Turakomeza igisubizo cyahawe Edson Rwumbuguza ku nyandiko ye yavugaga ngo "Ese koko mwahaye Kayumba Nyamwasa amahoro?". Iyi nyandiko ikurikira iyitwa Ese koko kuvuga Kayumba Nyamwasa uko ari ni uguca intege opozisiyo yabanyarwanda?.

Reka dukomeze dusesengure ibyo wanyoherereje mu nyandiko yawe.
Edson urakomeza ugira uti:
Ntabwo abantu bavuga ngo nuko abivuze ageze hanze ariko hagati ye na Kagame byari byaranze gucamo kuko batavugaga rumwe ku bugizi bwa nabi. 
Iyo nteruro irimo ingingo 2 ngira ngo tuvugeho kuko uzibyukije:
1- Kuba Nyamwasa avuze ageze hanze
2- Kuba Nyamwasa ataravugaga rumwe na Kagame ku bugizi bwa nabi.
Muvandimwe rero,
Kuki wareka kwibaza ku muntu wari ukomeye nk'uriya Nyamwasa, wari icyegera n'umujyanama wa Kagame, wari umuyobozi wa DMI iziho amarorerwa atabarika, wari umugaba w'ingabo zakoze jenoside y'abahutu mu Rwanda no muri Congo; kuki wareka kwibaza ku mpamvu atashoboye kugira icyo avuga imyaka 20 yose igashira. Harya ngo ntibavugaga rumwe ku bwicanyi bwari mu Rwanda? Abanyarwanda turi benshi ubu tutagishaka kugendera ku bigambo by'injijishabipinga. Dushaka ibimenyetso bigaragara. Dushaka kopi z'amabaruwa. Dushaka briefings y'ibyo yabwiraga abasirikari be ababwira ati tugiye kwica ariko sinari mbishyigikiye ni uko nabitegetswe na Chef Kagame...
Ese Edson muvandimwe.
Imyaka 20 yose Nyamwasa yica kandi ategeka aboherezwa kwica, hanyuma ngo 'hagati ye na Kagame byari byaranze gucamo kuko batavugaga rumwe ku bugizi bwa nabi'? Ubwo se ubugabo bwa Nyamwasa ni ubuhe niba avuga ko yakurikiraga buhumyi? Yagenderaga ku bwoba se akica kugira ngo Kagame atamwica? Ye?? Byaba byo se bwo twabishima? Yakubwiye se koko ukuntu atavugaga rumwe na Kagame ku bugizi bwa nabi nk'uko ubivuga? Kagame yamuhaga itegeko ngo nutabwira abasirikari bawe ngo bakoreshe songamane mu baturage, babahurize ku kibuga maze babarase, ni wowe ndica? Kagame yahaye Nyamwasa itegeko ngo niyumva ngo hari abaturage basohotse mu buvumo bw'i Kanama ari bazima aramuca umutwe? Kagame yahaye Nyamwasa itegeko ngo niyumva ko hari abagore n'abana barokotse igihe bapangaga gusenya inkambi azamuca umutwe? Kagame yahaye itegeko Nyamwasa ngo natavuga kuri televiziyo ko ashinzwe gutegeka kwica, ko nta mfungwa ashaka, ko adashinzwe gukora igipolisi, azamuca umutwe! Kagame yagorwa, yagorwa! Uwo mugabo Nyamwasa mubaraho ubugabo, yerekanye ubutwari yica abaturage batamurwanya kubera ko ari abahutu ariko ntiyerekana ubutwari abwira Kagame ati njye mu mategeko nize siko bikwiye kugenda.
Tubimushimire?
Ngo ntibavugaga rumwe ku bugizi bwa nabi? Nibyo nshaka nyine kumubaza. Azaze asobanurire rubanda ibyo batavugagaho rumwe, kandi atange ibimenyetso.
Ese ko Nyamwasa yagiye kuba ambasaderi, yagezeyo avuganira ingoma ya FPR Inkotanyi atemera ibyo ikora? Icyo gihe se ko yari hanze, Kagame atabona uko ahita amuca umutwe, yigeze ahingutsa ko hari ibyo atavuga rumwe na Kagame ku bwicanyi bw'Inkotanyi mu gihugu? Uwo mugabo se ubutwari aterekanye icyo gihe, ubutwari aterekana n'ubu ngo atubwize ukuri kwambaye ubusa ku marorerwa we n'izindi nkotanyi bakoreye abanyarwanda, mumutezeho kuzabwerekana ryari? Uwo mugabo se, udatinyuka gufata ijambo ngo abwire abatutsi aranguruye ati mutubabarire twarababeshye tubashora muri serwakira y'ubwicanyi n'ibinyoma, dutuma imibanire yanyu n'abahutu isubira inyuma, ni mugabo ki? Yakwizerwa ate?
Ese ra. Uretse no kutavuga rumwe ku bugizi bwa nabi, reka turebe nibura mu rundi rwego. Ko uzi ko ba Nyamwasa na ba Kagame kuva kera bashyizeho icyunamo cy'iminsi 100, kigenerwa buri mwaka ingengo y'imari mu Rwanda no mu mahanga ngo bibuke abatutsi bishwe n'Interahamwe nabwo biturutse ku nkotanyi, hari ubwo urumva Nyamwasa afata ijambo ati reka tugenere nibura umunota 1 wo kwibuka inzirakarengane z'abahutu zazize amasasu n'udufuni tw'ingabo yari ayoboye? Uwo niwo mugabo wagombye kuba yarize muri kaminuza ko kuvangura bibyara akarengane, intimba, amashyari, inzangano, amacakubiri n'imvururu, ariko akaba yarashyigikiye imyaka irenga 20 itoneshwa rikabije ry'abatutsi bene wabo mu gihugu. Hari ubwo se nibura urumva Nyamwasa avuga ati mureke twibuke n'abatutsi bazize ubugome bwa Kagame n'abo yayoboraga. Bene uwo mugabo mumutezeho iki?

Edson urakomeza ugira uti:
Koko mwahaye amahoro uriya mugabo Nyamwasa ko ibisigaye byose bikorwa n'iyi Radiyo tubishima. 
Yego ye! Ibikorwa na Radio Ijwi Rya Rubanda byose murabishima, uretse ko tudaha amahoro Nyamwasa wamaze abantu? Ngo mwahaye Nyamwasa amahoro? Abanyarwanda se yabahaye amahoro? Abanyabyumba se yabahaye amahoro? Abanyaruhengeri se yabahaye amahoro? Abanyagisenyi se, yabahaye amahoro? Abahungiye mu mahanga se yabahaye amahoro? None ngo twahaye Nyamwasa amahoro? Imvugo ziragwira!
Edson muvandimwe. Nyamwasa ashobora kuba nta mahoro afite, ariko rwose ubyumve neza, ntabwo ari ukubera Radiyo Ijwi Rya Rubanda. Umutimanama we niwo uzamubuza amahoro. Ese koko Nyamwasa yaratinyutse akubwira (cyangwa se abwira n'abandi bakarabya be) ko yabuze amahoro kubera Radiyo Ijwi Rya Rubanda? Oya! Radiyo IRR ntawe ibuza amahoro. Ahubwo iharanira ko bose bakwishyira bakizana, bakisanzura, bakagira amahoro yo mu mutima n'ayo hanze. Kumuha amahoro, ni ukumutumira tuti ba umugabo, ngwino wibohore, utubwire ikikuri ku mutima, wicuze ugikuye ku mutima, ikizaba kizabe ariko ukiranuke n'umutimanama wawe. Kayumba Nyamwasa, wita igihe ushandikisha intumwa zo kwiyama no gucecekesha abashaka ko ukuri kwawe kujya ahagaragara, ahubwo ngwino utumare amatsiko, udusobanurire icyo wapfuye na Kagame kandi warafatanije nawe gutsemba abahutu, ngwino utubwire neza niba waricujije, ibyo wicujije n'uko wicujije, ngwino utubwire neza icyo ugamije. Ubwoba nibwo butuma ukora ibyo ukora nk'uko no kuri Kagame mwafatanyije ibyaha ndengakamere, nawe ubwoba ari bwo butuma akomeza gukora ibyo akora avuga ngo 'uwasuze agirwa no kunutsa'. Twe twumva ko ukuri ariko kwonyine kuzagera aho kugaha Nyamwasa amahoro. Mugihe agihunga ukuri rero, azahora akurwa umutima n'abagaruka ku bibazo birebana n'amarorerwa yakoreye abanyarwanda kandi yashoyemo urubyiruko rw'abatutsi rwamwizeye, rukamwubaha, rukamwisunga, rukamureberaho, rukamugenderaho, rukamwumvira, rukamuriraho. Ese Bwana Rwumbuguza, aho uzi icyo bita 'role model' mu buzima bw'umuntu? Aho uzi kuba ureba so cyangwa so wanyu cyangwa nyokorome, ukaba uzi ko ari umuntu mwiza, witonda, ukwiye icyubahiro, w'igitangaza, udashobora kwica n'isazi... Wajya kwumva ukumva ngo ni rukarabankaba, ngo yarimbuye imbaga, ngo yakoze amahano n'ubugome bwinshi, ngo yamaze imyaka 20 agendera ku kinyoma kandi acyamamaza abizi... Birahungabanya!
Birumvikana rero ko ari abana ba Nyamwasa, ari bene wabo, ari n'abandi bamufataga nka role model (urugero wagenderaho mu buzima), niba imitima yabo atarayisimbuza amabuye kubera kubabeshya, bagira akabazo n'agatangaro iyo bumva ko mu gihe cy'imyaka 20 yose, yatinyutse gukorera abandi bana amarorerwa we atakwifuza ko abandi bakorera abe, ko yakoreye abagore b'abandi ibyo atakwifuza ko abandi bakorera umugore we, ko yakoreye ubwoko bw'abandi ibyo ubusanzwe atakwifuza ko abandi bakorera ubwoko bwe... Ibintu yakoze ni amahano ndengakamere adakorwa n'umuntu ufite umutima wa kimuntu. Bizamukurikirana kugera mu mva. Kwikoma abarokotse ubugome bwa Nyamwasa ngo boye kujya babugarukaho nabyo ni nko gusura mu ivu. Azavugwa kugera igihe ubutabera bubayeho, ndetse na nyuma y'aho. Amateka ni amateka. Kwibuka ni uburenganzira bwa buri wese.
Ikibazo rero si ukutubwira ngo 'mwahaye amahoro uriya mugabo Nyamwasa'. Ahubwo wari ukwiye kubwira Nyamwasa, uti 'wahaye abanyarwanda amahoro'.Wumvise Edson muvandimwe? Igikwiye ubu ni ukubwira Nyamwasa muti "wahaye abanyarwanda amahoro", ukareka kushinyagurira abo wiciye, ubahisha ukuri kandi unababeshya ngo noneho usigaye ubakunda, ngo uzabafasha kuva ku ngoyi wabashyizeho. Aho abatabizirikana ubu bazashobora kwigobotora ingoyi yo mu bwonko ashaka kubashyiraho?

