Nyamwasa Kayumba Faustin

Kayumba Nyamwasa uri ku isonga ry’ishyaka RNC-Ihuriro Nyarwanda agomba gushyikirizwa Inkiko

March 2, 2013 By Simeon Leave a Comment

Nyuma y'uko hasohokeye inyandiko yiswe: Ifoto yanteye kwibaza: Inkoramaraso Kayumba Nyamwasa ishengerewe na FDU-Inkingi, habaye impaka mu biganiro by'URUBUGA RWA TWESE kuri Radiyo Ijwi Rya Rubanda. Hari benshi bumva Nyamwasa atagomba gukomeza kwishyira imbere mu bashobora kuyobora igihugu cyacu atarakiranuka n'abanyarwanda ku kibazo kirebana n'ubwicanyi ndengakamere azwiho. Hari n'abandi bacyemera ko umwicanyi ruharwa Nyamwasa akwiriye kugirirwa imbabazi (atanasabye) kuko bizera ko ashobora kubagirira akamaro mu kuvanaho ingoma y'igitugu ya FPR-Inkotanyi no kubageza ku butegetsi babuze uko bageraho.
Kimwe mu bitera impaka, ni uko bamwe bibwira, ndetse bemeza ko inkoramaraso Nyamwasa yasabye abanyarwanda imbabazi, bityo akaba atari byo gukomeza kumushyira mu majwi no gusaba ko yakurikiranwa ku mahano yakoze. Ibyo birebana n'uko Nyamwasa yaba yarasabye imbabazi nabyo byagiweho impaka kuri radiyo kandi turacyanategereje ibitekerezo by'abanyarwanda kuri iyo ngingo. Hagati aho, nagiraga ngo mbagezeho njye uko mbibona, maze muzatange arguments zanyu muzi nibura impamvu njye n'abo dusangiye igitekerezo dusaba ko inkoramaraso Nyamwasa yakurikiranwa ku byaha yakoreye abanyarwanda mbere y'uko ashyirwa ku isonga ry'ishyaka riharanira gutegeka u Rwanda mu gihe kiri imbere.

Kuki Nyamwasa agomba gukurikiranwa?

Nyamwasa si umuntu usanzwe. Yakoze ibyaha, ariko kandi si n'umunyabyaha usanzwe.
Yakoze ibyaha biremereye cyane, abikora abizi kandi abishaka, kandi abikora ku buryo bizwi na bose:
- Yagize uruhare mu gushoza no kurwana intambara yamennye amaraso menshi y'abanyarwanda.
- Yayoboye, by'umwihariko, umutwe w'abicanyi witwa DMI wateguraga kandi ugashyira mu bikorwa ubwicanyi bwibasiye abahutu batarwana, nk'uko byasobanuwe neza kuri radiyo Itahuka n'umwe mu bahoze ari umusirikari w'umu DMI.
- Yayoboye ingabo ze azitegeka kujya zirasa cyangwa zikubita udufuni abaturage batari ku rugamba, bagahamagarwa mu nama, bamara kugwira inkotanyi ayoboye zikabica kuva ku ruhinja kugera ku musaza.
- Yakoresheje indege za kajugujugu zihiga kandi zica abaturage bo mu karere ka Gisenyi na Ruhengeri kandi batanitwaje ibirwanisho.
- Yafungiye abaturage batagira ingano mu buvumo aho bari bahungiye amasasu y'inkotanyi yoherezaga ku misozi hose gutsembatsemba abahutu.
- Yateguye umugambi wo kujya kwica impunzi zari zahungiye amasasu y'inkotanyi muri Congo, maze hamwe n'abo bari bafatanyije barazitera, bazihiga bukware bica icyitwa umuhutu wose, ndetse n'uduhinja, kuva muri Kivu bazihiga kuzagera za Mbandaka, za Tingitingi n'utundi turere twinshi two muri Congo.
- N'ibindi n'ibindi...
- Ibyo yakoze byo kwica cyangwa gutegeka abasirikari be kwica abaturage batarwana yabyigambye ku maradiyo na televiziyo.

