshingano yanjye ni iyi". Urukundo mfitiye igihugu ntirugira iherezo.
Ku itariki ya 15/12/2012 Col Omega amaze kudusezerera no kuduha abasirikari bashyashya, twakomeje urugendo muri iyo misozi twerekeza Masisi. Mu rugendo rwamaze iminsi ibiri dusura impunzi mu makambi no mu migi iri hafi aho, twageze kuri Sous-Secteur Operationel “Kanhan”. Nkuko bisanzwe twari dutose, dushonje, imisozi n’imizigo byaradukamuye. Lt Col Serge uyoboye iyo Sous Secteur yadutegetse gufata douche nuko atwakirana ikaze hari aba officiers be bose. Natangajwe no kubona ukuntu bahagaze, ukuntu ari organized, inzu zabo zubatse neza ku buryo nabonye nahaba nkahatura. Nyuma y’iki kiganiro muri bwumve ikiganiri cyihariye nagiranye nawe. Nibuka ko iminsi itatu nahamaze, nafashe amafoto yaho kubera ubwiza bw'ako karere. Nagenze henshi mu kazi kanjye ku isi, ariko ubwiza bwako karere ntahandi buba. Nuko nakwibuka Impunzi z’abana b’abanyarwanda maze kubona, nkibaza niba ndi kurota cyangwa naba napfuye nkaba ndi mu ijuru.
Ku itariki ya 18/12/2013 yaradusezereye, araduherekeza aturenza amarembo y’ibirindiro bye, ni uko turakomeza mu mvura y’amahindu ku buryo bwari ubwa mbere ntekereza ko nshobora kuhasiga ubuzima. Ariko kamere yanjye nibyo ikunda. Ni uko ndakomeza.
Ku itariki ya 19/12/2013 twageze mu mugi wa Kichanga aho MONUSCO yibera irya amafaranga y’ubusa. Urugero: Mai Mai Cheka iriwha na Kagame yari imaze iminzi ije yica abantu benshi barimo FARDC, APCLS n’abaturage, byose kugirango babirohe kuri FDLR. Abaturage ndetse na APCLS iyobowe na Jenerali Janvier wanze kugurwa na Kagame, bambwiye ko Monusco icyo yakoze yagiye ikifungirana inyuma y’imitamenwa yabo kugeza intambara irangiye. Aho nahamaze ijoro rimwe nganira n’abari bamaze iminsi bavuye mu Rwanda bambwira ko morali ari yose n'ubwo bose batakaje ababyeyi, abagore cyangwa abana babo.
Mu gitondo cyo kuwa 18/12/2013 twazamutse umusozi ntazibagirwa. Kuko kwari ngo kuzamuka igiti amasaha atatu.
Ku mugoroba twageza mu karere ka Kivuye (Zone Masisi). Aho naho harangwa n’imirwano ya buri gihe hagati y’imitwe y'ahahutu n’iyindi y'aba mercenaire ba Kigali. Hakaba hari inkambi nini cyane y'abakongomani b’abahutu bahunza M23. Aho niho nahuriye na Bwana Wilson n’abandi mu bagize commandement ya FDLR. Ikiganirio twagiranye abenshi mwaracyumvise, kuri Radio Itahuka, cyangwa kuri VERITASINFO.
Aho niho urugendo rwanje rwarangiriye. Mu byukuri nahavuye ntabishaka ariko igihe cyari kigeze.

Ubutumwa bampaye rero ni ubwo kubabwira ko batashize. Aho wenda bamwe baravuga bati ko urimo uvanga impunzi na FDLR? Nta tandukanyirizo ririmo. Abanyapolitiki bazashaka kubabwira ko ngo bashaka kuvugira impunzi ariko ko FDLR bidashoboka, muzababaza niba barigeze bigerera kuri terrain, FDLR iri ku rugamba niba mutabizi. Niyo irinda impunzi. Niba mufite bene wanyu bakiri muri Kivu batarabagwa n’abambari ba Kagame, si ukubera MONUSCO, cyangwa FARDC, ahubwo ni ubwitange n’urukundo rw’ingabo za FDLR. Amahanga na Kagame nibakomeza kubanduza n’imvugo z’ibinyoma zabo, mwere kubikomeza muceceka, cyangwa mubyemere. Ibyo si ugutiza ingufu ubwicanyi bwa Kagame gusa, ahubwo n’ukumworohereza gukomeza kumara abana b’abahutu. Ni ukuri ibi mbabwira. Ingabo za RPF n’indi agencies za Rwanda zifite gahunda yo kwica abahutu bariho, ndetse n’abazavuka. Muri Congo rero yahagize icyo nakwita “Kill Zone” ye. Amakambi menshi yuzuye muri Congo arimo ba kavukire bazira gusa ko batari Abatutsi cyangwa ko batamufasha mu migambi ye. Icyo nabasaba kuri uyu munsi wo kwibuka abatwibarutse ni ukwibuka ko twese turi ikiremwa muntu, ko hari umubyeyi waraye mu gihuru, umwana we yishwe n’umusonga, yaraye arira kubera ko umugabo we yaguye mu ishyamba.
ONG zose zanze kwemera ko impunzi ziriho. Organization yonyine yiyemeje kuzifasha, cyane cyane kuzirinda ni FDLR. Umunyapolitiki wese wirirwa yiyamamaza ngo avugira abanyarwanda, akaba atarakora iyo bwabaga ngo avugane na FDLR, cyangwa ngo ajye gusura izo mpunzi, nta kwitanga yari yerekana, nta rukundo afitiye iki gihugu abatubanjirije baturaze. Niba atinya kuvuga ko hari abana b’u Rwanda barimo bashirira hanze, kandi aribo bari imbere y’amacumu ya Kagame arimo arashaka iki? Abo batinya kuvuga ngo batarakaza ba shebuja, ntibizabatangaze bageze mu Rwanda bagakomeza kwicecekera. Abenshi navuganye nabo bakorera inyungu zabo, ntabwo bakorera abanyarwanda.

Abakunda u Rwanda n’abanyarwanda. Mubaze abayoboye amashyaka yanyu imigambi bafitiye abana bacu muri Congo. Niba ntayo mubabwire bafunge abitabo byabo, kuko nta kirimo. Imitwe y’abize iri hanze hano ni myinshi cyane. Mwarwaniye impunzi za 1959 ngo zitahe n'ingabo zazo, nimuvuganire impunzi za 1994 zitahe n'ingabo zazo. Benshi muri twe hano hanze barimo baratanga amafaraga atagira ingano mu Agaciro. Ni agahomamunwa ariko ntabwo igihe kirarenga cyo kugaruka bagafasha abana b’u Rwanda batereranwe. Gufasha ubutegetsi bwa FPR-Inkotanyi birutwa n'uko wagura amasasu ukoherereza RPF ugashyiramo n’ibaruwa ibabwira ko wifuzaga ko ayo masasu yakoreshwa bica bene wanyu hakurya muri Congo.
Ubutumwa bw’uyu munsi ntabwo ari politics, ni humanitarian crisis. Mu gihe nk'iki politiki irahagarara, umugambi ukaba imwe. “Gukemura ikibazo cyo gukiza ikiremwa muntu” . Nsabye ibi mbikuye ku mitima y’abari muri Congo.

Murakoze.

Jean Paul Rugero, alias Romeo.