Bwana Nyamwasa tega amatwi unyumve: mw'izina ry'abahekuwe nawe na Kagame na Kabarebe na ba Ibingira, mw'izina ry'abashavujwe nawe na Kagame na Kabarebe n'abandi mwafatanije, ndagusabye ngo wicishe bugufi, ureke kubeshya ba kirashukika na ba Kanyarengwe bashya, ureke gushaka kubabohesha iyo ingoyi nshya wavumbuye, ingoyi ibazirika mu bwonko.
Mbere yo gukomeza, reka mfungure ka parenthese ngire icyo mvuga kuri iyo ngoyi yo mu bwonko.
Edson wigeze kwumva bavuga Syndrome de Stockolm? Reka nkubwire ibyabaye mu mateka ya vuba aha.
Hari ku tariki ya 23/08/1973. Umunyururu witwa Jan Erik Olsson yatorotse gereza yari afungiyemo, agerageza kujya kwiba amafranga muri ajansi ya Banki Kreditbanken yo mu karere ka Norrmalmstorg i Stockolm ho muri Suwedi. Abashinzwe umutekano batabaye, yafashe abakoze 4 ba banki ho ingwate, yifungirana nabo muri banki. Mu mishyikirano yagiranye n'abapolisi, bagombye kumwemerera ko mugenzi we Clark Olofsson wari muri gereza arekurwa akahamusanga. Imishyikirano yamaze iminsi 6, irangira arekuye izo ngwate yari yafashe.
Ibyakurikiyeho nibyo biteye amatsiko. Abo yari yaragize ingwate bakoze uko bashoboye kwose ngo baburizemo umugambi w'inzego z'umutekano zo gukurikirana uwo Jan Erik Olsson wari wabashimuse akabamarana icyumweru. Nyuma banze rwose no kujya kumushinja mu rukiko, ahubwo bakajya bamusura muri gereza ndetse ahubwo bagafasha abamuburanira. Ndetse yaje no gukundana n'umwe muri abo yari yafasheho ingwate witwaga Kristin.
Umunyamerika Frank Ochberg w'umupsychiatre, ni ukuvuga wazobereye mu byo gusesengura imyifatire y'abantu, ari mu ba mbere basesenguye iyo myifatire y'abahemukiwe bageze aho bakita "syndrome de Stockolm".
Ni uburyo abantu babana n'abantu babahemukiye bagera aho bakazamo ikintu cyo kubumva, kubakunda no kubarengera, ku buryo ndetse bashishikarira kurwanya umuntu wese ushaka kuvuga ku buhemu bwabo. Ku buryo ndetse bashobora no kwumva bakwemera ku bwende bwabo guhehera uwabiciye akabasiga iheruheru! Niyo ya ngoyi yo mu bwonko navuze haruguru.
Aho, nyuma y'ihahamuka rya rusange ryaturutse ku marorerwa y'Inkotanyi, syndrome de Stockolm si imwe mu ndwara zibasiriye abanyarwanda bo mu bwoko bw'abahutu muri iki gihe?

Edson arakomeza interuro ye agira ati:
None se koko ubu umugaba w'ingabo Serubuga yaryozwa ibintu byabaye ku bwa Habyarimana byose ngo nuko yari umukuru w'ingabo? 
Bwana Edson,
Mpereye kuri ibi uvuze, ndibaza niba kwandika ibintu nk'ibi ari ikimenyetso cy'umuntu ufite ubwenge buzima cyangwa bwamunzwe. Ndakeka ariko ko ari uburyo wumvaga wabonye bwo kunyereka ko uri inararibonye, ukaba ushobora kugereranya abantu n'abandi, ukaba ushobora kugeraranya ingoma n'izindi, ukaba uzi kugeranya ibyaha n'ibindi.
Muvandimwe Edson rero,
Reka twumvikane.
Icyaha ni gatozi. Uzabaze abanyamategeko, Nyamwasa na Gahima nabo barayize, uzababaze icyo bivuga, nizera ko bazamfasha kugusobanurira.
Ndagira kandi ngo wumve neza ko kuba umugaba w'ingabo atari icyaha. Icyaha Nyamwasa akurikiranwaho ntabwo ari uko yari umugaba w'ingabo. Ni ibyo yakoze byuzuye umujinya n'ubugome, yaba mbere yo kuba umugaba w'ingabo, yaba igihe yari umugaba w'ingabo, yaba na nyuma yaho.
Tubyumvikaneho rero: Niba hari ibyaha Habyarimana yakoze, bigomba kugaragazwa, bikabarwa kuri Habyarimana. Niba hari ibyaha Serubuga yakoze bigomba kugaragazwa, bikabarwa kuri Serubuga. Niba hari ibyaha Kagame yakoze, bigomba kugaragazwa, bikabarwa kuri Kagame. Niba hari ibyaha Nyamwasa yakoze bigomba kugaragazwa, bikabarwa kuri Nyamwasa. Icyaha ni gatozi.
Ikindi kandi muvandimwe, ndagusaba nkomeje kuvana Habyarimana mu majwi, kuko nta bugome yari afite nk'ubwo abo ushaka kumugereranya nabo berekanye. Niba utabizi, nabwo uzafate umwanya uze hano kuri radiyo Ijwi Rya Rubanda umpe ibitekerezo byawe nguhe ibyanjye ku ngoma ya Habyarimana. Habyarimana yari umubyeyi, ntaho ahuriye na bariya banyamujinya bababazwa n'uko hari abashoboye kubacika batabarashe cyangwa ngo babakubite agafuni.
Umuntu ugishaka kuvuganira Kagame na Nyamwasa, akabikora ashyira Habyarimana mu majwi hato na hato ni uwo bita 'demagogue'. Uwo ari muri ba bandi bazobereye mu gupanga ibinyoma bageze n'aho bumvisha isi yose ko indege yari itwaye abaperezida babiri b'abahutu ngo yahanuwe na Madamu Habyarimana n'icyo bise intagondwa ze kugira ngo bamwikize maze ngo babone uko bica abatutsi. Abo bademagogue ubu basigaye basubira aho banyuze bavuga ngo burya irya myaka yose twarababeshyaga, ngo ariko noneho nimuhumure ubu ho turi kubabwiza ukuri. Ariko ye, Bazumvaryari ni umwana w'umunyarwanda!
Maze rero Edson muvandimwe, nongere ngusabe: uritonde, urashishoze. Urige kujya ugereranya ibigereranywa. Habyarimana ashobora kuvugwaho amakosa yakozwe igihe yategekaga, ariko nta bugome yategekanaga, nta mujinya yategekanaga. Yewe n'abami bategetse mbere ya Habyarimana, nta bategekanaga ubugome, umujinya n'ubusambo nk'Inkotanyi za Kagame na Nyamwasa na Kabarebe zaduteye ziturutse i Bugande. Ubugome twabonye kuri iyi ngoma ya FPR Inkotanyi burenze n'ibyakorwaga ku gihe cya Kanjogera! Abazi amateka batubwira.
Niba ugereranya abagaba b'ingabo rero: nabwo uritonde woye gukomeza kubeshya nkana ba Bwengebuke. Umugaba w'ingabo Serubuga wamuvugaho ibyo ushaka byose, ariko njye ntaho numvise bavuga ko yamishe amabombo ku batutsi ibihumbi n'ibihumbagiza byateranirijwe ahantu yamaze gufata icyemezo ko ari bubice. Sinihanganira abantu bapfa guhubagura ibigambo gusa badashoboye kwerekana ibimenyetso biherekeza ibyo bavuga.Niba uzi kugereranya koko, uzambwire ubwicanyi bugamije gutsemba ubwoko Serubuga yakoze haba igihe yari umugaba w'ingabo haba na nyuma y'aho. Nabwo nimbumenya nzabwamagana nta kabuza.
Nizere rero ku tubyumvikanyeho.
Nyamwasa azabazwa ibye yakoze, Kagame abazwe ku byaha yakoze, Habyarimana abarweho ibyaha yakoze na Serubuga abazwe ku byaha yakoze.
Ese ba Bagosora baheze mu buroko barakoze amarorerwa nk'ayo Nyamwasa yakoze? Ese ba Nyamwasa bamanika Karamira, bemeza koko ko yari yarakoze ibyaha bishobora kugereranywa n'ibyo Nyamwasa yakoze?
Reka nkwibutse uku kuri bamwe bashaka kwirengagiza. Kugeza ubu, n'urukiko mpuzamahanga rwashyiriweho ibyaha ndengakamere byabereye mu Rwanda muri 94 ntirwashoboye kwerekana ko jenoside yakorewe abatutsi yateguwe. Byagaragaye ko yabaye impubukiraho y'abaguye mu mutego w'abivuganye umubyeyi Habyarimana wahoraga ndetse yibutsa abanyarwanda ati: "Mwirinde kugwa mu mutego w'umwanzi". Ariko nta n'umwe ushidikanya ko jenoside yakorewe abahutu yo yateguwe, n'ikimenyimenyi n'abayiteguye (abo ba Kagame na ba Nyamwasa) barabyigambye. Kuba nta rukiko rurahagurukira gukurikirana abayikoze ntacyo bihindura kuri uko kuri.