Nyamwasa ntiyazira ko yari umusirikari cyangwa umugaba w'ingabo

Hari abajijisha bavugira Nyamwasa babeshya ko akurikiranwaho kuba yarabaye umusirikari cyangwa yararwanye intambara. Sibyo. Kuba umusirikari si cyo cyaha. Icyaha ni ugukora amarorerwa abujijwe n'amategeko y'igihugu cyangwa amategeko mpuzamahanga.
Nyamwasa ntakurikiranweho rero ko yari umusirikari. Akurikiranweho ko mu gihe yari umusirikari, yarenze ku mategeko mpuzamahanga agenga intambara no ku mategeko mpuzamahanga agenga iyubahirizwa ry'uburenganzira bw'ikiremwa-muntu.
Nyamwasa yize amategeko muri Kaminuza, yize n'igisirikari, azi neza ko nta musirikari ufite uburenganzira bwo kurasa ku basivili cyangwa se kubarundanya hamwe akajya abicisha udufuni umwe umwe. Yewe, nta n'umusirikari ufite uburenganzira bwo kurasa ku basirikari barwanaga, mu gihe bashyize intwaro hasi.
Ukoze ibyo byo kwica abatakurwanya nk'uko Nyamwasa n'ingabo yari ayoboye zabigenje aho zanyuze hose, aba akoze ibyo bita crimes de guerre (ibyaha by'intambara).
Ukoze ibyaha byo gutsemba abaturage ubaziza ubwoko bwabo nk'uko yabikoze yica cyangwa atanga amategeko yo kwica abahutu, babyita crimes de genocide (ibyaha bya jenoside).

Nyamwasa arashakishwa n'ubutabera.

Kubera ibyo byaha rero, Nyamwasa arashakishwa n'ubutabera. Abacamanza bo mu Bufaransa no muri Espagne baramushakisha kubera ibyaha by'intambara n'ibya jenoside abarwaho.
Ubusanzwe, umuntu ukekwaho ibyaha biremereye nk'ibyo arafatwa, agafungwa, akaba yambuwe by'agateganyo uburenganzira bwo kwidegembya, ndetse n'ubwo gukora politiki nko gutora cyangwa gutorwa. Ibyo si ibyo mwigisha, arabizi neza. Azahere ku ngero z'abamaze imyaka itabarika Arusha bafunzwe bataburana kandi batarakekwagaho ubugome n'ibyaha nk'ibibarwa kuri Nyamwasa.
Nyamwasa we rero, si no kumukeka ko yaba yarakoze biriya byaha. Ni ibintu bizwi neza kandi nawe yemera.
- Yabikoze ku mugaragaro, abaturage bose barabibonye, ku buryo Nyamwasa yabaye icyamamare hose kubera ibyo.
- Ikindi kandi, nawe ubwe yarabyigambye, haba ku maradiyo cyangwa ku mateleviziyo.
Ni ukuvuga rero ko Nyamwasa yagombye kuba ari mu buroko, ategereje ko abacamanza basuzuma idosiye ye, nk'uko byagendekeye abandi bose bakekwagaho ibyaha, ndetse bitari binaremereye nk'ibyo we yakoze.

Inama njye namugira ni iyi:

- Kwishyira ubutabera. Muri iki gihe, ashobora kujya mu nkiko za Arusha, i LaHaye mu Buholandi, mu Bufaransa cyangwa muri Espagne. Abakoze za manda d'arret bafite impamvu bamukekaho ibyo byaha.
- Icyo gihe izo nkiko zamuburanisha
- Ubwo avuga ko ashaka gusaba imbabazi, ubwo yakorana n'inkiko (collaborer), agasobanura neza avuye mu mizi imbere y'inkiko ibyaha yakoze, uko byagenze, abo yafatanije n'abo yifashishije.
- Akemera ibyaha bye maze
- Akabisabira imbabazi ku mugaragaro, imbere y'inkiko.
Aho niho abanyarwanda bazamenya koko ko Nyamwasa yicuza ibyaha yakoze kandi ko ashaka koko kubisabira imbabazi.
Naho kuvuga ngo yaba yarasabye imbabazi kuri radiyo, ibyo ni ibya nyirarureshwa. Ayo ni amagambo adafite agaciro uretse gukomeza kujijisha, kurindagiza no gushinyagurira abanyarwanda bazize ubugome bwe.

Nongere mbisubiremo, muri uko gusaba imbabazi, agomba nibura gukora ibi bikurikira:
- Kuvuga we ubwe ibyaha byose yakoreye abaturage (abibwira urukiko) atabikikira cyangwa ngo abishakire ibisobanuro bigamije gusa kworoshya uburemere bwabyo,
- Kubyemera maze akerekana ko bimubabaje rwose
- Kurahira ko atazigera asubira gukora ibyaha nk'ibyo
- Kwiyemeza kugira uruhare mu gusana ibyo yangije no guhoza amarira abo yiciye (reparation)

Nk'uko nabivuze, akwiye ubu gufata iyambere akishyira mu maboko y'ubutabera bumushakisha, ikibazo kigaherera uruhande rumwe.
Niba kandi atinye kwishyira ubutabera, akwiye kuba yicaye aho ari akinumira, agategereza igihe bazaza kumufatira bakajya kumuburanisha.
Mu gihe ibyo bitarakorwa, gushyiraho ishyaka rya politiki ngo ashaka kujya mu ruhando rw'abahatanira gutegeka abanyarwanda ni ugukina abanyarwanda ku mubyimba no gushinyagurira abo yahekuye.

Inkoramaraso zigomba gufatwa kimwe.

Uriya munyamategeko Nyamwasa hamwe na ba Gahima bari kumwe, bakiri mu Rwanda, nibo bashyizeho za conditions zigomba kwuzuzwa kugira ngo ushinjwa ibyaha bifite bene buriya buremere ahabwe imbabazi. Nibo bavugaga ko ari yo ntambwe ya mbere igomba guterwa kugira ngo haboneke ubwiyunge mu banyarwanda. Ndetse nk'uko bizwi, izo conditions banazishyize no ku batanakekwaho ibyaha by'ubwicanyi!+
Nyamwasa ntiyagombye rero guhatiriza ngo ashake kunyura inzira y'ubusamo, ngo yibwire ko bihagije kuvuga yicaye muri salon iwe inyuma ya mudasobwa ngo 'I'm sorry' bya nyirarureshwa, nabwo nta cyerekana ko abikuye ku mutima. Akanabivuga kandi yenda ari no gutegura undi mugambi wo kuzongera kumena amaraso y'abanyarwanda.
Igihe cya 'deux poids, deux mesures' cyangwa cya 'double standards' cyararenze. Akebo bageramo abicanyi kagomba kuba kamwe.

Abamotsi, abaterankunga n'abakingira ikibaba inkoramaraso

Ndacyakomeza kwibaza ku banyapolitiki bahanze amaso umuntu nk'uriya, ufite ibyaha biremereye nka biriya, kandi utaranyura mu nzira yatuma aterwa icyuhagiro nk'uko nabivuze haruguru.
Ese bene abo bitwikira izina ry'abanyapolitiki ni impumyi ku buryo batabona uwo bari gukurikira uwo ariwe?
Cyangwa se nabo bameze nkawe ku buryo bamwibonamo nta ngorane?
Cyangwa se barakina ya politiki ishaje yo kwisunga abantu kubera ko ari inzobere mu bugome n'ubwicanyi kugira ngo bazagere ku butegetsi bararikiye?
Bagomba nabo kuva mu mwobo, bagatanga ibisobanuro bitwemeza koko ko gukingira ikibaba inkoramaraso nka Nyamwasa ari ikimenyetso cyo gushaka ubwiyunge hagati y'abahutu n'abatutsi. Aho kworohera inkoramaraso si byo bituma hakomeza kubaho wa muco wo kudahana bose bavuga barwanya? Wasobanura ute ko wahana inkoramaraso zo mu bwoko bw'abahutu, bose bakabyogeza kandi bakabishima, ariko ukitwaza ngo nta bwiyunge bwabaho uramutse uhannye inkoramaraso yo mu bwoko bw'abatutsi?

Abatutsi nibareke kuba ingwate z'inkoramaraso ngo ni uko zikomoka mu bwoko bwabo.

Ku bakangisha rero ngo gushyira Nyamwasa mu majwi ni ukwanga abatutsi, nagira ngo nibutse ko ari ugushaka kuvanga abatutsi mu kibazo kitari icyabo:
- Ibyaha Nyamwasa yakoze ntiyabikoze kubera ko ari umututsi, yabikoze kubera ko ari umugome. Haba abagome n'abicanyi mu bwoko bwose.
- Abatutsi ntibatumye Nyamwasa gukora ariya mahano. Agomba kuyisobanuraho we ku giti cye, atajisha ngo yihishe inyuma y'ubwoko akomokamo.
- Abatutsi kimwe n'abahutu bagomba kwitandukanya n'umwicanyi uwo ariwe wese.
- Abatutsi babona ko inkoramaraso zikomoka mu bwoko bw'abahutu zigomba gucibwa imanza no kureka kwishyira imbere ngo zizongera kuyobora igihugu, ariko bakabona ko inkoramaraso zikomoka mu bwoko bw'abatutsi zitabibazwa imbere y'ubutabera cyangwa ko zo zakwishyira imbere nta nkomyi mu bashaka kuyobora igihugu, abo batutsi bakwiye gusuzuma ingaruka z'ibitekerezo bene nk'ibyo bishingiye ku ivangura n'ubuhezanguni.

Ni uko mbibona.

Icyo Gahunde Chaste avuga ku nyandiko ‘Ifoto yanteye kwibaza…’ ivuga kuri Kayumba Nyamwasa na FDU-Inkingi

March 1, 2013 By Simeon Leave a Comment

Komanteri ya Gahunde Chaste ku bikubiye mu nyandiko 'Ifoto yanteye kwibaza - Inkoramaraso Kayumba Nyamwasa ishengerewe na FDU-Inkingi'