Erega Edson ntugire ngo abatutsi bayobewe ko Kagame na Nyamwasa bafatanije kubaroha no kubataba mu nama. Abenshi ubu barashavuye. Bazi ko ababo bagombye kuba bakiriho iyo abo ba Kagame na ba Nyamwasa badategura amarorerwa bakoze. Barumiwe, nabo bafite ubwoba, ntibazi icyo bakora. Bazi ko kuvugisha ukuri aribyo byonyine bizatanga amahoro muri kiriya gihugu cyacu, ariko nabo ntibatinyuka kukuvuga. Nabo bari kuri ya ngoyi yo mu bwonko twavuze. Abenshi barangwa no kugira indimi ebyiri, urw’ibyo bavuga mu bandi n’urw’ibyo bavuga biherereye. Hari abirirwa barata ibigwi bya Kagame na FPR ayobora, ariko bagera ahiherereye cyangwa iwabo mu ngo bakarira bakaganya bagira bati twigeretseho urusyo twizera ziriya nsoresore zaturutse i Bugande, twikoreye ishyano twemera kwinjira muri FPR Inkotanyi. Benshi bazirikana ubugome ndengakamere nabo bazi bwakorewe abahutu iyi myaka yose, bagasuhererwa bibaza bati ese abahutu bazabigenza bate koko nibongera guhabwa ijambo muri iki gihugu?
Abo bose ndabibutsa ko gukingira ikibaba ababashyize muri ako kaga ari uburyo bwo gushyigikira amarorerwa bakoze. Siwo muti rero. Umuti uzaturuka mu bazaba biyemeje kuvugisha ukuri babikuye ku mutima. Nibatinyuke rero, bajye ahagaragara, bamagane abicanyi aho bava bakagera. Niberekane ubutwari nk'ubwo ba Ruzibiza, ba Ruyenzi, ba Mushayidi n'abandi berekanye biyemeza kwamagana ku mugaragaro inkoramaraso izo arizo zose.

Muvandimwe Edson rero,
Ndagusabye rwose, ntuzongere kwitesha agaciro witambika ngo urarengera umuntu w'umwicanyi, ushaka kugereranya ibintu bitagereranywa.Waba ubizi waba utabizi, ushobora kuba uri muri ba bandi bashaka gukina ku mubyimba cyangwa kugira ibikoresho ba banyarwanda bafite mu mitwe hahungabanye ku buryo bibarushya gutekereza ku marorerwa yabereye mu Rwanda atewe n'Inkotanyi za Kagame na Nyamwasa, ubu bakaba bifuza icyabasezeranya agahenge icyo aricyo cyose. Abo bamaze kurambirwa, bamaze kwishyira mu mitwe ko inyaryenge arizo zikwiriye guhabwa ijambo, ku buryo ubabwira ibikocamye bene nk'ibi umbwiye bagatinya no kukubwiza ukuri kwabo no kugusaba kwisobanura bagira ngo cya cyizere gitangiye kubavukamo kitaguruka. Hari abatangiye kwemera ko nta kuntu wavanaho inkoramaraso udakoresheje indi nkoramaraso, ko nta kuntu wavanaho umugome udakoresheje umurusha ubugome. Birababaje.
Ni hahandi ariko, ukuri ndakuka ni uko nitutubakira ku kuri no ku bunyangamugayo, n'ubundi tuzasigira abana n'abuzukuru bacu igihugu gishobora kuzagira agahenge igihe gito, ariko bakongera bagahura n'ingorane nk'izo turimo ubu. Igihe cyo kuvugisha ukuri, ni ubu, si ejo hazaza. Igihe cyo guharanira ukuri, ni ubu, si ejo hazaza. Ubwira uwumva ntavunika.

Reka noneho dusuzume interuro ikurikiyeho muri iyi nyandiko ya Edson Rwumbuguza. Arakomeza agira ati:
Ibi ni ugukabya cyane mu gihe bizwi neza ko mu bitero byarimbaguye abahutu muri Kongo nta zina rya Kayumba ririmo, n'ubwo yari umukuru w'ingabo ariko hari ibyo atamenyaga, uretse kuba yarahawe amabwiriza na shebuja kohereza no gupanga ingabo nk'uko ba Ndengeyinka bose bagiye baba ibikoresho. 
Iyi nteruro nayo irimo ingingo nk'enye tutareka kuvugaho:
1- kuvuga ko Nyamwasa ari umwicanyi ni ugukabya cyane
2- bizwi neza ko mu bitero byarimbaguye abahutu muri Kongo nta zina rya Kayumba ririmo?
3- yari umukuru w'ingabo ariko hari ibyo atamenyaga
4- kuba yarahawe amabwiriza na shebuja kohereza no gupanga ingabo nk'uko ba Ndengeyinka bose bagiye baba ibikoresho.

Reka duhere ku gitekerezo uvuze cya mbere kivuga kiti:
1- kuvuga ko Nyamwasa ari umwicanyi ni ugukabya cyane
Muvandimwe Edson,
Nari ntekereje kuvuga ko uteye isoni, ariko ndifashe. Ndumva napfa kuba mvuze ko uteye agahinda. Icyo nemeza cyo ni uko uteye kwibaza.
Ngo kuvuga ko Nyamwasa ari umwicanyi ni ugukabya cyane! Nyuma y'amarorerwa twavuze haruguru yakoze, yategetse gukora cyangwa yorohereje abandi gukora, urumva koko kuvuga ko Nyamwasa ari umwicanyi ari ugukabya? Kera bajyaga bavuga ngo nta murozi wabuze umukarabya. None ubu byabaye kure kubi: Umurozi niwe usigaye agira abakarabya!

2- Mu gitekerezo cya kabiri, uti bizwi neza ko mu bitero byarimbaguye abahutu muri Kongo nta zina rya Kayumba ririmo?
Ngo bizwi neza? Bizwi na nde ko nta zina rya Kayumba Nyamwasa ririmo? Wowe urabizi? Ubizi ute? Yamaze kugusobanurira ukuntu bapanze iyicwa ry'abahutu muri Zayire, maze wemeza ko izina rye nta ririmo. Niba se mu mazina ufite irye ritarimo, usanze yaragize uruhare mu kurimbagura abahutu muri Zayire, iryo zina wakwanga kuryongeramo ngo ni uko ari Nyamwasa.
Edson rero uzambarize rwose Kayumba Nyamwasa uvuganira niba nta ruhare yagize mu gupanga no kuyobora ibitero byibasiye abahutu muri Congo. Azagusubize ku mugaragaro, nimukenera urubuga abivugiraho uzambwire mbatize. Nifuza ko ukuri azakubwira uzakutugezaho. Mbere yo kubimubaza, uzanyarukire kuri Youtube umurebe aho yigamba muri interview ukuntu bakoze ibyo abazungu batatekerezaga ko bashobora gukora, bagafata icyemezo cyo gusuka amabombo ku nkambi ngo abagomba kwicwa bicwe, ababa ingaruzwa-masasu basubire i Rwanda.
Ikindi kandi, nugeraho ukemera ko tuganira, uzansobanurira criteres uzi zuzuzwa n'umuntu w'umwere noneho unyereke ukuntu Nyamwasa azujuje... nanjye nzakubwira criteres mbona zuzuzwa kugira ngo umuntu abe cyangwa yitwe rukarabankaba, inkoramaraso. Uzamfasha yenda kwerekana ko uwo Kayumba Nyamwasa urengera atazujuje. Uzaze rwose tuganire utubwire ukuntu ibyo bavuga kuri Nyamwasa ari ukumubeshyera.

3- Mu gitekerezo cya gatatu uragira uti: n'ubwo yari umukuru w'ingabo ariko hari ibyo atamenyaga. 
Urahangara wa mugabo we. Erega ngusubiriremo, Kayumba Nyamwasa ntazabazwa ibyaha atakoze cyangwa ibyakorwaga atabizi. Ariko azabazwa ibyabaga abizi. Azabazwa ibyabaga abitegetse cyangwa abishyigikiye, yaba igihe yari mu nyeshyamba, yaba igihe yari muri DMI, yaba igihe yari umugaba w'ingabo, yaba ndetse n'igihe yari Ambasaderi. Azabazwa igihe yagiye amenyera ubwicanyi bwabaye n'ababukoze. Azabazwa icyo yakoze n'aho yari ari igihe batundaga abahutu bo mu Mutara bajya kubatwikira muri parike... Azabazwa kandi impamvu ntacyo yavuze mu myaka makumyabiri yose kandi abona buri munsi ubwicanyi bukorerwa abaturage. Ntiwihe rero kumubera avocat. Ntayobewe uko ubufatanyacyaha buvumburwa cyangwa bukurikiranwa.

4- Mu gitekerezo cya kane, uragira uti: uretse kuba yarahawe amabwiriza na shebuja kohereza no gupanga ingabo
Mbese ku bwawe kwohereza ingabo no kuzipanga uzi ko zigiye mu butumwa bwo kwica inzirakarengane zitakurwanya, wumva bitagombye guhanirwa? Ibyo aribyo byose, ibyo guhana ni iby'urukiko, si ibyacu. Erega Edson, nta tegeko ribuza uwagiriwe nabi gushinja umugizi wa nabi, nta tegeko ribuza umwenegihugu kugaragaza ibimenyetso bishinja uwo aziho, abaraho cyangwa akekaho ubugizi bwa nabi. Ikibuzwa n'itegeko, ni ukwihanira! Ntiwatubuza rero kuganira no kwibaza kuri uwo mugabo w'umwicanyi Nyamwasa mushaka kujya inyuma ngo tumenye neza uwo ariwe koko?
Kuvuga ngo Kayumba Nyamwasa yahabwaga gusa amabwiriza na shebuja, ibyo se byerekana ko Nyamwasa ari muntu ki? Ni mugabo ki? Ni mujenerali ki? Umujenerali ukora amarorerwa ngo kubera ko shebuja yamuhaye amabwiriza gusa? Amabwiriza yo gutsembatsemba abahutu biruka n'uturago ku mutwe, batagira kivurira! Amabwiriza yo kubahiga abica Kongo yose, ibirometero ibihumi n'ibihumbi! Uwo muntu mukavuga ko ari umuntu ukwiye kujya imbere y'abandi akivuga ibigwi, akabasaba kumukurikira buhumyi, ngo azabageza mu gihugu yabatesheje! Uwo niwo mugabo koko uvuga ngo nibamuvuga ukuri opozisiyo izacika intege? Ubu se nzagutere icumu, hanyuma nigire umwere ngo ni uko nabitegetswe? Bwana Rwumbuguza sinzi uko warezwe n'ibyo wize, ariko sinajyaho ngo nkubeshye: ku bwanjye kubona uhangara ugakoresha arguments nk'izi z'amatakirangoyi n'amarimanganye ngo uri kurwana ku mwicanyi ruharwa, bigushyize mu rwego ruri hasi y'urwo hasi.
Ko Nyamwasa yize amategeko se muri kaminuza, arateganya koko kuziregura avuga ngo nicaga kubera ko nabaga nahawe amabwiriza na databuja? Ngo napangaga ingabo n'amasasu n'udufuni byo kujya kwica abasivili ari uko nabitegetswe n'umwicanyi Kagame? Nyamwasa, niba ari aho ugeze, ugeze aharindimuka.
Kagame yari mayibobo. Nyamwasa wari maitre mu by'amategeko. Ugatinyuka ukamwitakana koko ngo wicaga kubera ko Kagame yabigutegekaga? Namwe Abanyurwamanuma bo mu buhungiro mukabyemera koko? Ni ishyano pe! Ese mwumva igipfayongo ari nde? Wari uzi ko na Kagame ashobora kuzatarataza avuga ko ari ba Nyamwasa bamugiraga inama, ko aribo babipangaga byose, cyane cyane ko banigamba ko bize iby'amategeko? Ni ukuvuga ko babikoze babizi kandi babishaka. Inkotanyi zose nizibimenye. Kwitakana undi ntawe bizagira umwere.