Nk’uko nkunda kubivuga, hari byinshi byakunze kugirwa kirazira mu Rwanda cyane cyane mu myaka 20 ishize. Ibi byatangiriye kuri ideology ya FPR yari ishingiye ku kwerekana ko ari ryo shyaka nako Umuryango (nk’uko yiyitaga )w’Abanyarwanda utagira amakemwa. Muri iyo ideology, FPR ntiyica kandi ntiyigeze yica. Ideology ikomeza yerekana ko Abicanyi ni Abahutu badukiriye Abatutsi bakabatema babahora ubusa. Kuba wavuga ibinyuranye n’ibi kirazira.
Byaragaragaye ko ikinyoma gishobora gutinda ku ntebe ariko kidashobora kugumaho ubuziraherezo. Ikibazo gihahamura FPR n’Abayirimo n’abayihozemo ni ubwicanyi yakoze kuva mu mwaka wa 1990. Hari Benshi mu Bahutu bibwira ko kubaka ukuri ari ukurenzaho tugaceceka ibyabaye. Ariko wababaza uti “ese koko twibagirwe genocide kugira ngo dukunde tudakomeretsa Abayikoze maze tukabangamira ubwiyunge?” Bakagusubiza bati “aba genocidaires bagomba gufatwa”. Wababaza uti “ese duhishire Abatutsi bishe Abatutsi ngo dukunde tudakoma rutenderi maze tugakanga ubumwe n’ubwiyunge?” Iki kibazo kirabagonga bagakanja amanwa! Wakongera uti “ukuri ni ukuhe?” Bati “genocide yakorewe Abatutsi”. Wababaza uti “ese Abahutu bo bazibukwa ryari?” Iki nacyo kikabatura hasi bakajomerwa.
Ntekereza ko aba bagabo bo muri FDU bagombye kumenya ko gufatanya n’andi mashyaka atari bibi ariko ni ngombwa ko duharanira ukuri mbere ya byose. Ahubwo nkurikije amagambo Ingabire yavugiye i Kigali atashye aho yagiraga ati ” je rentre” akavuga ko Abatutsi bagomba kwibukwa ariko n’Abishe Abahutu bagahanwa; nibaza koko niba aba bagabo bari basangiye ISHYAKA na Ingabire Victoire.
Duharanire ukuri, tukuvuge abo kurya kubarye nibirangire bazakira igikomere bafite . Ubutabera tubushyigikire ababufitiye umwenda basabe imbabazi bareke Abanyarwanda babategeke. Icyo gihe nibwo ubwiyunge buzaba buri mu nzira, naho ubundi turagosorera mu rucaca.

Ifoto yanteye kwibaza – Inkoramaraso Kayumba Nyamwasa ishengerewe na FDU-Inkingi

February 27, 2013 By Simeon 1 Comment

"Twaragiye dutoragura ba Kanyarengwe, turavuga ngo abahutu n'abatutsi biyunze. Hahahahaaa! Ariko byari amacenga." Rudasingwa Theogene.

Uturutse ibumoso: Col. Patrick Karegeya, Gervais Condo, Sixbert Musangamfura, Dr Charles Ndereyehe, Dr Paulin Murayi, Lt Gen Kayumba Nyamwasa, Dr Nkiko Nsengimana

Ku tariki ya 24/02/2013, twagejejweho twese ifoto iriho Inkoramaraso Kayumba Nyamwasa, agaragiwe n'abagabo barimo abo muri FDU-Inkingi badutangarije ko "bizihirwa kuba ibyitso".

Iyo foto twayibonyeho Patrick Karegeya wari ushinzwe kunekera Inkotanyi mu mahanga no kuzifasha gushyira mu bikorwa imigambi yazo yo kwikiza bamwe mu bazihunze. Twayibonyeho Inkoramaraso ruharwa Kayumba Nyamwasa wayoboye umutwe w'abicanyi ruharwa DMI, anayobora Inkotanyi zatsembatsembye abahutu muri Gisenyi, Ruhengeri no muri Congo.
Abo ni abantu twese tuzi ko bagomba kwisobanura imbere y'abanyarwanda n'imbere y'ubutabera ku mahano bakoze bakiri ku isonga ry'ingabo-nkoramaraso z'Inkotanyi.

Tega amatwi:
Uko mbibona: ifoto yanteye kwibaza - Inkoramaraso Nyamwasa ishengerewe!.

Iyo foto twayibonyeho kandi Ndereyehe Karoli, Nkiko Nsengimana, Musangamfura Sixbert, Paulin Murayi na Condo Gervasi bafite ishema ryo kwifotoza banezerewe, bari kumwe n'abo bicanyi bahekuye ibihumbagiza by'abanyarwanda. Abo nibo ahari abazungu bise "abahutu modérés" nka ba Kanyarengwe, ba Bizimungu na ba Twagiramungu. Abo ngo nibo abanyarwanda bakeneye kugira ngo bagire amahoro!
Njye narumiwe.
Ese ko bagiye kubyinagura i LaHaye mu Buholandi bavuga ngo barashaka ko inkoramaraso Kagame yashyikirizwa ubutabera, bananijwe n'iki kwikora ngo bajye Arusha gusaba ko inkoramaraso Nyamwasa yashyikirizwa urukiko ikisobanura imbere yarwo dore ko ikomeza kwanga kwisobanura imbere y'abanyarwanda?
None abagabo 5 bafite inyota y'ubutegetsi barikoze bafata inzira berekeza iya Afurika y'Epfo guhura n'inkoramaraso no kuzisaba ngo zizongere zikore ku buhanga bwazo zerekanye maze zizabageze ku ntebe y'ubutegetsi mu Rwanda bararikiye. Hafi ya bose kandi ngo ni abadogiteri, ni ukuvuga ko bafite ubuhanga buhanitse.

Bavandimwe mwishwe urw'agashinyaguro muzize akaboko ka ziriya nkotanyi nkoramaraso n'ibyitso byazo, tuzi ko mutabaza musaba ubutabera. Nimwihangane mumenye ko mu banyu hakiri abatazahwema gusaba ko ukuri kugaragazwa kandi ko izo nkoramaraso zishyikirizwa ubutabera. Nizere ko abazikingira ikibaba bagashaka kuzerekana nk'abantu basanzwe aho kuzerekana nk'inkoramaraso, bazagera aho bakumva ko bashaka kwubakira ku musenyi. Nizere ko bazagera aho bakumva ko nta bwiyunge bushobora kubaho ukuri kutavuzwe ku mugaragaro kandi ubutabera budakoze akazi kabwo.
Ni uko mbibona.

Inararibonye n’inararikoze zo muri RNC nizireke gushinyagurira rubanda no kudukina ku mubyimba

October 29, 2012 By Simeon 2 Comments

Banyarwandakazi, Banyarwanda,
Nyuma y'aho Radiyo Ijwi Rya Rubanda itangarije ibitekerezo yari yagejejweho n'abantu bafite ingeso mbi yo gushaka kujijisha abandi baseseza ibitekerezo bifutamye ariko badashaka ko hagira umenya uwabitanze uwo ari we, hari abantu bagiye bandika bavuga ngo bene abo ba Kavuyo na ba Rwumbuguza bakorera mu mwobo baba bashaka gutesha igihe, ngo ibyiza ni ukubihorera.

Tega amatwi:
Icyo Simeon avuga ku nyandiko za Kennedy Gihana, umumotsi w'inkoramaraso Kayumba Nyamwasa, ku birebana n'ubwicanyi n'ubugome bwe.

Njye ariko ndakomeza nkavuga nti: siko bigomba kumera. Abo bantu baseseza ibitekerezo bafite gahunda ndende, kandi si iyo kugirira neza rubanda. Uburyo bakoresha nibwo Inyenzi-Inkotanyi zakoresheje kuva kera zisesera nk'uko shitani isesera mu mitima y'abantu, zigaseseka mu bantu ibitekerezo zitashoboraga kwerura ngo zitangaze ku mugaragaro, hanyuma abazishinze bakabigenderaho ubu bakaba babunzwa n'agahinda bavuga ngo barashutswe, ngo ntibari bazi uko Inkotanyi zikora n'uburyo zazobereye mu kubeshya no gukora manipulation. Nongere mbisubiremo. Njye nemera ko bene abo bantu bogeza bagashyigikira inkoramaraso, baseseza ibitekerezo ariko bagatinya ko bigibwaho impaka atari inyangamugayo. Nemera ko abo tutagomba kubihorera. Ahubwo tugomba gushishikarira kubakurikirana, tukabavana mu myobo bavugiramo, tukabashyira ahagaragara maze bakaza bagasobanura ikibari ku mutima, bakakijyaho impaka n'abandi banyarwanda batabibona kimwe.
Izo mpaka z'abantu batihishahisha kandi badafite ikimwaro cy'uko abantu bose bamenya ibyo batekereza nizo zizavamo imyanzuro izafasha abanyarwanda kwongera kwubaka igihugu cyacu cyajambijwe na FPR Inkotanyi.

Banyarwandakazi, Banyarwanda,
Mwashoboye gukurikirana ukuntu umuntu witwa cyangwa wiyise Edson Rwumbuguza yanditse asaba ko abanyarwanda bareka gushyira mu majwi inkoramaraso Kayumba Nyamwasa n'izindi nkotanyi bafatanije gutegura no gushyira mu bikorwa jenoside y'abahutu, avuga ko kuri we byose byakozwe na shefu wabo Kagame.
Ku tariki ya 30/09 nyuma ya saa sita nibwo noherereje abantu email yitwaga "Gahunda - None ku mugoroba: igisubizo ku bateza ubwega ngo "duhe Kayumba Nyamwasa amahoro" mbamenyesha ko uwo mugoroba ndashyiraho ikiganiro gisesengura ibyanditswe n'uwo Edson Rwumbuguza, wanditse ariko akanga kugaragara ngo tujye impaka zubaka ku bitekerezo yari yangejejeho.