Nyamwasa rero, niba ushaka ko abanyarwanda bakwumva, wikomeza gushaka za excuses. Wikitakana uwo mwafatanyije ubwicanyi ngo yarabigutegekaga. Ni nk'uko ntawe uzagirwa umwere mu nkotanyi ngo kubera ko yitakanye ko wamutegetse kwica abasivili. Ibyo urabizi. Emera upfe kigabo. Erura uvuge ibyaha wakoze byose n'uko wabikoze, wemere icyaha nta za excuses uzanamo, maze ubwire abanyarwanda uti igihano muzangenera nzacyakira. Nta kindi. Wirinde kandi kuvuga ngo nzababwiza ukuri ari uko mubanje kunyemerera ko mumpaye imbabazi!

Gusa wowe Bwana Rwumbuguza, icyo nagusaba ni ukudakomeza gushinyagurira no gukina ku mubyimba abo ingabo za Nyamwasa ziciye! Ubu baracecetse ariko barashavuye. Barahahamutse, ariko ntibazibagirwa urwo ababo bapfuye ngo ni ukubera propagande yanyu yo gushaka kugira umwicanyi umwere. Guhangara ukavuganira umwicanyi ruharwa, umuntu ubarwaho jenoside y'abahutu, ni ukwigerekaho urusyo. Wowe n'abo mufatanije, mwamuretse akibandirwa? Ucecetse ntacyo byagutwara. Urongera intimba y'abarokotse, kandi ndakubwiye si byiza na buhoro.

Kuri iyo nteruro yawe ivuga ko Nyamwasa hari ibyo atamenyaga, ko yahabwaga amabwiriza na shebuja, uragerekaho ngo "nk'uko ba Ndengeyinka bose bagiye baba ibikoresho"!
Yee! Kayumba Nyamwasa yari igikoresho cya Kagame nk'uko ba Ndengeyinka bari ibikoresho. None se ubu twavuga iki ku bashaka ubu kuba ibikoresho by'igikoresho cya Kagame!
Abanyarwanda babaye nk'inzuki zitagira urwami koko! Biteye agahinda.

Inama nagira abanyarwanda batariheba kandi batarijugunya mu maboko y'uwabiciye kubera ya ngoyi yo mu bwonko twavuze, ni ukutizera umuntu witakana abandi ngo baranshutse, ngo nakurikizaga gusa amabwiriza nahabwaga, ngo hari ibyo ntamenyaga.
Akabazo nkwibariza Bwana Edson,
Ko wabonye ubutabera mu Rwanda no mu mahanga, hari abo bahanaguraho ibyaha biremereye nka biriya by'ubwicanyi ngo ni uko bavuze ngo bahawe amabwiriza? Abahutu se baguye muri gereza na za konteneri cyangwa abakiziboreramo ni bangahe bashinjwa kuba barashowe mu bwicanyi batagambiriye bo ubwabo. Ndabona uwakugira avoka wa Nyamwasa washobora kumugira umwere koko!
Wowe ushobora kuba ukina umukino utazi. Nyamwasa we azi ibyo arimo, umugambi arimo ni uwo gupanga igikuta cya ya syndrome ya Stockolm ku buryo igihe cyo kujya mu butabera nikigera, bamwe mu biha kuvuga ko bahagarariye abo yagiriye nabi, abo ba Kanyarengwe bagezweho, bakazahaguruka nk'ibishwamwinyo, bakamurwanaho bagira bati 'ubwo mufashe Kagame birahagije, nabe ariwe uryozwa ibyaha byose byakozwe n'Inkotanyi kuva muri 90 kugeza ubu!"
Nguwo umutwe ashobora kuba arimo, inyandiko nk'iyi yawe ikaba ariho ishaka kuganisha, igamije kwoza ubwonko bw'abaharanira ubutabera.

II- Imvugo ko ikibazo ari Kagame gusa
Edson muvandimwe,
Igice cya kabiri cy'inyandiko yawe watangaga igitekerezo cyawe ko Ikibazo ari Kagame gusa.
Uragira uti:
Ikindi cya kabiri nenga mu mikorere ni aho muvuga ko ikibazo abanyarwanda bafite atari Kagame gusa, ariko njye nsanga neza ko ariwe bwite. N'ubwo mutabyumva neza, abahanga bavuga ko umutwe ariwe ugaragaza uko umubiri wose uhagaze.
Uti: Kagame azwiho ubugome bukabije ndetse ibikorwa byose niwe ubipanga akabikorana n'abo yarangije guhugura kandi nyuma akazanabica. 
Ugarutse kuri rya jambo ngo ikibazo ni Kagame gusa? Ariko muvandimwe Edson, mfite amatsiko yo kumenya impamvu ushishikariye kujijisha rubanda no kubashinyagurira.
Uravuga uti "Kagame azwiho ubugome bukabije"! Kagire inkuru. Dusobanurire neza wowe ubizi neza. Niba Kagame azwiho ubugome bukabije se, bivuga ko nta wundi uzwiho ubugome bukabije? Nyamwasa se ko azwiho ubugome bukabije, ni Kagame? Kabarebe se ko azwiho ubugome bukabije, ni Kagame? Bariya bacunga DMI se ko bazwiho ubugome bukabije, ni Kagame?
Umugome Kagame ntacyo yageraho atifashishije abandi bagome. Barakeneranye, barakorana, baruzuzanya.
Iyo umugome ageze aho akananiranwa n'abandi bagome kubera impamvu zabo, ntibimuhanaguramo ubugome yari afite mu mutwe, mu mutima, mu maraso. Ntibinamuhanaguraho icyaha aba yarakoze igihe yari afatanije n'abandi bagome igihe bari bacyumvikana.
Nta kujijisha rubanda rero ngo umugome mu Rwanda ni Kagame.
Wari ukwiye kunsobanurira iyo ngereranyo utanze ivuga ngo 'umutwe ugaragaza uko umubiri wose uhagaze'. Ku bwanjye rero muvandimwe, Kagame ashobora kuba ari umutwe w'ikiyoka cyuzuye ubugome cyitwa FPR Inkotanyi, cyamaze no kubyara utundi twa Kagame twinshi tujejeta hirya no hino mu gihugu no hanze yacyo, ku buryo ukivanyeho umutwe Kagame bitakibuza gukomeza kubaho no gukomeza gukorana ubugome nk'ubukoreshwa ubu. Erega iyi myaka yose isaga 20 ishize, nta kindi bashyize mu mitwe uretse kwiyumvisha ko kwica umuhutu cyangwa kumwambura utwe ku ngufu cyangwa ku mayeri ayo ariyo yose atari icyaha! Ba Kagame, ba Kayumba Nyamwasa, ba Kabarebe, n'abandi bafatanyije imbere mu gihugu no hanze, babibye urwango rukomeye n'ubugome mu mitima y'insoresore ku buryo zidashobora kubaho ngo zituze zidashyize mubikorwa ibyo zigishijwe. Uwiba ahetse aba abwiriza uri mu mugongo.
Wumvise bariya bari b'u Rwanda bakora umwuga w'uburaya bakinirwaho bakicwa buri munsi kandi ingabo za Kagame ziba zijarajara hose? Wumvise bariya basore bavunagurwa amaboko n'insoresore zisa n'izipiganwa mu kwerekana ibigwi byazo mu kugirira nabi abandi ngo nibwo buryo bwo kwimara irungu? Ese aho wibwira ko ari insoresore z'abahutu zikoze ibyo kabiri gatatu, zikabikorera ku bana b'abatutsi i Kigali cyangwa ahandi, hashira kabiri batarazifata cyangwa batarazikubita agafuni? Rero kubera ko ntabwoko buba mu Rwanda, ntidushobora kumenya ababikora abaribo n'ababikorerwa abaribo!Ahaaa.
Tugarutse kuri ibyo birebana na Kagame, mpora mbivuga kuri Radiyo Ijwi Rya Rubanda: kuvanaho Kagame si wo muti. Umuti, nabikubwiye, ni ukuvanaho burundu umutwe FPR Inkotanyi wakoranywe ubuhanga n'ubutiriganya buhishe ubugome ndengakamere twese twabonye iyi myaka yose. Ni wo muti. Abashaka kuwukikira bafite impamvu zabo.
Nakugira inama rero Edson, uzicare wongere usubire witonze muri ibi nkubwiye byose, uzirikana buri jambo. Uzagera aho usobanukirwe. Nudasobanukirwa kandi, nakubwiye ko mpari kandi ngutegereje, uzaze tubijyeho impaka. Si wowe wenyine mbwira, n'undi wese waba yumva atanyuzwe azaze tubijyeho impaka ku rubuga rwa Radiyo Ijwi Rya Rubanda.

Mu gitekerezo gikurikiraho, uragira uti: ibikorwa byose niwe ubipanga akabikorana n'abo yarangije guhugura kandi nyuma akazanabica.
Mbe Edson, Kagame yahuguwe na nde? Nyamwasa yahuguwe nande? Niba se Kagame abahugura mu gukora ibibi, wibwira ko abo bahuguwe na Kagame, bagakoresha ubugome yabigishije, bo ubu atari abagome? Ngo arabipanga akabikorana n'abo yarangije guhugura, nyuma akazanabica. Hejuru aha twavugaga kuri Nyamwasa, aho wihandagazaga ukavuga ko yakurikizaga amabwiriza gusa kimwe nka ba Ndengeyinka. Ese Nyamwasa yaba yarababwiye ukuntu n'amashuri yari afite, yaje guhugurwa na Kagame mu bikorwa by'ubwicanyi none ubu akaba abatuma ngo mwamamaze hirya no hino ko we ari inyangamugayo, ko ubwicanyi yakoze yabukoraga kugira ngo yumvire uwamutoje ubugome kandi akaba yaranabumutegekaga! Ndumva Kayumba Nyamwasa yiregura agira ati rwose ntimundenganye, njye ndi umuntu mwiza, ni umwicanyi Kagame wanyigishije kwica, akaba yaranantegekaga kwica kandi muribuka ko nanjye yageze aho agashaka kunyica! Ni ukuduha urw'amenyo.