Kuri uwo mugoroba, umugabo witwa Kennedy Gihana wo muri RNC muri Afurika y'Epfo yahise anyandikira email ngufiya agira ati: Ariko simeo kayumba yaba yaragutwaye iki? Ubu koko uriho urunga abanyarwanda mu biganiro byawe cyangwa urabatanya nka kagame? ndakubaza.
Icya mbere cyo, naratangaye cyane kwumva umuntu muzima, amaze gusubirirwamo mu kiganiro ibyo inkoramaraso Kayumba Nyamwasa yakoze byose, atinyuka kwandika avuga ngo "ariko Kayumba yaba yaragutwaye iki?" Umuntu uzi neza uburyo Nyamwasa yatsembye kandi agashishikariza gutsemba abahutu, agahangara koko, akambaza ngo "ariko Kayumba yaba yaragutwaye iki"?
Icyo gihe ariko nibwiye ko ahubutse, mpitamo kuba ndetse kumwandikira kugira ngo abanze yumve neza isesengura ryose ry'inyandiko ya Rwumbuguza ku birebana n'inkoramaraso y'umujenosideri Kayumba Nyamwasa.

Ku tariki ya 05/10, nibwo namushubije ngira nti:
Komera Kennedy,
Ntugire ngo sinagushubije, ahubwo naguhaye igihe kugira ngo ubanze utege amatwi neza ibyo uwo mugabo Edson yari yanditse n'igisubizo namuhaye nyuma y'aho bigaragaye ko adashaka kwungurana ibitekerezo, ahubwo ahitamo guseseza ibitekerezo bye bufuku.
Ubu rero nizeye ko wamaze kubitekerezaho. Uracyibaza se nka biriya wibazaga? Uracyambaza se biriya wambazaga?
Uramutse ukibyibaza, ndakumenyesha ko niteguye kubivuganaho nawe nkaguha ibisobanuro wifuza. Ubwo wambwira igihe uzabonekeraho noneho tukabiganiraho nkakumara amatsiko.
Ni aho muri iyi minsi.
Imana ikomeze igufashe.

Bukeye bw'aho, mu gitondo cyo ku tariki ya 06/10, Kennedy Gihana yanshubije agira ati:
Dear simeon, komera. Nakubazaga impamvu wita Kayumba inkoramaraso sinzi ko waba uzi uwo yiciye nta kindi. So wansubiza kuli email nakibazo.
Thanks
Muranyumvire. Ngo "Nakubazaga impamvu wita Kayumba inkoramaraso sinzi ko waba uzi uwo yiciye nta kindi".
Ariko se Banyarwandakazi, Banyarwanda, ubu turagana he koko? Ngo arambaza impamvu nita Kayumba inkoramaraso? Ngo ntazi ko naba nzi uwo Nyamwasa yiciye? Mbega akanyaro! Ibyo bikandikwa n'umuntu witwa ko ari muzima, witwa ko yize, ko yaminuje, uvuga ko aharanira ukuri n'ubutabera mu Rwanda, ko aharanira igaruka rya demokarasi mu Rwanda? Ibyo bikandikwa n'umuntu wibazaga muri email ya mbere ngo "Ubu koko uriho urunga abanyarwanda mu biganiro byawe cyangwa urabatanya nka kagame" nk'aho yibwira ko abo banyarwanda baziyunga ari uko bakikiye ukuri? Uwo Gihana, wiyemeje kuba umumotsi w'inkoramaraso Nyamwasa, akihandagaza akijijisha avuga ngo ese njye naba nzi uwo Nyamwasa yiciye! Nabyibajijeho, mpita nibaza rwose niba yarihaye nibura akanya ko kuzirikana no gusesengura ibyo nari nashubije uwiyise Rwumbuguza ku birebana n'Inkoramaraso Kayumba Nyamwasa. Njye nari niteze ko ari buze avuga ati nasesenguye igisubizo watanze kuri radiyo, none reka tubijyeho impaka nkubwire kandi nkwereke aho wibeshya, aho urengera, aho uvugisha ukuri n'ibindi... Nibwiraga ko ubwenge kamere bwe, amashuri na experience afite byashoboraga kumufasha gushyira ibitekerezo na za arguments ku murongo, maze tukabigiraho ikiganiro cyazafasha n'abandi banyarwanda kwumva ikibazo cy'abantu nkawe bakingira ikibaba inkoramaraso zateguye jenoside zikayishyira mu bikorwa kuva muri 1990 mu Rwanda no muri Kongo.
Narumiwe mbonye ansubiza ambaza ngo ese nzi uwo Nyamwasa yiciye? Anagerekaho, ngo nzamusubize kuri email gusa nta kibazo.
Ngo nta kibazo?
Jye nabonaga kandi ndacyabona harimo ikibazo. Cya kindi cyo gukoresha methodes za rusesezi z'abamenyereye gukorera mu myobo nk'ifuku. Nicyo cyatumye uwo munsi ku tariki ya 06/10 nyuma ya saa sita, nahise musubiza mubwira nti:
Oya muvandimwe Kennedy. Nibwira ko wemera ko ibibazo byawe bifite ishingiro kandi ko wabisangira n'abandi, ku buryo nanjye numva ko ibisubizo naguha byagirira abandi banyarwanda babyibazaho akamaro. Sinihererana ibibazo n'ibisubizo. Ikindi kandi mu bibazo byawe harimo judgement ukora kuri njye nshaka ko tuganiraho kugira ngo turebe neza uko byifashe.
Ntiwakwepa rero ngo nagusubiza kuri email.
Niba warabibajije ushaka koko ibisubizo, emera tubivugeho nta guca iruhande. Nizera ko kubwizanya ukuri bitazica umutumirano.
Ntegereje rero ko umbwira igihe wumva kikubereye ngo tubiganireho.
Umunsi mwiza.