Uti: Gukuraho Kagame ni igisubizo ku banyarwanda kuko nibwira ko ntawundi musirikari wakora ibyakozwe na Kagame ngo bishoboke igihe Kagame yaba akiri ku ngoma.

Ngo ntawundi musirikari wakora ibyakozwe na Kagame ngo bishoboke? Ni ibyo wibwira nyine.
Wa mugabo we, inda yabyaye, ikarera umugome Kagame yabyaye n'abandi, abo nyine bamufasha mu bugizi bwa nabi. Uragira se ngo tureke kugendera ku byo twibonera, tugendere kuri ibyo wibwira.

Uti: Ikibazo ni KAGAME inshuro 1000 n'abandi bose bakora ibibi Kagame ni incarnation y'ibyago by'abanyarwanda, bityo rero agomba kuba Target kuruta kuvuga inkotanyi zose, kuko murizo habonekamo abantu bazima kandi beza ndetse bagenda banitandukanya n'ubugizi bwa nabi bakerekeza imahanga. 
Uti "muri zo habonekamo abantu bazima kandi beza". Ibyo ni byiza. Ni byiza nyine ko habonekamo abantu bazima kandi beza. Abo bazima kandi beza yabagize ingwate, nako biyemeje kuba ingwate z'abagome, abanyakinyoma n'abicanyi. Ibihe birakomeye rero. Abo bazima kandi beza baboneka mu nkotanyi noneho niberure bagaragare, bamagane ubugome n'ubusahuzi bw'imitungo, bitandukanye na ba sekibi babashoye mu nzira y'ikinyoma n'inzigo kuva muri za 90. Ntiwashyigikira umugome uzi neza ibibi akora, ntiwatungwa n'ibyaturutse mu mitungo y'abishwe, ababeshyewe n'abahugujwe n'abagome, ngo wowe ugende wiyemera ngo uri mwiza cyangwa uri muzima.
Nkurikije uko mbizi rero muvandimwe, niwamagana ibikorwa bibi by'Inkotanyi aho biva bikagera, ntibizaba bikubujije kwamagana uzikuriye ubu Kagame. Ibyago by'abanyarwanda byatewe n'umuryango w'inkoramaraso FPR Inkotanyi, ntibyatewe na Kagame wenyine. Njye nemeza ko FPR-Inkotanyi ari umuryango wakoze ibyaha ndengakamere, ugomba guseswa, abawurimo bagakurikiranwaho ibyaha bakoze, buri muntu ku giti cye. Uzaba yari Inkotanyi bikagaragara ko nta cyaha yakoze gihanwa n'amategeko y'u Rwanda cyangwa amategeko mpuzamahanga, ubwo azaba ari umwere, akomeze ubuzima bwe nk'abandi bose batagira icyo bikanga. Uzaba yari Inkotanyi bikagaragara ko hari ibyaha yakoze bihanwa n'amategeko y'u Rwanda cyangwa amategeko mpuzamahanga, ubwo ubutabera buzagena uko bigomba kumugendekera nk'uko bigenda hose ku bagizi ba nabi.
Gutinya kuvuga ukwo kuri, ni ukwihemukira, akaba ari no guhemukira u Rwanda rw'ejo. Mbwirabumva.
Kubera amarorerwa ndengakamere ingoma ya FPR Inkotanyi yakoze imyaka irenga 20 yose, Inkotanyi aho ziva zikagera zari zikwiye kugenda zubitse umutwe, zifite ikimwaro, zifuza ko Imana n'abantu bazazibabarira ibibi bakoreye abanyarwanda n'abanyekongo.
Nyamwasa rero urabe wumva: ukwiye gucisha make ukareba aho ubundama utegereje ko ubutabera bukugeraho, wagira aho ujya ukagenda wubitse umutwe, ufite ikimwaro cy'ibibi wakoze, ugasigara ahubwo usaba ko Imana n'abanyarwanda bazakubabarira ibibi wakoreye abanyarwanda mu Rwanda no muri Congo.

Simeon.

Ijwi Rya Rubanda.

Simeon aracumburira aho yari agejeje asubiza inyandiko ya Edson Rwumbuguza yavugaga iti: "Ese mwahaye Kayumba Nyamwasa amahoro?" Iyi nyandiko ikurikira iyitwa Igisubizo ku bavuga ngo mwahaye Kayumba Nyamwasa amahoro

Urakomeza inyandiko yawe ugira uti:

Ndasanga gutoteza Kayumba Nyamwasa ari uguca intege opposition y'abanyarwanda, mu gihe Kayumba ari umwe mu bantu babanye na Kagame usigaye agaragaza uburyo urupfu rw'abahutu rwagenze ndetse akanavuga neza iraswa ry'indege.

Iyi nteruro yawe nayo, Bwana Edson Rwumbuguza ikubiyemo ibitekerezo bine by'ingenzi nabyo dukwiye gusuzuma:
1- Kayumba Nyamwasa aratotezwa
2- Kayumba ni umwe mu bantu babanye na Kagame usigaye agaragaza uburyo urupfu rw'abahutu rwagenze
3- Kayumba Nyamwasa avuga neza ku iraswa ry'indege
4- Gutoteza Kayumba Nyamwasa ni uguca intege opozisiyo y'abanyarwanda

Reka dutangirire ku gitekerezo cya mbere:
1- Gutoteza Kayumba Nyamwasa
Edson muvandimwe, nagiraga ngo nkwibarize ikintu kimwe:
- Ni nde utoteza Kayumba Nyamwasa? Ese kuvuga Kayumba Nyamwasa uko ari n'uko yiyeretse abanyarwanda ni ukumutoteza? Ese gusubira mu bigwi yivugaga akiri mu Rwanda, yenda acyivuga n'ubu, ni ukumutoteza.
Ibyo birasaba mbere na mbere ko tuvuga kuri iri jambo ukoresheje "gutoteza". Haruguru wiyamaga abamushyira mu majwi, none gushyira mu majwi bivuyemo gutoteza. Ese gushyira mu majwi no gutoteza ni kimwe? Uzamfashe gusobanukirwa.
- Iyo tuvuga tuti mu Rwanda, Inkotanyi zitoteza abaharanira demokarasi, tuba tuvuga ibikorwa bigaragara bigayitse bivanzemo n'urugomo Inkotanyi zibakorera zigamije guca intege no kujujubya abo barwanashyaka kandi mu by'ukuri nta kibi zibahora. Barabafunga, babima akazi, babatereza insoresore zikabakubita zikabavunagura, barabarindagiza bakabimura aho batuye ku ngufu, babaca amafaranga y'amaherere hato na hato n'ibindi...
- Ku bwanjye, numva gutoteza rero bijyana n'ibikorwa bihoraho bigamije kugirira undi nabi no kumuvutsa uburenganzira bwe.
- Ubu rero, umuntu yakwibaza ati: ese koko uwo Kayumba Nyamwasa uvuganira aratotezwa koko? Ni nde se utoteza Kayumba Nyamwasa? Ni abamuvuga uko ari kuri Radiyo Ijwi Rya Rubanda? Ese ko mpora numva n'abo ba Nyamwasa na ba Rudasingwa n'abandi babashengerera bahora nabo bunga mu ryacu bavuga ko Kagame ari umwicanyi ruharwa, twavuga ko batoteza Kagame, maze tugatera ubwega nk'uko uri kubikora ubu? Njya numva n'abandi benshi bavuga ko Kagame ari umwicanyi, bakabisubiramo ku manywa na nijoro, bakabivuga mu biganiro mbwirwaruhame, bakabyandikira abazungu batongoza ngo bazabafashe kwicara ku ntebe Kagame yicayeho ko utaratera ubwega ubuza abo bose gutoteza Kagame niba ariko ubyita? Ubwo se rwose Edson, niba kuvuga umuntu uko ari ari ukumutoteza, watugira inama yo kumuvuga uko atari, cyangwa wahitamo kutugira inama yo kutigera tugira uwo tuvuga? Ikindi kandi, ubundi twese dusigaye turirimba ko icyo twifuza ari demokarasi isesuye. Muri demokarasi rero iyo umuntu akuvuze ukumva akubeshyera, nawe usaba ijambo aho yabivugiye ukisobanura ukerekana aho yarengereye. Ndetse yaba yarenze umurongo akakwaka icyubahiro ukwiriye, ukaba wakwegera ubutabera bukamutegeka nawe kwisobanura no kutongera kukubeshyera. Ibyo aho urabyibuka? Ese ibyo Nyamwasa ugutuma ngo umuvuganire arabiyobewe?
- Niba se wumva bifite ishingiro 'gutoteza' umwicanyi ruharwa nka Kagame, kuki watoteza (cyangwa se washyira mu majwi!) Kagame wenyine maze abafatanije nawe gupanga no gusohoza ya marorerwa twavuze bakoreye abanyarwanda bo ukabihorera? Kuki wakwumva ko navuga ubugome bwa Kagame, simvuge ubwa Kabarebe, simvuge ubwa Kayumba Nyamwasa, simvuge ubwa Kaka, ubwa Karenzi n'ubw'izindi nkoramaraso?
Rero hari abavuga ngo ntidukwiye kuvuga ko Nyamwasa ari umwicanyi kubera ko nta rukiko rurabimwemeza! Ariko bakarenga bakirirwa batera induru ngo Kagame, Kabarebe na Ibingira ni abicanyi. Njye abo ndababwira nti: Mwahaye se na Kagame amahoro? Muvugira iki se ko ari inkoramaraso kandi nta rukiko rurabimwemeza?
Edson muvandimwe.
Urinda gutera ubwega wandikira Radiyo Ijwi Rya Rubanda, uwo Nyamwasa uterera ubwega umurusha kwandika? Umurusha ururimi? Cyangwa umurusha ubutwari? Wamubwiye akazaza akivugira maze tukamuha urubuga akivuga ibigwi bye ku mugaragaro? Ni byo. Mubwire, azaze yivuge ibigwi. Tuzaba twumva niba hari ibindi bigwi azivuga bitari nka bya kindi yajyaga avuga ahaze igihe yari akiri ku ibere ry'icyama.
Reka Edson mbe nkwibukije igice kimwe cy'icyivugo cya Nyamwasa njye numvise.
Aravuga ati:

Ndi umuhungu ndi umuziraguhunga
uwanyise Nyamwasa ntiyibeshye.
nafatanije na Pilato,
Kagame mwene Rutagambwa
kugaba igitero dutera u Rwanda,
ingabo za Habyarimana turazihashya,
abashenzi tubatsindisha akarimi, amayeri n'amasasu
Ba bihwahwa tubaha udufuni,
akandoya na songamane birakoreshwa,
abahungiye ishyanga turahabasanga
turabacucuma turabatsemba.
Ati ndi rudakangwa amapete n'amashuri
nanjye muzi ko naminuje,
iby'amategeko nabyigiye Kaminuza,
Iyi y'i Makerere mwese muzi

Njye Nyamwasa mwese mubona,
Ndi icyamamare mu ntwari
mu byo kwivuna umwanzi ntawe untebya.
ku buryo muri uru Rwanda rwacu
utazi njye Nyamwasa yarambariwe.