Iyo email yarayibonye ariko ntiyayishubije.
Hashize iminsi 4, ku tariki ya 10/10, nongeye kumwandikira mwibutsa ko bitarangiriye aho. Naramubwiye nti:
Komera Kennedy,
Iminsi 4 ubu irashize nkwibukije ko wambwira igihe twaganiriraho kuri biriya wanyandikiye birebana na Nyamwasa. Nk'uko nabikubwiye, kubwizanya ukuri ni byo bizatuma twe abanyarwanda tuva mu gihirahiro turimo. Niko mbyemera.
Ndahari rwose kandi ndategereje. Umbwire igihe wumva kikubereye, maze icyo kibazo tukivanemo.
Umugoroba mwiza.

Bukeye bw'aho, ku tariki ya 11/10, Kennedy Gihana yanyoherereje igisubizo agira ati:
Bite amakuru simeon,
Nta mwanya wo guterana amagambo mfite ariko igihe nikigera abanyarwanda tuzicara hamwe tuvugane ku bibazo bidutadukanya hamwe nibyo duhuriyeho. Gusa sinzi wowe ushinja abandi ko uri umwere. Uzaze ureka gucira abantu imanza mutari mu rukiko.

Icyo gisubizo cya Gihana cyerekana ko atiteguye no kuganira ku bitekerezo we ubwe yitangiye. Niwe ubwe wanyandikiye afite ibyo abaza birebana na Nyamwasa, namubwira nti reka tubiganireho, ngo nta mwanya wo guterana amagambo mfite? None se ko ariwe watangiye anyandikira ambaza ngo Nyamwasa dupfa iki, yari asanzwe ateganya ko nta gisubizo cyanjye akeneye kwumva? Ko ariwe se wanyandikiye abaza ati Ubu koko uriho urunga abanyarwanda mu biganiro byawe cyangwa urabatanya nka kagame?, yabibazaga azi ko adakeneye kwumva igisubizo cyanjye? Yabyandikiraga iki se? Niba yarumvaga se ko atatinyuka kuza imbere y'abanyarwanda ngo tubiganireho, yabinyandikiraga ngo mbigenze nte? Mwe musobanukiwe mwamfasha kwumva icyo yari agamije niba atarashakaga ibisubizo?
Icyo gisubizo cye kandi kiragaruka no kuri bya bindi abajijisha rubanda basigaye basubiramo nka gasuku, ngo igihe nikigera abanyarwanda tuzicara hamwe tuvugane ku bibazo bidutadukanya hamwe nibyo duhuriyeho. Ahaaa! Murakwepa kuvugana n'abantu babona ibintu ku buryo butandukanye n'ubwanyu, hanyuma ngo igihe nikigera abanyarwanda tuzicara tuvugane! Muracyabeshya ba nde se Gihana we? Njye ku bwanjye igihe cyarageze cyo kuvuga ku bibazo by'abanyarwanda. Ku bwanjye, abibwira ko bazongera kurema udutsiko bita amashyaka bakazajya kwiherera hagati yabo babifashijwemo na ba mpatsibihugu ngo baragabana ubutegetsi babeshya ko bavuga mu izina ry'abanyarwanda batabwiza ukuri, abo nibatangire bitonde kuko buhoro buhoro abanyarwanda bari gukanguka kandi ntibashaka kuzongera kwizera ubonetse wese.