Nzi guhashya umwanzi aho ava akagera
Bizwi neza n'abambonye
ngenda nemye iyo mu mashyamba
nkubita umwanzi inshuro kakahava.
Ab'i Byumba bo aho twasohoreye
Nabashegeshe ubwo rugikubita,
Maze njye Inkotanyi y'amarere
Mbamariramo umujinya wose
Mbumvisha ko ntaje gukina

Babonye ubukana nabakubitanaga
Bicuza impamvu bavutse
Bagakura bateta batengamaye
Baririmba ku ngoma ya Habyarimana
Ngo amahoro n'ubumwe ni yo nkingi.

Njye n'izindi ntwari zo mu nkotanyi
twageze i Murindi turiruhutsa
Turakambika turisuganya
Mu gihe umwanzi acyirukanka
Ahirahira Arusha ngo tumuhe amahoro
Njye na Kagame twari maso
Dutegura urugamba simusiga.

Nabatsinze mu Mutara no mu Bugesera,
nabatsinze i Kisaro no muri Nyacyonga,
maze indege y'umubisha tumaze kuyihanura,
nambuka i Kigali ntazuyaza
njye n'abasore banjye b'intarumikwa.
Ingabo z'impehe zirasuhererwa
Turazisatira zihagararaho
Bigeze aho ziyabangira ingata
zigana i Congo ubutarora inyuma
igihugu tuba turagifashe
ubutegetsi tuba turabubonye
maze utwari twibeshye ku nkotanyi
twahasigaye ngo tuzabana
Nditonda ndahumbahumba
Mfatanyije na Afandi Kagame muzi.

Nayoboye DMI mwese muzi
nyigira icyamamare mu Rwanda
maze icyitwa igipinga aho kiri hose
cyicuza icyatumye kibona izuba!

Ati njye Nyamwasa mubona ahangaha
naragakoze ndatamirwa
Maze gusukura umutara w'abacu,
Ndicara nanjye ndya ku mutungo

Ibyo ariko ntibyatinze
Abanyakanyaro b'intagondwa
mu bambutse hakurya iyo muri Congo
Bashatse kwinyara mu isunzu
ngo batabare bene wabo
Intwari rudasumbwa twatabaranye,
Ariwe Kagame ka Rutagambwa
Yahise antabaza mwitaba bwangu
Ati yewe Nyamwasa ncuti y'amagara
twatabarukanye mu mashyamba,
tugasangira akabisi n'agahiye
Dore u Rwanda twabohoje
rwugarijwe na za mburagasani
zigifite ingengabitekerezo
yo kutuvana amata mu kanwa

Ati ziriya nterahamwe
nizigaruka muri uru Rwanda
zikabona imivu y'amaraso
twasheshe zimaze guhunga,
iruta iy'abacu zivuganye
zizatumarira ku icumu nta kabuza.
Ubwo Afandi akimara kunyiyambaza,
namubwizanye ubwuzu n'amashagaga,
nti njye uranzi Afandi nubaha
nti njye Nyamwasa Rutazuyaza,
njye Kayumba ndi Mudatenguha,
Vuga ijambo rimwe gusa mubyeyi
Maze urebe ngo birahinduka
nzagukorera icyo ushaka cyose,
Abo abanzi aho bari hose
nzabahiga mbahashye mbice,
nihasigara n'uwo kubara inkuru
uzanyage aya mapeti mpetse,
njye Nyamwasa niko mbivuze
ntawuzancika ndakabura ikibondo.
Nti yemwe yemwe ngo barahangara!
abo bashaka kugaruka i Rwanda
bariyahuye nk'udushwiriri
ndetse n'ababo bose bazajyana.

Njye Nyamwasa Rutazuyaza
nahise nambara ndatabara
nkora ku basore banjye turahamanuka,
maze Ruhengeri ndayisukura,
intoki i Gisenyi nzishyira hasi
akarere kose nkizamo umwanda.
ibyitso by'abiyahuzi b'abacengezi
byumvise ngo ni Nyamwasa wiyiziye
byose biradagadwa birasuhererwa,
interahamwe ziyabangira ingata
abana abagore n'abasaza,
bose bakwira imishwaro.
Nkabwira abasore intore zanjye
zasaga n'izandushije kurya karungu
nti amategeko ninjye wayize
Kandi amategeko ninjye uyatanga
Nti nimugende mubegere,
mubongoshye uko mwabyize
mubabwize akarimi keza,
mubashorere nk'amatungo magufi
mubabwire ko ntumiye inama
yo kubarindira umutekano,
mubakoreshe songamane,
maze nibamara kugwira no kwegerana,
mutishisha nk'uko mwabitojwe
mubamishemo urusasu mutazuyaza
Nyuma kandi ntore twatabaranye,
Munyure mu mirambo mugenzure
Maze ugihumeka mumuhe agafuni.

Mu nkotanyi nayoboraga
iyo nabonaga ishobora guhukwa,
igasuhererwa yibaza byinshi
cyangwa yibwira ngo birabujijwe,
Nayibutsaga ko njye Nyamwasa,
mbere yo kwiga kwica umwanzi,
nari nabanje kwiga amategeko.

Ndi intwari ndi inzirakuneshwa,
Hari ibipinga byacitse intore zanjye
byihina mu buvumo bw'i Nyakinama,
nanjye nti ibyo simbinkangwa!
Noherejemo urusasu biratinda,
noherezamo ibyuka bahumeka
abapfupfunutse bakirizwa udufuni.
abanze gupfa mbonye bantesha igihe
nahise mbafungira mu buvumo bwabo,
maze mpita ntaha i Kigali nemye,
mbwira Afandi rudasonera umwanzi
nti mutware rwose Afandi nkunda
Ubutumwa wampaye njye ndabushohoje,
Akazi nagakoze uko bikwiye
ibyo twumvikanye njya kugenda,
byose byakozwe uko ubikunda.
U Rwanda rwose rurabohojwe
Reka turutegeke natwe duherwe
Afandi aramwenyura arishima
Ankora mu ntoki ati nsanzwe nkwemera

Ni uko ndihuta ntaha imuhira
Njya kuruhukana na Rosette
Madamu wanjye nkunda cyane.
Umugore n'abana banshagaye ngo mbabwire
ibigwi byanjye byo ku rugamba,
Nababwiye njye ntazuyaza
nti abanyigisenyi n'abanyaruhengeri
bari baratese njye ntaraza
Nti dore mu gihe gito nk'iki ngiki,
Njye nabashyize kuri gahunda,
bamaze kwiboneraho ubwabo
ko njye Nyamwasa ntazanywe mu Rwanda
no gukina cyangwa guta igihe cyanjye
Ngo ndafata abantu mbagire abanyururu
Nk'aho nshinze akazi ka gipolisi.

Ati njye ndi umujenerali udatenguha,
Afandi Kagame numvira nk'umubyeyi
yongeye kubona ibintu bikomeye,
kubera interahamwe zo muri Congo
Arazinduka aza kunshaka
Ati Nyamwasa uko umbona uku nguku,
Singisinzira ngo mbone agatotsi,
None nagiraga ngu ungire inama
wowe wize iby'amategeko
muri Kaminuza izwi ya Makerere
wamfasha kwiga uburyo buhwitse
bariya baducitse tutabishaka
twabatera tukabacucuma
Maze amahanga ntaducyahe?
Naramubwiye njye ntazuyaza,
Nti shyira imitima hamwe Mubyeyi,
Icyo kibazo ntikitugora.
Narihereye na ba Kabarebe
n'abandi bagabo b'intarumikwa
maze mu gihe gito tumuha ipulani
y'uko byose bizagenda
Tukimara gupanga gahunda yose
y'uko tuzarangiza burundu
ikibazo cy'interahamwe muri Congo
twabonye Afandi anezerewe
Tubona aramwenyuye yishimye
Ati mbabwize ukuri kwambaye ubusa,
ati ngira amahirwe rwose cyane
yo kugira abajenerali bazi akazi bashinzwe.
Ati ahasigaye rero ni ahanyu,
mbahaye umugisha nimuhaguruke
singishaka abo ba nyamwinshi,
nimwambuke bwangu hakurya hariya
muvane umwanda muri Kivu zombi,
akazatarataza gashaka guhunga
kaba akagabo agasore cyangwa akana,
kaba akagore agakumi cyangwa agahinja
kaba agakecuru, agasaza cyangwa akamuga
muzabahige mushyizeho umwete
mubakurikirane no mu mashyamba
mubajujubye babure byose
muzagaruke mumbwira
ko umwanda wavanweho burundu
ko nta mwanzi ukirangwa muri Zaire
ko icyitwa umuhutu cyakubititse

Afandi yongeye aranatwibutsa
Ati itegeko riracyari rya rindi:
nta kitemewe gukorwa kuri bariya
mu gihe twitabaza iturufu ryacu
ryo kuvuga jenoside yakorewe abatutsi

Njye Nyamwasa sinazuyaje
nahise nkora ibyo nsabwa byose
ingabo z'intore ndazitegura
amamodoka ndayegeranya,
imbunda, amasasu n'udufuni
n'ibikoresho bindi bizakenerwa
mbyegereza inkotanyi zidatenguha
Nti muze twambuke tubahige
ndetse n'igihugu kibacumbikiye tugifate
Twese twambuka turirimba
Tuti 'Songa mbele paka Kinshasa'
Ubwo ibipinga aho bikambitse
biratungurwa bipfa nk'ibimonyo
inkambi za Loni tuzisukaho ibisasu
impunzi zirapfa izindi ziratorongera
zikwira imishwaro zitazi iyo zijya
na Loni nayo yo kabyara
iriruhutsa iti koko twarabivuze
Kayumba, Kabarebe na Kagame
tubakuriye ingofero ni ba Rutikanga,
iti iyo batatugoboka ngo bazidukize
ntitwari kuzabona ikizitunga

Yee. Wumvise Bwana Edson Rwumbuguza.
Ngicyo igice kimwe cy'icyivugo cy'inkoramaraso Nyamwasa wahagurukiye gutererera ubwega ngo ntakavugwe.
Ngibyo bimwe mu bigwi Kayumba Nyamwasa yivuga iyo ari mu bo ashaka, ariko ataratinyuka kuza kuvugira kuri Radiyo Ijwi Rya Rubanda. Aho wibagiwe ko bimwe muri ibyo bigwi yabyivugiye ku yandi maradiyo n'amateleviziyo. Ko iyo agiye kuri terrain aba ajyanywe no kwica, aba atajyanywe no gukora akazi k'igipolisi... Ibyo ni byo bigwi bye tumuziho.

Koko Edson, tuvanemo umugaryo. Tubwire neza uko byifashe. Urinda kuvuganira Kayumba Nyamwasa, yaragutumye? Ese abuze ururimi rwo kwivugira? Yaragutakiye se ngo uzamuvuganire kuri Radiyo Ijwi Rya Rubanda izajye ibuza abanyarwanda kugira icyo bamuvugaho? Ko watangiye se uvuga ko Radiyo Ijwi Rya Rubanda idaheza, yashatse kuvuga tumwima ijambo? Ndakwibutsa, cyangwa niba utari ubizi, ndakumenyesha ko nashatse kumuha ijambo, kugira ngo ngire utubazo mwibariza kuri ibyo byose bamuvugaho, ariko ntiyatinyutse.
Nakugira inama rero kutiha kuvuganira utagutumye kandi ntacyo abuze ngo yivuganire. Naba yagutumye nabwo uzajye ubivuga. Nuba witumirije, uzajye umenya ko hari ibyo uzajya ubazwa urye indimi, ufatwe nk'umuhakwa w'inkomamashyi witerera mu byo atazi kandi benebyo bahari. Wikwiterera mu mata nk'isazi. Ibyo kera babyitaga guhakirizwa, ubu yenda hari abasigaye babishima, babyita kwiteganyiriza ufata impu zombi. Ibyo aribyo byose, ku bwanjye, ibi byerekana bya bisigisigi by'ubuhake bwakuriye mu bwonko no muri subconscient y'abanyarwanda benshi, ibacengera mu maraso, ku buryo bareba umututsi w'umwicanyi bakumva bamuhakwaho bibwira ko ariyo maramuko y'ababo. Ese ko ntarumva aho wowe n'abo muhuje ibitekerezo mutera ubwega ku bashyira mu majwi Bagosora kandi nta bugome n'ibyaha azwiho ugereranije n'ibizwi kuri Kayumba Nyamwasa na mugenzi we Kagame?

Wari uzi icyo bita sub-conscient Edson we? Hari imico n'imigenzereze ya gihake yinjiye muri subconscient maze irahatura ku buryo wumva ko survie yawe ijyana no guhakwa ku mugome; bumwe mu buryo bwo guhakwa bukaba gufata iya mbere mu kumwereka ko mumushyigikiye aho rukomeye. Inyuma mu mutwe uba ufite icyizere cy'uko azakwibuka igihe nikigera... Na bene ubwite rero bakabigenderaho, bakagukina icenga, bakakwongorera ikibabaje, ntibacyivugire ku mugaragaro aho kigomba kuvugwa, maze wowe ukiyumvamo ubugabo, ukiyumvamo ko ugomba gufata iza mbere mu kujya gutangaza bya bindi bakwongoreye. Ukishyira imbere uvuga uti: humura njye rwose nzabikuvugira, nzi ko njye bazanyumva kuko njye ntawe unziho ubugome! Ayi nya! Ibisa birasabirana!

Igitekerezo cya 2 muri ya nteruro yawe ni ikivuga kiti:
2- Kayumba ni umwe mu bantu babanye na Kagame usigaye agaragaza uburyo urupfu rw'abahutu rwagenze
Ngo Nyamwasa asigaye agaragaza uburyo urupfu rw'abahutu rwagenze? Numvise neza se koko? Ngo Kayumba ni umwe mu bantu babanye na Kagame usigaye agaragaza uburyo urupfu rw'abahutu rwagenze?
Muvandimwe Edson rero,
Kagire inkuru! Urabizi neza? Yagaragarije he uburyo we n'abo bafatanije bishe abahutu?
Ngira ngo imwe mu mpamvu Kayumba Nyamwasa atinya ko tuganira, ni uko azi ko ari kimwe mu bibazo nzamubaza. Njye mbona afite ubwoba y'uko ukuri kwagaragara ubungubu.
Ariko kubera ko uvuze ko Kayumba asigaye agaragaza uburyo urupfu rw'abahutu rwagenze, reka tubiganireho neza:
Sinzi amaradiyo wumva, sinzi ibinyamakuru usoma. Nagiraga ngo ngusabe ubimpe neza, umpe inyandiko wasomye Kayumba Nyamwasa agaragarizamo uburyo urupfu rw'abahutu rwagenze.
Muvandimwe Edson,
Uzi ko nzirana n'abantu bahuragura ibigambo bashaka kujijisha no kubiba mu mitwe icyo bita desinformation. Uzi ko ndakunda abantu babeshya cyangwa bashaka guhindura abandi ibicucu. Uzi ko nkunda abagendera ku kuri. Witindaganya rero. Hita umpa references zigaragaza ukuri kuri ibyo uvuga ko Kayumba asigaye agaragaza uburyo urupfu rw'abahutu rwagenze. Ayo ni amagambo wakoresheje. Nutazibona, uzakorwe n'ikimwaro. Nuzibona kandi ukazimpa, nzazitangaza kuri iyi radiyo nta kabuza.

Ariko se koko Kayumba Nyamwasa yababwiye ukuntu abanyabyumba bapfuye n'ababishe, mukaba mukibyihereranye?
Ese uretse n'urupfu rw'abahutu, Kayumba Nyamwasa yababwiye urupfu abasore b'abatutsi baturutse mu Rwanda cyangwa muri Zaire bakubitwaga agafuni ngo bashobora kuba bazanwa no kunekera Habyarimana?
Ese Kayumba Nyamwasa yababwiye uburyo abahutu hafi miliyoni bari mu nkambi ya Nyacyonga bishwe?
- yababwiye se uburyo Inkotanyi yari umwe mu bayobozi zishe Abihayimana bo muri Byumba
- yababwiye se uburyo n'impamvu Abasenyeri n'abapadiri bishwe i Kabgayi n'ababishe
- yababwiye se uburyo abahutu batundwaga n'amakamyo bakajya kubatwikira muri pariki ngo barasukura akarere kagenewe abatutsi
- yababwiye se uburyo abahutu bari bahungiye i Kibeho bishwe n'ababishe?
- yababwiye se uburyo abahutu bo muri Gisenyi, Ruhengeri , Gitarama n'ahandi bicwaga batumiwe mu nama?
- yababwiye se uburyo batwaraga buri munsi abahutu muri gereza cyangwa muri za konteneri bakajya kubica
- yababwiye se uburyo abahutu b'i Kanama muri Gisenyi bari bahunze ingabo za Kayumba Nyamwasa batewe ibyuka mu buvumo bakabatsemba
Kayumba Nyamwasa yababwiye iki ku buryo abahutu bo mu nkambi zo muri Zayire bishwe n'ababishe?
Kayumba Nyamwasa yababwiye iki ku buryo abahutu bapfuye bazira inzara n'indwara batewe n'uko babambuye imitungo yabo bakanababuza guhinga ibyo barya.
Kayumba Nyamwasa yababwiye iki ku buryo abahutu batemewe intoki zari zibatunze no ku ngaruka byagiriye abo bahutu n'abana b'abo?
Mara amatsiko Edson. Tubwire neza izo nkuru yaguhaye cyangwa yabahaye mwe mumwegereye, maze natwe tumenye uko tumufata.
Ese yabibabwiye mwihereye? Cyangwa ni bya bindi byo kwicara aho nk'umuhinza, akabashyiramo igihu ngo nimumwizere azaba abivuga!

Igitekerezo cya gatatu muri iyo nteruro kiragira kiti:
3- Kayumba Nyamwasa avuga neza ku iraswa ry'indege
Harya ngo yabavunguriyeho avuga ko Kagame ariwe warashe indege! Iyo ni gahendabana! Edson se ko ubizi, byo niba abivuze, abivuze hashize imyaka ingahe? Imyaka 20 ba Nyamwasa n'abo bafatanije boza abanyagihugu n'abanyamahanga ubwonko bavuga ngo bahagaritse jenoside! Imyaka 20 uwo Nyamwasa n'abo bafatanyije bemeza isi yose ko indege yari itwaye abaperezida 2 b'abahutu yahanuwe ngo n'intagondwa z'abahutu zifatanije n'umubyeyi Agata Habyarimana. Aho Kagame abitiye ibigarasha n'umwanda sibwo batangiye kuvuga ko ibyo bavugaga iyo myaka yose byari ibinyoma, ko babikwirakwizaga hose bazi neza ko ari ukubeshya, ko aribo bakoze iryo shyano ryo guhanura indege no gutangiza jenoside?
Ibyo by'indege nabyo reka tubivugeho. Ese ye? Harya Nyamwasa yabasobanuriye ko ihanurwa ry'indege ryagenze rite? Ko missiles zavuye he? Ko iraswa rya Habyarimana ryapanzwe rite? Ko ari nde na nde babikoze? Ko ari ba nde muri Minuar babibafashijemo? Yababwiye ku myiteguro y'icyo gikorwa cy'iterabwoba bari bazi ko kizoreka imbaga? Ibyo byose yarabibabwiye mwebwe mumwegereye? Cyangwa yarabijeje, ngo azaba abivuga, ngo igihe cy'imanza nikigera! Mbega mbega Rwumbuguza! Utagira isoni we ntamwara? Urashaka kujijisha nde? Nyamwasa arushwa ubugabo n'ubutwari na Ruzibiza Abdul wicujije ibyo yashowemo, akatubwira uko byagenze. Imana imuhe iruhuko ridashira!