Maze kubona icyo gisubizo cya Kennedy Gihana, narategereje, muha igihe gihagije, maze ejobundi kuri 27/10 mwandikira bwa nyuma mubwira nti:
Muvandimwe Kennedy,
Komera.
Igisubizo wampaye cyerekana ko utumvise neza ikigamijwe. Si uguterana amagambo, ni ukwungurana ibitekerezo ku byo wanyandikiye.
None se wumvaga ko wafata ikaramu ukanyandikira icyo utekereza kandi ukambaza ibibazo kandi utifuza ko naguha igisubizo cyangwa ibisobanuro? Siko bigenda mu bantu, cyane cyane mu bantu bavuga ko baharanira demokarasi, ukuri n'ubutabera.
Ndumva rero nta cyabuza ko tubiganiraho. Kereka niba uhitamo ko naguha ibisobanuro wansabye tutagombye kubiganiraho, kandi twari dufite uburyo bwo kubijyaho impaka tukungurana ibitekerezo 'imbona nkubone'. Hari ibyo se wanditse wumva utashobora guhagararaho ngo usobanure kandi ushimangire bibaye ngombwa mu gihe tubiganiraho?
N'ejo ndahari. Nagusaba kumenyesha gusa amasaha wumva akubereye, ahasigaye iki kibazo tukakivana mu nzira.
Umugoroba mwiza.

Banyarwandakazi, Banyarwanda,
Mwiyumviye namwe uko byagenze n'uriya mugabo Kennedy Gihana wo muri Afurika y'Epfo nawe wahagurukiye gukingira ikibaba inkoramaraso Kayumba Nyamwasa, ariko akaba adashobora gutinyuka kuzana arguments ze ku meza ngo twese tuzijyeho impaka. Ese abantu nka Gihana twavuga ko indwara barwaye ari iyihe? Ya syndrome ya Stockolm se duherutse kuvugaho? Cyangwa ni indi syndrome abahanga basigaye kuzashakira izina?

Banyarwandakazi, Banyarwanda,
Murumva abanyarwanda b'inkomamashyi nk'uyu Kennedy Gihana bazatugeza kuki koko?
Aho tuzirikana bihagije aho abamotsi ba Nyamwasa nka Kennedy Gihana cyangwa Edson Rwumbuguza batugejeje n'aho bashaka kutugaragura batuganisha ubu?
Nk'uko natangiye mbivuga, abantu bafite imikorere nk'iya bariya ba Kavuyo, ba Rwumbuguza na ba Gihana, bahitamo guseseza ibitekerezo bifutamye ariko badashobora kubihagararaho bemye, bagomba kwamaganwa. Ntimugakangwe ngo ni uko bazi kududubiza icyongereza cyangwa igifaransa, ikizami cya mbere bagomba gutsinda ni icyo kwerura bakavuga, bakajya impaka n'abandi, bakareka gukora bufuku. Bagomba kuvanwa ikuzimu, bakemera gukorera ahagaragara, gukorera mu mucyo.
Dushaka kuvanaho ingoma y'abicanyi bakoresheje ikinyoma n'ubugome kugira ngo batugaragure, ntidushaka kuyisimbuza iy'abambari b'inkoramaraso batinya ukuri.

Mureke rero mbibutse ikintu kimwe. Bene bariya, bashuka abemera gushukika. Bareshya abemera kureshywa. Bazakomeza kubeshya abemera kugendera ku mpuha no ku binyoma. Nyabuna nimushishoze, mureke gukomeza kwigira ingwate z'abatugejeje mu kangaratete turimo.
Ababazi neza muzatubwire. Aho abo ba Rwumbuguza na ba Gihana ntibaba bari muri ba bandi bakoreshejwe na ba Kabarebe na ba Nyamwasa mu gutsemba abahutu, ubu bakaba bakoreshwa mu gushaka kubahanaguzaho ibyaha?
Nakwongera kubasaba rero ko igihe cyose bagize icyo bavuga banenga ibyo bumvise kuri Radiyo Ijwi Rya Rubanda, mwajya mubibutsa muti: uwabivuze yabishyize ahagaragara, igisubizo ufite nawe gishyire ahagaragara. Kubatega amatwi utabashubije, ni ukubatiza umurindi.
Kennedy Gihana, ntiti ishaka ko tuyihanga amaso cyangwa tuyitega amatwi, niba uzi ko ibyo ushaka kuvuga ari ukuri kandi bifite injyana, utinyira iki kubivugira ahagaragara. Niba utinya guseba kubera ibitekerezo byawe bidahwitse, bivugurure aho kwikoma rwihishwa abatanga ibyabo ku mugaragaro. Gihana n'abo mufatanyije gushengerera inkoramaraso zarimbuye abanyarwanda, niba mutinya kunyomozwa no kwerekwa ukuri mwirengagizaga, ubwo muracyafite ikibazo gikomeye, kandi muri bamwe mu batuma ibibazo mu banyarwanda bikomeza.
Nimwisuzume, nimwisubireho, nimureke gushotora abahekuwe n'iyo nkoramaraso Nyamwasa mushengereye mushaka guyikingira ikibaba.