Hari ikintu nagiraga ngo nkwibutse Bwana Rwumbuguza. Kayumba Nyamwasa yigamba ku maradiyo ko yize amategeko muri kaminuza. Ngo ntiyarakeneye kujya mu ngabo kugira ngo abeho. Ngo uretse n'akazi ko kwica yashoboraga kubona akandi bitamugoye. Ndabishimye rwose. Menya rero ko umuntu ujijutse nka Kayumba Nyamwasa, wagiye mu ngabo yarize n'amategeko, agomba kubazwa byinshi kurusha uwagiyemo nta kindi yize, ari umumayibobo.
Yagezeyo ayobora abatarize ayo mategeko, abatoza kandi abashishikariza gukubita agafuni, abatoza kandi abashishikariza kwica umuntu utakurwanya, abatoza kandi abashishikariza kuryarya abahutu kugira ngo ubegeranye uzi neza ko nibamara kugwira urabica bose ntihagire urokoka, abatoza kandi abashishikariza kwica abasivili... Amategeko Nyamwasa yize yayakoresheje hehe? Atangiye kuyibuka ubu? Muri kaminuza z'i Bugande bigisha ko byemewe gutera amabombo mu baturage utarwana nabo?
Ntawavuga ko yabigiraga atazi ko bibujijwe n'amategeko. Yabigiriraga iki rero? Ese ntiyaba ari ukubera ubugome bwe bwa kamere n'urwango yari afitiye ubwoko bw'abo yajyaga kwica.
Ese kuki intambara yo mu Rwanda ariyo ntambara yonyine udashobora kwerekanamo abanyururu b'intambara? Kayumba Nyamwasa yarabyivugiye kuri televiziyo, ati mbwira abasirikari ko bagomba kurasa bagamije kwica, ati iyo nje kuri terrain, mba nzanywe no kwica, simba nzanywe no gukora akazi k'igipolisi. Kwica umuntu wiruka aguhunga, kwica umuntu udafite intwaro adashobora no kukurwanya, kumisha ibisasu mu bahutu ibihumbi wicaje ku kibuga cy'umupira bacucitse, warangiza ukajya kuri televisiyo na radiyo kwigamba ko wari umujenerali wari warize amategeko, hanyuma ukitakana umujenerali utarize ayo mategeko wari mayibobo igihe wowe wigaga, ngo niwe mwicanyi. Abavuga Kagame muretse Kayumba Nyamwasa, si ukubera ko atari umwicanyi ruharwa nka Kagame, si ukubera ko atari umugome nka Kagame. Abamuterera ubwega muzavuge ikindi.
Ni benshi bambwira biherereye ngo bazi neza ko umwicanyi Nyamwasa ari umugome, bakagerekaho ndetse ko bazi ko Nyamwasa arusha ubugome Kagame. Bamwe bakagerekaho ngo yego tuzi ko ari umwicanyi, ariko yenda yashobora kudufasha guhirika iriya ngoma y'igitugu yatunaniye. Nta n'umwe ariko utinyuka kubivuga ku mugaragaro! Mbega abanyarwanda!
Kwisunga umwicanyi ruharwa ngo azabafashe kugera ku butegetsi? Mwe mubona aribyo arik njye Simeon siko mbibona. Muzazane ibitekerezo byanyu nanjye ntange ibyanjye, maze yenda tuzagira umwanzuro dukuramo. Ariko ntimumbwire ngo nzime ijambo umuntu uje kuri radiyo avuga ibintu uko abyumva. Ikindi kandi, nk'uko nemerera abandi bose gutanga ibitekerezo byabo kuri Radiyo IRR, nimwumve kandi mwemere ko nanjye Simeon mfite uburenganzira bwo kuyitangaho ibyanjye.

Tujye noneho ku gitekerezo cya kane cya ya nteruro, hariya uvuga ngo:

4- Kuvuga Kayumba Nyamwasa ni uguca intege opozisiyo y'abanyarwanda
Muvandimwe Edson rero,
Ndagira ngo nkubwire ko ibyo ari icyo bita mu gifaransa "affirmation gratuite". Njye mbyita "ibigambo". Wari ukwiye guturuka ruhande, ukerekana uko opozisiyo y'abanyarwanda iteye, impamvu iteye ityo, uruhare iyo nkoramaraso Kayumba Nyamwasa ayifitemo, maze ukerekana ukuntu kumuvuga ari uguca intege opozisiyo y'abanyarwanda.

Icya mbere cyo, ndagira ngo umare amatsiko. Ese Kayumba Nyamwasa ari muri opozisiyo ate? Nk'umwe mu bayobozi b'ishyaka se? Nk'umujyanama se? Nk'umuntu se wabaye umusirikari wazagira akamaro andi mashyaka ashoboye kuvana ingabo za FPR Inkotanyi mu byimbo? Ushobora kumbwira impamvu wumva ko Kayumba Nyamwasa adahari cyangwa anavuzwe byaca intege opozisiyo? Erega ejo Fred IBINGIRA, James KABAREBE cyangwa abandi bicanyi nibashwana na Kagame bagahunga, ntuzaba ugishobora kuvuga ko ari inkoramaraso kugira ngo utazaca opozisiyo intege? Nibaza bakibihisha inyuma y'ikintu bazita ishyaka rero abanyarwanda bazasamare babajye inyuma ngo ni uko abo bicanyi batakivuga rumwe na Kagame? Ibipfayongo nabibwira iki!

Edson rero, zirikana ibi. Iyo opozisiyo yacibwa intege n'uko bavuze ukuri kuri Kayumba Nyamwasa, nta ntege ifite. Ni icyuka. Yubakiye ku musenyi.
Opozisiyo izagira intege ari uko yubakiye ku bantu bakunda ukuri, bavuga ukuri, batari abagome, batari abicanyi, kandi badafite imitwe yo gukina amacenga bagamije kuzigwizaho ibyubahiro n'imitungo. Opozisiyo izagira intege ari uko yubakiye ku bantu b'inyangamugayo, badashishikajwe no gushaka inzira yazatuma badakurikiranwaho ibyaha ndenkakamere bakoze nk'uko bimeze kuri rukarabankaba Nyamwasa. Opozisiyo yubakiye ku bantu b'abicanyi, abagome, ababeshyi n'abasahuzi nka ba Nyamwasa n'abandi, iyo nta ntege ishobora kugira kuko atari alternative ku ngoma ya FPR Inkotanyi.
Ngo kuvuga Nyamwasa ni uguca opozisiyo intege? Ahubwo kujya inyuma y'inkoramaraso no kuzishengerera nibyo bica abanyarwanda intege. Ninjye ukwiye kukubwira nti: mureke guca abanyarwanda intege. Abanyarwanda bashaka amahoro, mureke gushyigikira no gukingira ikibaba uwayabavukije. Abanyarwanda bashaka ubutabera, mureke gukingira ikibaba uwabahekuye. Abanyarwanda dushaka ukuri, nimureke inkoramaraso Nyamwasa ize itubwire uko kuri kwe natwe tukwumve.
Iyo yigamba uko yakoze plan yo gusuka amabombo ku mpunzi z'abahutu ururimi ararubona. Ariko akabura ururimi iyo Ijwi Rya Rubanda rimusaba kutubwira neza uko byagenze kugira ngo za miliyoni z'abahutu zitikizwe. Akabona ko ibyiza ari ukwohereza abantu nkawe kuza muri gahunda yo kuducecekesha cyangwa kujijisha. Aho Nyamwasa si umwe muri ba batutsi nyakwigendera Nyetera yakunze kutwibutsa agira ati: 'abatutsi barangwa n'ikinyoma no kutemera aho ukuri kuri'. Abatinya amateka ni abafite ibigwi bibi bayagizemo.
Rwose Edson n'abo muri kumwe, umukino muriho mukina ni uwuhe? Ngo mushaka demokarasi ariko muzisunga umwicanyi ngo abe ariwe ubanza kubageza ku ntebe y'ubutegetsi!
Murashakira abacunguzi mu bicanyi? Na n'ubu nta somo mwabonye? Uwabaroze ntiyakarabye!
Ese harya Edson, waba wibaza impamvu abo ba Nyamwasa uvugira birinda kuvuga ko FPR Inkotanyi ari ishyaka ry'ubugome, ubusambo n'ubugiranabi, ahubwo bagahitamo kuvuga Kagame uyikuriye? Erega, ntiwibagirwe ko FPR ari akana kabo. Nibo bayishinze. Abo ba Nyamwasa, ba Gahima, ba Rudasingwa... bari barize za Kaminuza baraminuje. FPR yavuye mu mitima yabo no mu bwonko bwabo. Nibo bayihaye icyerekezo kuva na mbere ya 1990 kugeza bahunze nyuma y'imyaka 20 ikora ibyo bumvaga bibereye FPR Inkotanyi. Urumva impamvu kuri bo, ubwicanyi n'ubugome Inkotanyi zagiriye abahutu muri icyo gihe cyose ataricyo kibazo. Ese hari uwo wumvise muri bo avuga ko yahunze kubera ko yarwanije ubwicanyi bwa FPR Inkotanyi? Cyangwa bafite icyo bapfuye bataratubwira kirebana n'igabana ry'imitungo bigwijeho bamaze gufata ubutegetsi no gucuza abahutu, cyangwa bijyana no gushaka uwagira ijambo kurusha uwundi mu gatsiko gategeka ingaruzwamiheto.

Kuri ibyo byerekeranye na opozisiyo iruma ihuha cyangwa itazi kuvangura icyatsi n'ururo, nagiraga ngo nkwibutse ibi, Bwana Rwumbuguza: Ku bwanjye no kubw'abanyarwanda benshi, harimo abadatinyuka kuvuga kubera ubwoba n'ihahamuka, FPR Inkotanyi ni umuryango w'abicanyi. Ni umuryango bita mu gifaransa 'organisation criminelle' (ufite imigambi irangwa n'ubugizi bwa nabi, n'ubwicanyi, n'ubugome, n'ubusahuzi). Kubera izo mpamvu rero, njye nemeza ko ari umuryango ugomba kuzacibwa burundu mu Rwanda, ku buryo umuntu azajya agenda afite ikimwaro cyo kwitwa Inkotanyi, nk'uko nta badage bagenda bafite ishema ryo kwitwa abanazi. Mbisubiremo. FPR Inkotanyi ni organisation criminelle igomba gucibwa burundu mu Rwanda.
Abaharanira demokarasi mu Rwanda nibatagera kuri iyo ntego yo gusesa burundu FPR Inkotanyi, bazaba bakijandajanda bataragera igihe cyo kureba ukuri mu maso. Ubwo abaharanira ubutabera bazakomeza batange icyo gitekerezo baharanira ko abanyarwanda bumva neza uburemere bw'amarorerwa FPR Inkotanyi yabakoreye kugira ngo batinyuke kuyifataho icyemezo gihamye.

Biracyaza --> Birakomereza ku nyandiko "Nyamwasa si umugome, FPR Inkotanyi si ingome, umugome ni Kagame" aho isesengura ritangirira ku nteruro ivuga ngo:  Ntabwo abantu bavuga ngo nuko abivuze ageze hanze ariko hagati ye na Kagame byari byaranze gucamo kuko batavugaga rumwe ku bugizi bwa nabi.